ប្រមុខរដ្ឋាភិបាលប្រកាសថា កម្ពុជាមិនចាំបាច់បង្កើតឲ្យមានតុលាការការងារនោះទេ ដោយថាកន្លងមកនេះ ភាគីពាក់ព័ន្ធបានដោះស្រាយវិវាទការងារក្នុងវិស័យកាត់ដេរ បានល្អប្រសើរស្ទើរទាំងស្រុងហើយ។
លោកនាយករដ្ឋមន្ត្រី ហ៊ុន សែន ក្នុងពិធីជួបកម្មករ នៅរាជធានីភ្នំពេញនាថ្ងៃពុធនេះ បានថ្លែងថា នៅប៉ុន្មានឆ្នាំមកនេះ វិវាទតិចតួចប៉ុណ្ណោះដែលភាគីពាក់ព័ន្ធមិនទាន់បានដោះស្រាយ។ លោកថា ដូចនេះ ការចង់បង្កើតឲ្យមានតុលាការការងារ ដើម្បីដោះស្រាយវិវាទ លោកថា លែងជាជម្រើសចាំបាច់ហើយ។
លោកថា៖ «យើងមិនមានការចាំបាច់ដើម្បីបង្កើតឡើងតុលាការងារទេ ដោយសារតែយន្តការត្រីភាគី និងបញ្ហានៃបទពិសោធន៍ ការដោះស្រាយរយៈពេលកន្លងទៅ តាមរយៈនៃការសម្របសម្រួលគឺវាគ្រប់គ្រាន់ណាស់ទៅហើយ»។
លោក ហ៊ុន សែន បានថ្លែងទៀតថា ការស្វែងរកដំណោះស្រាយ តាមយន្តការឈ្នះៗ ជាការប្រសើរជាង ការកាត់ក្តី ឲ្យមានអ្នកចាញ់ និងអ្នកឈ្នះ។
លោកថា៖ «បង្កើតតុលាការកាត់ក្តី វាមានអ្នកឈ្នះ និងអ្នកចាញ់ហើយ ដូច្នេះវាត្រូវរកវិធីដោះស្រាយឲ្យបានឈ្នះទាំងអស់គ្នាកុំឲ្យមានអ្នកឈ្នះនិងកុំឲ្យមានអ្នកចាច់អាហ្នឹងល្អបំផុតហើយ។
បើតាមក្រសួងការងារ រោងចក្រសហគ្រាស ដែលបានចុះបញ្ជី មានជាង១០០០ ហើយថា វិស័យកាត់ដេរនេះ បានស្រូបយកកម្លាំងពលកម្ម ប្រមាណជា៨០ម៉ឺននាក់។
ប្រធានសហភាពការងារកម្ពុជា លោក អាត់ ធន់ បានគាំទ្រអនុសាសន៍ របស់នាយករដ្ឋមន្ត្រីនេះ ដោយលោកនិយាយថា ការបង្កើតឲ្យមានតុលាការងារ មិនអាចជួយដោះស្រាយអ្វីបានទេ បើស្ថាប័នបង្កើតថ្មីនេះ ឈរនៅខាងរដ្ឋាភិបាល និងភាគីរោចក្រ ដូចយន្តការដោះស្រាយបច្ចុប្បន្ននោះ ។
លោកថា៖ «បើរដ្ឋាភិបាលលើកទឹកចិត្តឲ្យភាគីចរចា អាហ្នឹងក៏ជាឥទ្ធិពលល្អដែរ ហើយបើដោះស្រាយមិនបានក្រសួងការងារ អ្នកមានឥទ្ធិពល ក្នុងការសម្របសម្រួលឲ្យត្រឹមត្រូវតាមច្បាប់ កុំឲ្យមានភាពអយុត្តិធម៌ ។អាហ្នឹងគឺល្អហើយ។ ហើយបើមានតុលាការការងារក៏កាន់តែល្អដែរ តែបើតុលាការនោះពុករលួយ ឬក៏ដូចតុលាការអាជ្ញាគតិបច្ចុប្បន្ន ក៏វាគ្មានន័យស្អីដែរ»។
លោក អាត់ ធន់ បន្តថា ការដោះស្រាយវិវាទដែលផ្តល់យុត្តិធម៌ដល់កម្មករនោះ គឺរដ្ឋាភិបាលត្រូវចាត់វិធានការមន្ត្រីខិលខូចមួយចំនួន ដែលកាងរោងចក្រ រារាំងដល់ចលនាសហជីពជំរុញលក្ខខណ្ឌការងារ។
ទោះជាយ៉ាងណាអ្នកតាមដានអះអាងថា ក្រោយពីតុលាការកំពូលរំលាយគណបក្សប្រឆាំងដ៏ធំនៅកម្ពុជា និងបន្តឃុំខ្លួន លោក កឹម សុខា ក្នុងពន្ធនាគារនោះ កម្មករក្នុងវិស័យកាត់ដេរត្រូវបាន រដ្ឋាភិបាលយកចិត្តទុកដាក់ជាងមុន។
ដូចជាប្រកាសពីសេវាថែទំាងសុខភាព និងព្យាបាលជំងឺ ដោយមិនចាំបាច់ឲ្យបង់ថ្លៃ ផ្តល់លុយសុទ្ធដល់ស្តី្រឆ្លងទន្លេ ជំរុញឲ្យអ្នកមានផ្ទៃពោះចេញមុនម៉ោង ដំឡើងប្រាក់ឈ្នួល ពី១៥៣ ដល់១៧០ដុល្លារ បញ្ចុះតម្លៃទឹកភ្លើង និងជិះរថយន្តក្រុង មិនចាំបាច់ទិញសំបុត្រជាដើម៕
