លោកនាយករដ្ឋមន្ត្រី ហ៊ុន សែន ព្រមានដកតំណែងអភិបាលខណ្ឌដូនពេញ ដោយលោកថា បើនៅតែមិនព្រមរៀបចំចរាចរណ៍ឲ្យមានសណ្តាប់ធ្នាប់នៅម្តុំវិមានឯករាជ្យក្បែរផ្ទះរបស់លោក ឲ្យមានរបៀបរៀបរយល្អទេនោះ។
ថ្លែងក្នុងពិធីជួបសំណេះសំណាលជាមួយកម្មករនៅថ្ងៃទី៣ ខែមករានេះ លោក ហ៊ុន សែន បានថ្លែងព្រមានដកដំណែងអភិបាលខណ្ឌដូនពេញ លោក សុខ ពេញវុធ ដោយថាបើមិនរៀបចំចរាចរណ៍នៅម្តុំវិមានឯករាជ្យឲ្យបានល្អ ដើម្បីងាយស្រួលឲ្យប្រជាពលរដ្ឋធ្វើដំណើរ និងកាត់បន្ថយគ្រោះថ្នាក់ផ្សេងៗជាដើម។
អភិបាលខ័ណ្ឌដូនពេញ លោក សុខ ពេញវុធ បានអះអាងថា ក្រុមការងារលោកបានសហការជាមួយមន្ទីរសាធារណៈការ និងដឹកជញ្ជូនរាជធានីភ្នំពេញ ដើម្បីរៀបចំសណ្តាប់ធ្នាប់នៅក្នុងទូទំាងខ័ណ្ឌដូនពេញ ជាពិសេសក្បែរផ្ទះលោក ហ៊ុន សែន ដោយថាដើម្បីកាត់បន្ថយការកកស្ទះនិងគ្រោះថ្នាក់ចរាចរណ៍ជាដើម។
លោកអះអាងថា «យើងបានពិភាក្សាគ្នាជាមួយមន្ទីរសាធារណការរាជធានីភ្នំពេញ ដើម្បីបំពាក់ផ្លាកសញ្ញាចរាចរណ៍ផ្លាកសញ្ញាបង្ហាញទិស បន្ទាប់មកយើងគូសគំនូសចរាចរណ៍ឲ្យបានស្អាត ឲ្យបានច្បាស់ ដើម្បីឲ្យបងប្អូនប្រជាពលរដ្ឋលោកមើលគំនូស ហើយលោកគោរពទៅតាមច្បាប់ ដូចមន្ត្រីចរាចរណ៍ដែលបញ្ជាទិសនៅតាមគោលដៅចរាចរណ៍នានា គោលបំណងសំខាន់គឺដើម្បីឲ្យបងប្អូនប្រជាពលរដ្ឋទំាងអស់គោរពច្បាប់ចរាចរណ៍ ទីពីររឿងដែលសំខាន់បំផុតនោះគឺទប់ស្កាត់និងកាត់បន្ថយគ្រោះថ្នាក់ចរាចរណ៍ដែលមួយថ្ងៃៗកើនឡើង»។
លោក សុខ ពេញវុធ ជាអតីតអភិបាលរងខណ្ឌដូនពេញ ហើយបន្ទាប់មកនៅខែធ្នូឆ្នាំ២០១៦ ត្រូវបានតែងតាំងជា អភិបាលខណ្ឌជំនួស លោក គួច ចំរើន។
របាយការណ៍សាលារាជធានីភ្នំពេញឲ្យដឹងថា នៅភ្នំពេញ ចំនួនរថយន្តនិងម៉ូតូ មានប្រមាណជាង ៣,២លានគ្រឿង បូករួមជាមួយតាក់ស៊ី និងត្រីចក្រយាន ធ្វើដំណើរលើដងផ្លូវជារៀងរាល់ថ្ងៃ ស្របពេលបញ្ហាគ្រោះថ្នាក់ចរាចរណ៍ និងការកកស្ទះ បានក្លាយជា បញ្ហាពិបាកដោះស្រាយ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថា រដ្ឋាភិបាលបញ្ជាឲ្យមន្ត្រីក្រោមឱវាទទំាងអស់ធ្វើការកែសម្រួលចរាចរណ៍នៅម្តុំវិមានឯករាជ្យមានភាពលម្អៀង ដោយថាគួរតែបញ្ជាឲ្យមន្ត្រីគ្រប់ជាន់ថ្នាក់ កែសម្រួលចរាចរណ៍នៅទូទំាងរាជធានីភ្នំពេញ ជាពិសេសនៅតំបន់កកស្ទះ ទើបទទួលបានការគំាទ្រពីពលរដ្ឋ។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លោក រុន រ័ត្នវាសនា បានប្រាប់វីអូឌីកាលពីថ្ងៃទី២ ខែមករានេះថា តួលេខអ្នកស្លាប់ ដោយសារគ្រោះថ្នាក់ចរាចរណ៍ បានកើនឡើង៦៣នាក់ ខណៈ តួលេខអ្នករងរបួសបានថយចុះ ១០៦៨នាក់ បើប្រៀបធៀបនឹងតួលេខគ្រោះថ្នាក់ចរាចរណ៍កាលពីឆ្នាំ២០១៦កន្លងមក។
ប្រឈមមុខជាមួយកំណើនគ្រោះថ្នាក់ចរាចរណ៍បែបនេះ ក្រសួងមហាផ្ទៃ កាលពីដើមខែធ្នូកន្លងមក បានដាក់បញ្ជាឲ្យជំរុញការអនុវត្តច្បាប់ចរាចរណ៍ ដោយថា ដើម្បីទប់ស្កាត់ និងកាត់បន្ថយការបាត់បង់ជីវិត រងរបួស និងការខូច ខាតទ្រព្យសម្បត្តិ។
ក្នុងបទបញ្ជាផ្ទៃក្នុងនោះ ក្រសួងមហាផ្ទៃបានបញ្ជាទៅមន្រ្តីរាជការក្រោមឱវាទទាំងអស់ ត្រូវធ្វើជាគំរូក្នុងការគោរពប្រតិបត្តិច្បាប់ស្ដីពីចរាចរណ៍ផ្លូវគោកតាមរយៈការអនុវត្តឲ្យបាននូវប្រការដែលដាក់ចេញចំនួន ១២ ដូចជា ការពាក់មួកសុវត្ថិភាពជានិច្ចទាំងអ្នកបើក និងអ្នករួមដំណើរតាមម៉ូតូ និងត្រូវពាក់ខ្សែក្រវ៉ាត់សុវត្ថិភាពជានិច្ចទាំងអ្នកបើកបរ និងអ្នករួមដំណើរខាងមុខតាមរយៈរថយន្តជាដើម៕
