ប្រមុខរដ្ឋាភិបាល បានប្រកាសផ្តល់ប្រាក់ជាង ៤លានដុល្លា ដើម្បីដោះស្រាយបញ្ហាកម្មករ បន្ទាប់ពីថៅកែរត់ចោលដោយមិនបានទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗ។
លោកនាយករដ្ឋមន្ត្រី ហ៊ុន សែន បញ្ជាផ្ទាល់មាត់កាលពីថ្ងៃទី២១កុម្ភៈ ទៅក្រសួងពាក់ព័ន្ធឲ្យចុះដោះស្រាយបន្ទាន់បញ្ហាកម្មករដែលថៅកែរត់ចោល ដោយថា មិនត្រូវទុកបញ្ហានេះជាជំងឺរាំរ៉ៃនោះទេ។
ក្នុងពិធីជួបសំណេះសំណាលជាមួយកម្មករនៅថ្ងៃទី២៨កុម្ភៈនេះ លោកនាយករដ្ឋមន្រ្តី ហ៊ុន សែន បាន រំឮកទៅក្រសួងពាក់ព័ន្ធជាថ្មីទៀត ឲ្យដោះស្រាយបញ្ហាកម្មករដែលត្រូវថៅកែរត់ចោល ក្នុងនោះលោកបានប្រកាសផ្តល់ថិវកាប្រមាណ ៤លាន ៦សែនដុល្លារដើម្បីទូទាត់សំណងជូនកម្មករ ៤១០០នាក់។
លោកបន្ថែមថា៖ «ឥលូវធ្វើម៉េចឲ្យលុយហ្នឹងបានទៅដល់កម្មករ-កម្មការនីដែលអត់ការងារធ្វើ ដែលថៅកែរត់ចោល ហើយក្រៅពីនោះ ឆ្លៀតពេលហ្នឹង រកការងារឲ្យក្មួយៗបានធ្វើឡើងវិញ អាហ្នឹងជាការខិតខំដោះស្រាយបញ្ហា។ កន្លងទៅ ក្រសួងខិតខំសម្រួលថា ធ្វើម៉េចឲ្យថៅកែ ឥលូវហ្នឹងយើងដោះស្រាយជាមួយពួកថៅកែហ្នឹងក្រោយ។ យើងចាប់ផ្តើមយកប្រាក់នេះបើកភ្លាម បើកចប់ទេអាទិត្យហ្នឹងទេមើលទៅ? ព្រោះនេះជាតម្រូវការ គ្នាធ្វើការព្រោះថៅកែរត់ចោលបាត់ទៅ។ ចំនួនកម្មករ៤១០០នាក់»។
ប្រធានសហភាពចលនាកម្មករកម្ពុជា លោក ប៉ាវ ស៊ីណា កាលពីសប្ដាហ៍មុន បានសាទរចំពោះយន្តការដោះស្រាយរដ្ឋាភិបាលនេះ ប៉ុន្តែ លោកក៏បានស្នើទៅរដ្ឋាភិបាលឲ្យមានវិធានការផ្លូវច្បាប់ចំពោះថៅកែទាំងឡាយណាដែលបិទទ្វាររត់ចោលអត់ទូទាត់លុយជូនកម្មករ និងត្រូវបង្កើតយន្តថ្មីមួយទៀត ដើម្បីដោះស្រាយបញ្ហាចំពោះមុខជូនកម្មករពេលថៅកែរត់ចោលនោះផងដែរ ដោយថា កំឡុងពេលរងចាំដំណោះស្រាយនោះ គឺកម្មករជួបផលលំបាកច្រើន។
កាលពីម្សិលមិញកម្មករនៅរោងចក្រ២ក្នុងចំណោមរោងចក្រជាច្រើនទៀត ដែលថៅកែរត់ចោល បានរាយការណ៍ប្រាប់វីអូឌីថា រោងចក្រ អ៊ីហ្វា ហ្គាមេន និងរោងចក្រ ជីឡុង មិនទាន់ទទួលបានសំណងទេ បើទោះជា លោកនាយករដ្ឋមន្រ្តីបញ្ជាទៅមន្រ្តីក្រោមឱវាទឲ្យចុះដោះស្រាយបន្ទាន់ក៏ដោយ។
កម្មករបម្រើការងារនៅរោងចក្រ អ៊ីហ្វា ហ្គាមេន អ្នកស្រី ហ៊ន សុខឃាង និយាថា ការពន្យាពេលនេះបានធ្វើឲ្យ កម្មករជួបផលលំបាកច្រើន ដូចជា គ្មានលុយបង់ថ្លៃទឹកភ្លើង បន្ទាប់ជួល និងការចាយវាយប្រចាំថ្ងៃជាដើម។
អ្នកស្រីបន្ថែមថា«សម្តេចគាត់ស្រែកប៉ុណ្ណឹងហើយ សូមឲ្យថ្នាក់នាំក្រោមៗស្តាប់គាត់ផង ហើយធ្វើការតាម បញ្ជាគាត់ផង ចុះមកដោះស្រាយឆាប់ៗមក ព្រោះកម្មករលំបាក អត់បានទៅរកការងារធ្វើទៀតទេ ដោយកម្មករនៅតែបន្តដេកយាមរោងចក្រ ហើយកម្មករចង់បានតែប្រាក់ចុងក្រោយទេ ម្នាក់ៗ២០០ជាងហ្នឹង»។
ក្រុមកម្មករ-កម្មការនី នៅរោងចក្រ ២ ក្នុងចំណោមរោងចក្រ ៤ ដែលថៅកែរត់ ចោលបានអះអាងថា ពួកគេសម្រេចលក់សម្ភារៈក្រុមហ៊ុនឡៃឡុងដើម្បីទូទាត់សំណង ខណៈរោងចក្រផ្សេងទៀតបន្តដេកយាមមុខរោងចក្រដើម្បីរងចាំដំណោះស្រាយតាមប្រសាសន៍ លោក ហ៊ុន សែន។
កាលពីដើមកុម្ភៈកម្មករប្រហែល២ពាន់នាក់នៃរោងចក្រ៤ ស្ថិតក្នុងខណ្ឌពោធិ៍សែនជ័យដែលមានថៅកែជាជនជាតិចិនតែម្នាក់នោះ បានផ្ទុះការតវ៉ាដោយដេកយាមមុខរោងចក្រតាំងពីថ្ងៃទី៨ ខែកុម្ភៈរហូតមកដល់ថ្ងៃនេះ បន្ទាប់ពីថៅកែបិទទ្វារត់ចោលដោយមិនបើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនពួកគេ។
ក្រៅពីរោងចក្រទាំង៤នេះ គឺមានរោងចក្រ Benoh Apparel ស្ថិតក្នុងខណ្ឌមានជ័យ ក៏ថៅកែរត់ចោលអត់បើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករដែរ ខណៈរោងចក្រ ហ្វឹស ហ្គាវ័ន្តនៅសង្កាត់ចាក់អង្រែលើ និងរោងចក្រ ហ្គាវ័ន្ត នៅក្រុងតាខ្មៅ ត្រូវកម្មករដេករោងចក្ររយៈពេលជាង ២ខែហើយរហូតមកថ្ងៃនេះ ដោយសារឃើញថៅកែលួចដឹកឥវ៉ានចេញ៕