មន្រ្តីបេឡាជាតិរបបសន្តិសុខសង្គម(ប.ស.ស.)ប្រចាំខេត្តតាកែវ អះអាងថា កម្មការិនីរាប់សិបនាក់បម្រើការងារនៅរោងចក្រសេឌូណូ ខេមបូ នីតធីង ស្ថិតក្នុងស្រុកបាទី បានបន្តដួលសន្លប់ទៀតនៅថ្ងៃនេះ។
មន្រ្តី ប.ស.ស. ប្រចាំខេត្តតាកែវ លោក សួន វណ្ណៈ ប្រាប់វីអូឌីពីកន្លែងកើតហេតុថ្ងៃនេះថា កម្មការិនីចន្លោះពី ៨០ ទៅ ១០០នាក់ បានដួលសន្លប់ជាបន្តបន្ទាប់នៅព្រឹកថ្ងៃនេះ។ មន្ត្រីរូបនេះអះអាងថា កម្មការិនីដួលសន្លប់បែបនេះ បណ្ដាលមកពីពុលថ្នាំបាញ់ស្រូវរបស់អ្នកភូមិនៅក្បែររោងចក្រនោះ។
លោកបន្ថែមថា៖«ព័ត៌មានជាបឋមនេះ កម្មករដួលសន្លប់ប្រហែលពី ៧០នាក់ទៅ ៨០នាក់ និង១០០នាក់ហ្នឹង។ នៅព្រឹកហ្នឹងឥលូវហ្នឹងកំពុងតែណែនពេញមន្ទីពេទ្យបង្អែកស្រុកបាទី ហើយខាងក្រុមការងារ ប.ស.ស. កំពុងតែបញ្ជូនពួកគាត់ទៅមន្ទីពេទ្យខេត្តខ្លះ អ្នកធ្ងន់ៗ ហើយមូលហេតុគឺពុលថ្នាំបាញ់ស្រូវរបស់ប្រជាពលរដ្ឋដែលគាត់ធ្វើជិតរោងចក្រហ្នឹង។ ពេលគាត់បាញ់ទៅប្រព័ន្ធរោងចក្រហ្នឹង ប្រើប្រព័ន្ធប៉ឺតខ្យល់ ពេលបាញ់ទៅ វាប៊ឺតខ្យល់ចូលទៅធ្វើសន្លប់»។
លោក សួន វណ្ណៈ ឲ្យដឹងថា កាលពីល្ងាចថ្ងៃទី៣០ ខែមករាកន្លងមកថ្មីនេះ កម្មការិនី ៦៨នាក់បម្រើការងារនៅរោងចក្រដដែលនេះ ក៏បានដួលសន្លប់ម្ដងរួចមកហើយ បន្ទាប់ពីកសិករធ្វើស្រែក្បែររោងចក្រនោះបាញ់ថ្នាំលើស្រូវរបស់ពួកគេ។
ប្រធានសភាពការងារកម្ពុជា លោក អាត់ ធន់ ប្រាប់វីអូឌីកាលពីម្សិលមិញថា ករណីបាញ់ថ្នាំស្រូវនេះ អាចបណ្តាលឲ្យកម្មករដួលសន្លប់ដែរ ប្រសិនរោងចក្រនោះប្រើប្រព័ន្ធប៊ឺតខ្យល់ចូល ប៉ុន្តែ យ៉ាងណាងលោកថា តាមការស្រាវជ្រាវកន្លងមក កម្មករដួល សន្លប់ភាគច្រើន ដោយសារបរិយាកាសទាំងក្នុង និងក្រៅរោងចក្រមិនល្អ ការប្រើប្រាស់ថ្នាំគីមីផ្សេងៗ ធ្វើការហួសកម្លាំង ការហូបចុកមិនគ្រប់គ្រាន់ ធ្វើការយូរឆ្នាំ និងច្រើនម៉ោងជាដើម។
លោកបន្តថា ដើម្បីទប់ស្កាត់បញ្ហាដួលសន្លប់នេះ រាល់ក្រុមហ៊ុនត្រូវរៀបចំរោងចក្រឲ្យត្រឹមត្រូវតាមស្តង់ដាបច្ចេកទេស ត្រូវផ្តល់ប្រាក់ឈ្នួលសម្រាប់កម្មករដើម្បីចំណាយលើការហូបចុកបានគ្រប់គ្រាន់ ហើយមន្រ្តីអធិការកិច្ចនៃក្រសួងការងារត្រូវពិនិត្យ និងចាត់វិធានការលើក្រុមហ៊ុនទាំងឡាយណាដែលមិនធ្វើតាមបច្ចេកទេស។
របាយការណ៍បេឡាជាតិរបបសន្តិសុខសង្គមឆ្នាំ២០១៧ បង្ហាញថា កម្មការិនី ១១៦០នាក់ បានដួលសន្លប់កាលពីឆ្នាំ២០១៧ ប៉ុន្តែ ថា ចំនួននេះបានធ្លាក់ចុះបើធៀបនឹងតួលេខឆ្នាំ២០១៦ ដែលមានកម្មការិនីដល់ទៅ ១៦០៣នាក់បានដួលសន្លប់។
របាយការណ៍ដដែលនេះបញ្ជាក់ថា ការដួលសន្លប់របស់កម្មការិនី បណ្ដាលមកពីបញ្ហាក្លិនគីមីនៅក្នុងរោងចក្រ ទីតាំងរោងចក្រមិនមានបរិយាកាសល្អ ចង្អៀត ផ្នែកចិត្តសាស្ត្រសង្គម ករណីកម្មករស្លុតដួលតាមគ្នា បញ្ហាមេកានិច ស្របពេលសុខភាពកម្មករមានសភាពទន់ខ្សោយដោយសារការសម្រាកមិនគ្រប់គ្រាន់ ការហូបអាហារមិនទៀងទាត់ និងគ្មានជីវជាតិ៕
