អ្នកតាមដានមួយចំនួន រិះគន់ថា ការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤នេះ បានងាកចេញពីគន្លងប្រជាធិបតេយ្យ ដោយថា ម្ចាស់ឆ្នោតជិតពាក់កណ្តាលប្រទេស គាំទ្រគណបក្សប្រឆាំង ត្រូវបានគេផាត់ចោល។
គ.ជ.ប បានបង្ហាញរបាយការណ៍បឋមថា គណបក្សប្រជាជនកម្ពុជា អាចបានអាសនៈទាំងអស់ ក្នុងស្ថាប័នព្រឹទ្ធសភា ចំនួន៥៨ដែលកើតចេញពីការបោះឆ្នោតអសកល។
ការដែលគណបក្សកាន់អំណាច ដណ្តើមបានអាសនៈទាំងអស់នៅស្ថាប័នព្រឹទ្ធសភានេះ ចំពេលគណបក្សសង្គ្រោះជាតិ ដែលមានអ្នកគាំទ្រជិតពាក់កណ្តាលប្រទេស គ្មានឈ្មោះចូលរួមប្រកួត ប្រជែង ដោយសារតុលាការកំពូល រំលាយគណបក្សនេះ មុនការបោះឆ្នោតមកដល់។
មន្ត្រីអង្កេតនៅអង្គការឃ្លាំមើលការបោះឆ្នោតខុមហ្វ្រែល លោក កន សាវាង្ស លើកឡើងថា បើស្ថាប័នច្បាប់មួយ មានមន្ត្រីតែមួយគណបក្សគ្រប់គ្រងទាំងអស់ដូចអាណត្តិនេះ លោកថា កិច្ចការក្នុងស្ថាប័ននេះ នឹងលែងមានសំឡេងជំទាស់ ហើយថាគណបក្សមួយនឹងដឹកនាំតាមរបៀបជិះសេះលែងដៃ។
លោកថា៖«ការបោះឆ្នោតព្រឹទ្ធសភានេះបើសិនជាគណបក្ស[សង្គ្រោះជាតិ]មិនត្រូវបានរំលាយទេ យើងឃើញថា បក្សប្រឆាំងបាន២៥អាសនៈ គណបក្សកាន់អំណាចបាន៣៣អាសនៈ។ អញ្ចឹងលទ្ធិប្រជាធិបតេយ្យ ក្នុងដំណើរការនេះមានការល្អណាស់សម្រាប់ធ្វើការឆែកជាមួយគ្នា។ប៉ុន្តែក្រោយពីការសម្រេច [រំលាយ] អញ្ចឹងមកយើងឃើញថា សំឡេងហាក់ដូចជាមានការខ្វះ នូវការសម្រេចចិត្តខាងមុខ»។
អ្នកវិភាគនយោបាយ លោកបណ្ឌិត មាស នី វិភាគថា របត់នយោបាយថ្មីៗនេះ បានជំរុញឲ្យការរៀបចំការបោះឆ្នោត ធ្វើតាមឆន្ទៈនយោបាយ ផ្ទុយពីស្មារតីរដ្ឋធម្មនុញ្ញ ដោយថាពលរដ្ឋជិតពាក់កណ្តាលប្រទេស ត្រូវបានគេមើលរំលង។
លោក មាស នី វិភាគថា ការរៀបចំការបោះឆ្នោតបែបនេះ ធ្វើឲ្យអ្នកនយោបាយខ្លះដែលពលរដ្ឋបោះឆ្នោតគាំទ្រ ត្រូវគេផាត់ចេញពីទីលានប្រកួត ចំណែកអ្នកនយោបាយខ្លះដែលម្ចាស់ឆ្នោតមិនគាំទ្រ បែជាមានមុខមកអង្គុយនៅស្ថាប័នច្បាប់នេះទៅវិញ។
លោកថា៖«ក្នុងសភាយើងឥឡូវនេះមិនមែនសភាពេញលក្ខណដូចមានចែងក្នុងរដ្ឋធម្មនុញ្ញនោះទេ បើយើងនិយាយឲ្យមែនទែនទៅ។ ព្រោះអីសភាក្នុងរដ្ឋធម្មនុញ្ញ គឺសភាហ្នឹងជាតំណាងរបស់រាស្ត្រ ដែលរាស្ត្របោះឆ្នោតឲ្យ អញ្ចឹងចំនួនប៉ុន្មានជិតពាក់កណ្តាលនោះ មិនមែនជាសភាដែលពលរដ្ឋ ជ្រើសរើសទេ គឺជាការចាត់តាំង របស់បក្សអាហ្នឹងជាបញ្ហា១ នៅក្នុងរដ្ឋសភា។ ហើយបើយើងមកមើលក្រុមប្រឹក្សាឃុំ ក្រោយពីការបែងចែកអាសនៈហើយនេះក៏យើងឃើញថា គណបក្សកាន់អំណាចបានយកនូវតំណែងភាគច្រើននៃក្រុមប្រឹក្សាឃុំ [របស់បក្សប្រឆាំង]។ អញ្ចឹងទៅតំណែងក្រុមប្រឹក្សាឃុំហ្នឹង [មកបោះឆ្នោតព្រឹទ្ធសភា] វាធ្វើឲ្យមិនសមស្របកាន់តែខ្លាំងជាងរដ្ឋសភាទៀត»។
ប្រធានក្រុមអ្នកវិភាគវ័យក្មេង លោក ហង្ស វិទូ លើកឡើងថា ដំណើរការបោះឆ្នោតមួយ ព្យាយាមទាត់ចោលឆន្ទៈពលរដ្ឋជិតពាក់កណ្តាលប្រទេសលោកថា មិនមែនជាការរៀបចំការបោះឆ្នោតបែបប្រជាធិបតេយ្យ។
លោកថា៖«ដរាបណាការបោះឆ្នោតគ្មានតម្លាភាព វាធ្វើឲ្យការអនុម័តច្បាប់ហើយនឹងការគិតគូពីរឿងច្បាប់ហ្នឹង គឺថាមិនអាចធ្វើឲ្យសង្គមហ្នឹងមានតម្លាភាព»។
ប៉ុន្តែ មេដឹកនាំបក្សកាន់អំណាច លោក ហ៊ុន សែន បានសរសេរលើគេហទំព័រហ្វេសប៊ុក របស់លោកនៅថ្ងៃនេះ អរគុណសមាជិកសមាជិការគណបក្ស និងប្រជាពលរដ្ឋ ទូទាំងប្រទេស ដែលលោកថា តែងតែគាំទ្រ និងបោះឆ្នោតឲ្យគណបក្សប្រជាជន ជារៀងរហូតមក ដើម្បីដឹកនាំកសាង និងអភិវឌ្ឍន៍ប្រទេសជាតិឲ្យកាន់តែរីកចម្រើន។
ទោះជាយ៉ាងណា របត់នយោបាយនៅកម្ពុជា ត្រូវបានប្រទេសលោកសេរី មានសហរដ្ឋអាមេរិក និងសហភាពអឺរ៉ុបផងនោះ កំពុងដាក់សម្ពាធ ឲ្យស្តារប្រជាធិបតេយ្យឡើងវិញ តាមរយៈគំរាមលុបចោលប្រព័ន្ធអនុគ្រោះពន្ធ សម្រាប់ទំនាក់ទំនងពាណិជ្ជកម្ម និងដាក់ទណ្ឌកម្មសេដ្ឋកិច្ច៕