រដ្ឋមន្ត្រីក្រសួងសាធារណៈការ និងដឹកជញ្ជូនកម្ពុជា លោក ស៊ុន ចាន់ថុល បានស្នើទៅភាគីវៀតណាម ឲ្យពិចារណាលើការអភិវឌ្ឍន៍ផ្លូវដែកពីទីក្រុងបាវិត ភ្ជាប់ទៅទីក្រុងហូជីមិញ ដោយថា ដើម្បីជួយសម្រួលដល់ការដឹកជញ្ជូនទំនិញរវាងប្រទេសទាំងពីរឲ្យកាន់តែប្រសើរឡើង។
ទំព័រហេ្វសប៊ុករបស់ក្រសួងសាធារណៈការ និងដឹកជញ្ជូន បានឲ្យដឹងថា លោក ស៊ុន ចាន់ថុល បានជួបជុំជាមួយអនុរដ្ឋមន្រ្តីក្រសួងដឹកជញ្ជូនវៀតណាម លោក Nguyen Nhat កាលពីថ្ងៃទី៦ ខែកុម្ភៈនេះ។
បើតាមទំព័រហ្វេសប៊ុកដដែលនេះ ក្នុងជំនួបនោះ លោក ស៊ុន ចាន់ថុល ស្នើទៅភាគីវៀតណាមឲ្យធ្វើពិចារណាទៅលើការអភិវឌ្ឍន៍ផ្លូវដែកពីក្រុងបាវិត និងទីក្រុងហូជីមិញ ហើយការអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងផ្លូវដែកនេះ លោកថា ប្រទេសវៀតណាម និងកម្ពុជាអាចសហការគ្នាដើម្បីធ្វើឱ្យប្រសើរឡើងដល់ការតភ្ជាប់រវាងប្រទេសទាំងពីរ។
អ្នកនាំពាក្យក្រសួងសាធារណៈការ និងដឹកជញ្ជូន លោក ចាន់ សំឡេង បន្ថែមថា ការដឹកជញ្ជូនឆ្លងកាត់ព្រំដែនរវាងប្រទេសទាំងពីរ នឹងកាន់តែងាយស្រួល និងកាត់បន្ថយការខូចខាតផ្លូវផងដែរ ប្រសិនបើផ្លូវដែកកម្ពុជា-វៀតណាម ត្រូវបានតភ្ជាប់នោះ។
លោកថា៖«សំខាន់បំផុតការដឹកជញ្ជូនទំនិញ រវាងប្រទេសទាំងពីរ បច្ចុប្បន្ននេះ យើងប្រើតែឡាន ប្រើឡានផ្លូវខូចច្រើន ដឹកអត់មានភាពប្រាកដប្រជា ដូចរថភ្លើង ព្រោះរថភ្លើងមានភាពប្រាកដប្រជាជាង»។
ប៉ុន្តែ អ្នកនាំពាក្យរូបនេះ បានឲ្យដឹងថា ភាគីវៀតណាម ពុំទាន់បានឆ្លើយតបយ៉ាងណានោះទេ ជុំវិញសំណើរបស់កម្ពុជា។
អំឡុងជំនួបក្រៅវេទិកាមេគង្គ-ឡានឆាងលើកទី២ នៅទីក្រុងភ្នំពេញ កាលពីខែមករាកន្លងមក នាយករដ្ឋមន្ត្រីវៀតណាម ង្វៀន ស៊ុនហ្វុកបានប្រាប់លោកនាយករដ្ឋមន្ត្រីកម្ពុជា ហ៊ុន សែន ថា ទំហំពាណិជ្ជកម្មទ្វេភាគី បានមានទំហំរហូតដល់ ៣ ៨០០លានដុល្លារអាមេរិក ដោយបានកើនឡើង ២៥ភាគរយ បើប្រៀបធៀបទៅនឹងឆ្នាំមុន៕