គណបក្សថ្មីមួយ បានរិះគន់ទាំងបក្សកាន់អំណាច និងបក្សប្រឆាំងថា មិនអាចធ្វើការរួមគ្នាដើម្បីជំរុញយន្តការប្រជាធិបតេយ្យបាននោះឡើយ ប៉ុន្តែថា បានធ្វើឲ្យប្រទេសកម្ពុជាវិលទៅរកអតីតកាលទៅវិញ។
ក្នុងអត្ថបទមួយមានចំណងជើងថា «ជ្រោងទង់ប្រជាធិបតេយ្យ» ចេញផ្សាយកាលពីម្សិលមិញ មេដឹកនាំគណបក្សប្រជាធិបតេយ្យមូលដ្ឋានលោក យ៉ង់ សាំងកុមារ និងលោក សាម អ៊ីន បានរៀបរាប់ពីស្នាដៃនានារបស់លោក កឹម សុខា ដែលកំពុងជាប់ឃុំ និងអតីតមេដឹកនាំបក្សប្រឆាំង លោក សម រង្ស៊ី ព្រមទាំងលោកនាយករដ្ឋមន្ត្រី ហ៊ុន សែន ចាប់តាំងពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១។
ប៉ុន្ដែ មេដឹកនាំបក្សថ្មីនេះ ក៏សរសេររិះគន់ថា មេដឹកនាំនយោបាយទាំងបីរូបនេះ មិនអាចធ្វើការរួមគ្នាដើម្បីកសាងប្រព័ន្ធប្រជាធិបតេយ្យល្អមួយសម្រាប់មនុស្សជំនាន់ក្រោយនោះឡើយ ប៉ុន្តែ ពួកគេបែរជាធ្វើនយោបាយបែបប្រឈមមុខដាក់គ្នា និងធ្វើឲ្យដំណើរការប្រជាធិបតេយ្យនៅកម្ពុជាដើរថយក្រោយ បន្ទាប់ពីតុលាការកំពូលរំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេសនៅមុនការបោះឆ្នោតថ្នាក់ជាតិឆ្នាំ២០១៨។
យ៉ាងណាក៏ដោយ គណបក្សមួយនេះជឿជាក់ថា កម្ពុជានៅតែអាចរៀបចំប្រព័ន្ធប្រជាធិបតេយ្យសេរីពហុបក្សឡើងវិញ តាមរយៈការរៀបចំឲ្យមានដំណើរការបោះឆ្នោតមួយមានភាពសេរី និងយុត្ដិធម៌ ការចូលរួមយ៉ាងផុសផុលពីប្រជាពលរដ្ឋ និងការជ្រើសរើសយកគណបក្សមួយ ដែលមានគោលនយោបាយ និងការផែនការដឹកនាំប្រទេសច្បាស់លាស់។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលទស្សនៈយល់ឃើញបែបនេះ ដោយថា រដ្ឋាភិបាលដឹកនាំដោយគណបក្សកាន់អំណាច ធ្វើទៅតាមឆន្ទៈប្រជាពលរដ្ឋ និងច្បាប់កម្ពុជាតែប៉ុណ្ណោះ។
លោកថា៖ «កុំបន្ទោសគណបក្សកាន់អំណាច គណបក្សកាន់អំណាច គឺដឹកនាំប្រទេសតាមឆន្ទៈរបស់ប្រជាពលរដ្ឋ ដែលបោះឆ្នោតគណបក្សប្រជាជនកម្ពុជា ដែលជាគណបក្សឈ្នះឆ្នោតហ្នឹងឯង។ គណបក្សប្រជាជនមានការសោកស្ដាយខ្លាំងណាស់ ដែលគណបក្សប្រឆាំងត្រូវបានរំលាយដោយតុលាការកំពូល ពីព្រោះគណបក្សប្រឆាំងគាត់ប្រព្រឹត្ដបទល្មើសដោយខ្លួនឯង»។
បន្ទាប់ពីតុលាការរំលាយអតីតបក្សប្រឆាំងដ៏ធំនៅមុនការបោះឆ្នោត រដ្ឋាភិបាលរបស់លោក ហ៊ុន សែន បានទទួលរងការថ្កោលទោសជាបន្ដបន្ទាប់ពីសហគមន៍អន្ដរជាតិ ដោយពួកគេថា កម្ពុជាកំពុងឆ្ពោះទៅរករបបផ្ដាច់ការ និងផ្ទុយពីស្មារតីនៃកិច្ចព្រមព្រៀងក្រុងប៉ារីស។
ប៉ុន្តែ រដ្ឋាភិបាលលោក ហ៊ុន សែន បានហៅចំណាត់ការរបស់ខ្លួនថា ធ្វើឡើងតាមច្បាប់កម្ពុជា និងប្រឆាំងបរទេសឈ្លានពាន។
ទោះជាយ៉ាងណា អតីតគណបក្សសង្គ្រោះជាតិ បានថ្កោលទោសចំណាត់ការទាំងនេះថា ធ្វើឡើងក្រោមហេតុផលនយោបាយ និងថា គណបក្សកាន់អំណាចកំពុងភ័យខ្លាចចាញ់ការបោះឆ្នោតខាងមុខប៉ុណ្ណោះ៕
