អង្គការលើកលែងទោសអន្ដរជាតិ អំពាវនាវទៅអាជ្ញាធរថៃ កុំឲ្យបញ្ជូនស្ដ្រីជនជាតិខ្មែរម្នាក់ ពាក់ព័ន្ធការចោទថា ប្រមាថថ្នាក់នាំបក្សប្រជាជនកម្ពុជា(CPP)មកប្រទេសកំណើតវិញ ដោយថា ស្រ្ដីរូបនោះ នឹងទទួលរងការរំលោភសិទ្ធិក្នុងប្រទេសកម្ពុជា។
ក្នុងសេចក្ដីថ្លែងការណ៍ ចេញផ្សាយកាលពីថ្ងៃអង្គារម្សិលមិញ អង្គការលើកទោសអន្ដរជាតិបានស្នើទៅអាជ្ញាធរថៃ កុំបញ្ជូនស្ដ្រីជនជាតិខ្មែរម្នាក់ឈ្មោះ សំ សុខា ដែលរងការចោទពីរដ្ឋាភិបាលកម្ពុជា ថា បានប្រមាថ និងញុះញង់ឲ្យមានការរើសអើស បន្ទាប់ពីស្ដ្រីរូបនេះ ត្រូវគេមើលឃើញតាមបណ្ដាញសង្គមថា បានយកស្បែកជើងចោលទៅលើស្លាកគណបក្សប្រជាជនកម្ពុជា។
ក្នុងសេចក្តីថ្លែងការណ៍ជាមួយគ្នានេះ អង្គការលើកទោសអន្ដរជាតិក៏ស្នើអាជ្ញាធរថៃ កុំបញ្ជូនគ្រឹស្ដសាសនិក ជាជនជាតិដើមភាគតិចចារ៉ាយម្នាក់ ឈ្មោះ A Ga ឲ្យត្រឡប់ទៅប្រទេសវៀតណាមវិញផងដែរ ដោយថា បុរសរូបនេះនឹងប្រឈមការធ្វើទុក្ខបុកម្នេញផ្នែកនយោបាយ និងសាសនា ក្នុងប្រទេសវៀតណាម។
បើតាមសេចក្ដីថ្លែងការណ៍ដដែល អ្នកស្រី សំ សុខា បានភៀសខ្លួនពីកម្ពុជាទៅប្រទេសថៃ កាលពីខែមេសាឆ្នាំ២០១៧ ប៉ុន្ដែ ត្រូវបានអាជ្ញាធរប្រទេសនេះ ឃាត់ខ្លួនកាលពីថ្ងៃទី៦មករាឆ្នាំ២០១៨ ដោយចោទថា ចូលស្នាក់នៅហួសកំណត់ទិដ្ឋាការ និងត្រៀមបញ្ជូនមកប្រទេសកម្ពុជាវិញនាពេលខាងមុខ។
អង្គការលើកទោសអន្ដរជាតិ លើកឡើងថា រដ្ឋាភិបាលថៃ មានកាតព្វកចិ្ចគោរពតាមច្បាប់អន្ដរជាតិ និងកតិកាសញ្ញារបស់អង្គការសហប្រជាជាតិស្ដីពីការប្រឆាំងនិងការធ្វើទារុណកម្ម ដែលហាមមិនឲ្យបញ្ជូនជនភៀសខ្លួន ឬអ្នកសុំសិទ្ធិជ្រកកោន ទៅកាន់ទីកន្លែង ដែលពួកគេងាយប្រឈមការរំលោភសិទ្ធិមនុស្ស។
អង្គការនេះលើកឡើងថា អ្នកស្រី សំ សុខា បានទទួលរងការគំរាមកំហែងពីក្រុមអ្នកគាំទ្របក្សប្រជាជន បន្ទាប់ពីចោលស្បែកជើងលើស្លាកគណបក្សកាន់អំណាច ការបំភិតបំភ័យពីសំណាក់អាជ្ញាធរ។ អង្គការអន្ដរជាតិមួយនេះបន្ថែមថា ថៃត្រូវគោរពគោលការណ៍សកលនៃការមិនបណ្ដេញចេញដោយបង្ខំ (non-refoulement) ទោះបីជារដ្ឋាភិបាលថៃ បានចុះកិច្ចព្រមព្រៀងស្ដីពីការធ្វើបត្យាប័នជាមួយកម្ពុជា កាលពីឆ្នាំ១៩៩៨ ក៏ដោយ។
តុលាការខេត្ដកំពង់ស្ពឺ បានចេញដីបង្គាប់ឲ្យចាប់ខ្លួន អ្នកស្រី សំ សុខា បន្ទាប់ពីស្ដ្រីរូបនេះ ខកខានមិនបានចូលខ្លួនឆ្លើយបំភ្លឺចំនួន២ដងរួចមកហើយ កាលពីថ្ងៃទី៨មេសា និងថ្ងៃទី១៣មិថុនាឆ្នាំ២០១៧។ តុលាការបានចោទប្រកាន់ស្ដ្រីរូបនេះ ពីបទ «ប្រមាថ» និង «ញុះញង់ឲ្យមានការរើសអើស» អាចនិងមានទោសជាប់ពន្ធនាគារជាង៣ឆ្នាំ ប៉ុន្ដែ អ្នកស្រី សំ សុខាបានរត់ភៀសខ្លួនទៅប្រទេសថៃ រហូតមកទល់ពេលនេះ៕
