មន្ត្រីអន្តោប្រវេសន៍កម្ពុជា បានឲ្យដឹងថា ជនបរទេសជិត ២ពាន់នាក់ ក្នុងចំណោម ៤៧សញ្ជាតិ ត្រូវបានបណ្ដេញចេញពីប្រទេសកម្ពុជាកាលពីឆ្នាំមុន ដោយក្នុងនោះ ភាគច្រើនជាជនជាតិវៀតណាម។
ប្រធាននាយកដ្ឋានស៊ើបអង្កេត និងអនុវត្តន៍នីតិវិធី នៃអគ្គនាយកដ្ឋានអន្តោប្រវេសន៍ លោក អ៊ុក ហៃសិលា បានប្រាប់វីអូឌីនៅថ្ងៃនេះថា ជនបរទេសដល់ទៅ ១ ៨៨៥នាក់ ក្នុងចំណោម ៤៧សញ្ជាតិ ត្រូវបានសមត្ថកិច្ចកម្ពុជាចាប់បញ្ជូនចេញពីកម្ពុជា នៅក្នុងចំណោម ៣៩២ករណី កាលពីឆ្នាំមុន។ លោកឲ្យបន្ថែមថា ភាគច្រើននៃជនបរទេសដែលត្រូវបានចាប់បញ្ជូនចេញនោះ គឺជាជនជាតិវៀតណាម។
មន្ត្រីនគរបាលអន្តោប្រវេសន៍រូបនេះ បញ្ជាក់ថា ជនបរទេសទាំងនោះ ត្រូវបានចាប់បញ្ជូនចេញ បន្ទាប់ពីពួកគេបានចូលមករស់នៅក្នុងប្រទេសកម្ពុជា ដោយគ្មានឯកសារត្រឹមត្រូវ។
កាលពីថ្ងៃទី៩ ខែមករា អគ្គនាយកនៃអគ្គនាយកដ្ឋានអន្តោប្រវេសន៍ លោក សុខ ផល បានអះអាងថា សមត្ថកិច្ចកម្ពុជាសម្រេចដកហូតឯកសាររដ្ឋបាលខុសប្រក្រតីដែលកាន់កាប់ដោយជនបរទេសបានជាង ១០ភាគរយ ដោយក្នុងនោះភាគច្រើនលើសលុប ជាជនអន្តោប្រវេសន៍វៀតណាម គិតចាប់តាំងពីចុងឆ្នាំ២០១៧មក។
លោក សុខ ផល បញ្ជាក់ថា ជនជាតិវៀតណាមចំនួន ៧៦ ៣៩៨នាក់ បានកាន់កាប់ឯកសាររដ្ឋបាលមិនប្រក្រតី ក្នុងនោះមានសៀវភៅស្នាក់នៅ សៀវភៅគ្រួសារ សំបុត្រកំណើតខ្មែរ ប័ណ្ណបោះឆ្នោតខែ្មរ សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខែ្មរ លិខិតឆ្លងដែនខ្មែរ ប័ណ្ណមន្ត្រីរាជការ និងឯកសារដទៃទៀត ខណៈដែលជនជាតិវៀតណាម ១៤ ២៤៦នាក់ កំពុងរស់នៅក្នុងប្រទេសកម្ពុជា ដោយពុំមានឯកសារស្របច្បាប់នោះឡើយ៕
