លោកនាយករដ្ឋមន្ត្រី ហ៊ុន សែន នៅថ្ងៃនេះ បានសម្រេចទទួលយកតំណែងប្រធានមូលនិធីទ្រទ្រង់មនុស្សចាស់ ទៅតាមសំណើរដ្ឋមន្ត្រីក្រសួងសង្គមកិច្ច លោក វង សូត ដោយថា ដើម្បីជំរុញឲ្យមានការប្រែប្រួលជាវិជ្ជាមាននូវគុណភាពជីវិតមនុស្សចាស់។
លោក ហ៊ុន សែន ក្នុងពិធីប្រកាសផ្សព្វផ្សាយគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០ បានថ្លែងថា គោលនយោបាយនេះសំដៅធានាឲ្យបាននូវសន្តិសុខប្រាក់ចំណូល កាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជនវ័យចាស់ ព្រមទាំលើកកម្ពស់សុខមាលភាពប្រកបដោយសមធម៌។
លោកថា៖ «ខ្ញុំសង្ឃឹមយ៉ាងមុតមាំថា គ្រប់ក្រសួងស្ថាប័នដៃគូអភិវឌ្ឍន៍ និងភាគីពាក់ព័ន្ធទាំងអស់ នឹងខិតខំអនុវត្តរួមចំណែកការចូលរួមវិភាគទានយ៉ាងសំខាន់ ដើម្បីធ្វើឲ្យមានការប្រែប្រួយជាវិជ្ជមាននូវកម្រិតជីវភាពរស់នៅ និងគុណភាពជីវិតរស់នៅមនុស្សកម្ពុជាគ្រប់រូប»។
គោលនយោបាយជាតិស្តីពីមនុស្សវ័យចាស់ បានផ្តោតទៅលើសន្ដិសុខហិរញ្ញវត្ថុ សុខភាព របៀបរបបការរស់នៅ ការរំលោភបំពាន បរិស្ថានអំណោយផល និងសមាគមមនុស្សចាស់ ជាដើម។
តែជាងកន្លះខែប៉ុណ្ណោះក្នុងរដូវជិតបោះឆ្នោតមកដល់នេះ លោក ហ៊ុន សែន បានប្រកាសធ្វើជាប្រធានមូលនិធិចំនួន ៣រួចមកហើយ រួមមានមូលនិធិទ្រទ្រង់មនុស្សចាស់ មូលនិធិមន្ទីរពេទ្យគន្ធបុប្តា និងមូលនិធិអ្នកធាក់ស៊ីក្លូ។
ប្រធានអ្នកនាំពាក្យក្រសួងសង្គមកិច្ចអតីតយុទ្ធជន និងយុវនីតិសម្បទា លោក តូច ចាន់នី មិនទាន់អាចបញ្ជាក់បានថា មូលនិធិនេះ នឹងចែកជាលុយសុទ្ធប្រចាំខែដល់មនុស្សចាស់ ឬក៏ផ្តល់សេវាគាំពារយ៉ាងណាពិប្រាកដនៅឡើយទេ ដោយថា ក្រសួងត្រូវការពេលវេលាបន្ថែម ដើម្បីសិក្សាទៅលើសេវាទ្រទ្រង់មនុស្សចាស់នេះ។
ប៉ុន្តែ អ្នកនាំពាក្យរូបនេះ បញ្ជាក់ថា ជាលទ្ធផលក្រសួងបានកសាងមជ្ឈមណ្ឌមួយនៅខណ្ឌសែនសុខ ក្នុងរាជធានីភ្នំពេញ បានជាង ៧០ភាគរយហើយ។ លោកថា ក្រសួងគ្រោងនឹងដាក់ឲ្យដំណើរការមជ្ឈមណ្ឌលនោះនៅឆ្នាំនេះ ដើម្បីថែទាំមនុស្សចាស់។
បើតាមអ្នកនាំពាក្យរូបនេះ ក្រសួងនឹងបង្កើតឲ្យមានមជ្ឈមណ្ឌលនៅតាមបណ្តាខេត្តមួយចំនួនទៀត តាមទំហំនៃមូលនិធិដែលប្រមូលបាន និងកិច្ចសហការពីដៃគូពាក់ព័ន្ធ។
លោកថា៖ «មជ្ឈមណ្ឌលនេះ សូមជម្រាបថា ជាមជ្ឈមណ្ឌលជាតិដែលមានតែមួយសម្រាប់ស្រុកខ្មែរយើង ហើយយើងយកការអនុវត្តនៅមជ្ឈមណ្ឌលនេះ ធ្វើជាគំរូសម្រាប់ខេត្តដទៃ ឬសម្រាប់មជ្ឈមណ្ឌលដទៃទៀត ដើម្បីជាស្តង់ដាមួយសម្រាប់ថែទាំមនុស្សចាស់ ហើយយើងកំពុងតែស្វែងរកដៃគូមួយចំនួន ដូចជា ជប៉ុនអី គាត់កំពុងតែគាំទ្រយើងរឿងហ្នឹងដែរ ហើយជប៉ុនគាត់មានបទពិសោធន៍ក្នុងរឿងហ្នឹងដែរ ហើយជប៉ុនមានបទពិសោធន៍ល្អក្នុងការងារថែទាំមនុស្សចាស់នេះ»។
របាយការណ៍នាយកដ្ឋានសុខភាពមនុស្សចាស់នៃក្រសួងសង្គមកិច្ច អតីតយុទ្ធជន និងយុវនីតិសម្បទា មនុស្សវ័យចាស់មានអាយុពី ៦០ឆ្នាំឡើងក្នុងឆ្នាំ២០១៣ មានប្រមាណ ៨% ឬស្មើនឹង ១ លាន ២សែននាក់នៃប្រជាជនសរុប ១៥លាននាក់ ។
ក្រសួងនេះ បានព្យាករថា នៅឆ្នាំ២០៣០ មនុស្សចាស់នឹងកើនដល់ចំនួន ២លាននាក់ ឬស្នើនឹង ១១%នៃប្រជាជនសរុបប្រមាណ ១៨លាននាក់៕
