មន្ត្រីតុលាការកំពូល២រូប នៅក្នុងចំណោមចៅក្រម៩រូប ដែលបានសម្រេចរំលាយអតីតបក្សប្រឆាំងនោះ ត្រូវបានបក្សកាន់អំណាចដាក់បញ្ចូលទៅក្នុងក្រុមការងារពិសេស ដើម្បីពង្រឹងសមត្ថភាពគណបក្សនេះ។
ក្នុងមហាសន្និបាតកាលពីចុងសប្ដាហ៍កន្លងមកនេះ គណបក្សប្រជាជនកម្ពុជា បានសម្រេចបញ្ចូលមនុស្សដល់ទៅ ៣៤២នាក់ទៀត ទៅក្នុងគណៈកម្មាធិការកណ្ដាលនៃបក្សនេះ ក្នុងនោះមានទាំងអនុប្រធានតុលាការកំពូល លោក ជីវ កេង និងអគ្គព្រះរាជ លោកស្រី ជា លាង ផងដែរ។
លោក ជីវ កេង និងលោក ស្រី ជា លាង គឺជាចៅក្រម ២រូប ក្នុងចំណោមចៅក្រម ៧រូបផ្សេងទៀត ដែលបានចូលរួមជម្រះក្តីសំណុំរឿង គណបក្សសង្គ្រោះជាតិ តាមបណ្តឹងរបស់រដ្ឋាភិបាល។
លុះដល់ថ្ងៃទី១៦ ខែវិច្ឆិកាឆ្នាំ២០១៧ ប្រធានក្រុមប្រឹក្សាជំនុំជម្រះ លោក ឌិត មន្ទី ជាសមាជិកគណៈអចិន្ត្រៃយ៍គណបក្សប្រជាជនកម្ពុជាផងនោះ បានប្រកាសសាលដីកាឲ្យរំលាយ ព្រមទាំងហាមមន្ត្រីបក្សប្រឆាំង ១១៨រូបទៀត មិនឲ្យធ្វើនយោបាយរយៈពេល ៥ឆ្នាំ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន និយាយថា ក្នុងរបបប្រជាធិបតេយ្យ មន្ត្រីកម្លាំងប្រដាប់អាវុធ និងមន្ត្រីតុលាការ មិនត្រូវបានអនុញ្ញាតឲ្យចូលជាសមាជិកបក្សនយោបាយណាមួយនោះទេ ដោយលោកថា បើពុំនោះទេ ពួកគេនឹងបំពេញការងាររបស់ពួកគេដោយមិនឯករាជ្យ។
លោក សាម អ៊ីន ឲ្យដឹងទៀតថា ការព្យាយយាមបញ្ចូលមន្ត្រីជាន់ខ្ពស់កងកម្លាំងប្រដាប់អាវុធ និងតុលាការ ជាមន្ត្រីស្នូលរបស់គណបក្សកាន់អំណាច លោកថា ផែនការយុទ្ធសាស្ត្រនោះ បានបង្ហាញពីការឃ្លាតចាកពីគន្លងលទ្ធិប្រជាធិបតេយ្យ។
លោកថា៖«នេះវាឆ្លុះបញ្ចាំងថា យើងរំលោភស្មារតីនៃរដ្ឋធម្មនុញ្ញរបស់កម្ពុជាហើយ ហើយខ្ញុំគិតថា គណបក្សប្រជាជនកម្ពុជា បើលោកនៅគិតថា មានការប្តេជ្ញាចិត្តខ្ពស់ក្នុងការកសាងលទ្ធិប្រជាធិបតេយ្យ គោរពគោលការណ៍ប្រជាធិបតេយ្យសេរីពហុបក្ស នឹងដំណើរដែលគាត់រៀបចំសមាជិកបក្សនេះ គឺគាត់បញ្ច្រសទិសនៃស្មារតីនេះហើយ»។
អ្នកវិភាគនយោបាយលោកបណ្ឌិត ឡៅ ម៉ុងហៃ វិភាគថា ក្នុងប្រទេសប្រជាធិបតេយ្យ កម្លាំងប្រដាប់អាវុធ និងមន្ត្រីតុលាការ មិនត្រូវដាក់បញ្ចូលជាសមាជិកបក្សណាមួយនោះទេ ដើម្បីទុកឲ្យស្ថាប័នទាំងនោះ ជាស្ថាប័នឯករាជ្យ បម្រើពលរដ្ឋគ្រប់និន្នាទូទាំងប្រទេស។
លោក ឡៅ ម៉ុងហៃ ពន្យល់ថា មានតែប្រទេសកុម្មុយនីស្តផ្តាច់ការទេ ដែលយកមន្ត្រីក្នុងកងកម្លាំងប្រដាប់អាវុធ និងតុលាការធ្វើជាជាសមាជិកបក្សរបស់ខ្លួន ដើម្បីយកធ្វើជាឧបករណ៍នយោបាយ។
លោកថា៖«មានន័យយ៉ាងម៉េច គឺទី១ ច្បាប់ត្រូវបានប្រើប្រាស់ជាឧបករណ៍ ដើម្បីបង្ក្រាប ឬកម្ទេចខ្លាំង។ ទី២ ច្បាប់ទាំងឡាយ គឺអត់មានគោរពសិទ្ធិមនុស្សអីច្រើនទេ។ ទី៣ គឺចៅក្រមដែលជាសមាជិកបក្ស ត្រូវគោរពតាមគោលនយោបាយរបស់បក្ស»។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ជ្រើសរើសចៅក្រម និងកងកម្លាំងប្រដាប់អាវុធធ្វើជាសមាជិកបក្ស លោកថា មានធានាដោយច្បាប់ ដោយថា ច្បាប់មិនបានដកហូតសិទ្ធិពួកគាត់មិនឲ្យចូលរួមជីវិតនយោបាយទេ ហើយថា ក៏មិនមែនលើកទឹកចិត្តចៅក្រមដែលបានរំលាយគណបក្សប្រឆាំងដែរ។
លោកថា៖«ទោះបីមន្ត្រីនគរបាល មន្ត្រីយោធា មន្ត្រីតុលាការ ត្រូវបានបញ្ចូលទៅក្នុងគណៈកម្មាធិការកណ្តាលរបស់គណបក្សប្រជាជនកម្ពុជាក៏ដោយ ក៏អត់មានអ្វីទៅខុសច្បាប់ដែរ។ វាបញ្ហាសំខាន់ គឺនៅលើតួនាទីភារកិច្ចគាត់នៅពេលបំពេញការងារហ្នឹងស្របទៅតាមច្បាប់កំណត់ឬយ៉ាងម៉េច?។ បើគាត់ធ្វើមិនត្រឹមត្រូវ អាហ្នឹងបានវាខុស តែបើគាត់ធ្វើត្រឹមត្រូវទៅតាមគោលការណ៍ច្បាប់ ដូចជា ច្បាប់បោះឆ្នោតអីជាដើម បើគាត់ធ្វើត្រឹមត្រូវតាមនីតិវិធីហើយ វាអត់មានបញ្ហាអីទេ»។
រដ្ឋធម្មនុញ្ញមាត្រា១២៨ចែងថាអំណាចតុលាការជាអំណាចឯករាជ្យ។គ្មានអង្គការណាមួយនៃអំណាចនីតិបញ្ញត្តិ ឬនីតិប្រតិបត្តិអាចទទួល អំណាចតុលា ការអ្វីបានឡើយ៕
