អតីតមដឹកនាំបក្សប្រឆាំង លោក សម រង្ស៊ី បានហៅវិធានការតុលាការរឹបអូសផ្ទះសម្បែង ឬទីស្នាក់ការអតីតបក្សសង្គ្រោះជាតិថា ត្រូវបានធ្វើឡើងក្រោមហេតុផលនយោបាយរបស់បក្សកាន់អំណាច។
សាលាដំបូងរាជធានីភ្នំពេញបានចេញដីកាកាលពីថ្ងៃចន្ទកន្លងមកនេះ ឲ្យរឹបអូសទ្រព្យសម្បត្តិរបស់លោក សម រង្ស៊ី យកទៅដាក់លក់ឡៃឡុង ដើម្បីទូទាត់សំណងជំងឺចិត្តដល់ប្រធានរដ្ឋសភា លោក ហេង សំរិន និងលោកនាយករដ្ឋមន្ត្រី ហ៊ុន សែន បន្ទាប់ពីអតីតមេបក្សប្រឆាំងរូបនេះ ត្រូវបានតុលាការសម្រេចឲ្យចាញ់ក្ដីនៅក្នុងសំណុំរឿងបរិហាកេរ្តិ៍។
ជាប្រតិកម្មតប លោក សម រង្ស៊ី ដែលកំពុងរស់នៅនិរទេសខ្លួនឯងនៅឯបរទេសនោះ បានសរសេររៀបរាប់នៅលើទំព័រហ្វេសប៊ុករបស់លោកកាលពីថ្ងៃម្សិលមិញថា លោកមិនភ្ញាក់ផ្អើលនឹងសេចក្ដីសម្រេចបែបនេះរបស់តុលាការកម្ពុជានោះឡើយ។
មិនត្រឹមតែមិនបង្ហាញការភ្ញាក់ផ្អើលទេ លោក សម រង្ស៊ី បានហៅវិធានការបែបនេះរបស់សាលាដំបូងរាជធានីភ្នំពេញថា ជាផ្នែកមួយនៃសំណុំរឿងនយោបាយ ដែលត្រូវបានរៀបចំឡើងដើម្បីធ្វើទុក្ខបុកម្នេញលើរូបលោក ខណៈដែលលោកអះអាងថា លោកចេញមុខខ្លាំងជាងគេប្រឆាំងនឹងអំណាចផ្ដាច់ការ និងអំពើពុករលួយនៅកម្ពុជាអស់រយៈពេល ២៥ឆ្នាំមកហើយ។
លោកសរសេរថា៖ «ខ្ញុំមិនខ្វល់ពីតុលាការអាយ៉ងរបស់លោក ហ៊ុន សែន និងគណបក្សគាត់ រឹបអូសទ្រព្យសម្បត្តិខ្ញុំទេ ពីព្រោះទង្វើបែបនេះ វាមិនប៉ះពាល់ដល់ជីវភាពរស់នៅ និងកម្លាំងចិត្តតស៊ូរបស់ខ្ញុំឡើយ ពីព្រោះ ខ្ញុំមិនដែលមានចិត្តសម្ភារៈនិយម ហើយទ្រព្យសម្បត្តិ លុយកាក់ និងបុណ្យសក្តិ មិនមែនជាអ្វីដែលខ្ញុំស្វែងរកទេ ក្នុងការតស៊ូរបស់ខ្ញុំ រយៈពេល ២៥ឆ្នាំកន្លងមកនេះ»។
ផ្ទុយទៅវិញ អតីតមេបក្សប្រឆាំងរូបនេះលើកឡើងថា លោកខ្វល់ខ្វាយទៅនឹងការរឹបអូសទ្រព្យសម្បត្តិ ដីធ្លី និងផ្ទះសម្បែងរបស់ប្រជារាស្ត្រស្លូតត្រង់ និងក្រីក្រទៅវិញ។
បន្ទាប់អតីតមេបក្សប្រឆាំងរូបនេះ បានបង្ហាញប្រតិកម្មបែបនេះ លោកនាយករដ្ឋមន្ត្រី ហ៊ុន សែន នៅក្នុងពិធីសំណេះសំណាលជាមួយក្រុមកម្មករនៅព្រឹកថ្ងៃនេះ បានថ្លែងបែបឌឺដងទំនងសំដៅទៅលោក សម រង្ស៊ី ថា អ្នកជេរលោក នឹងទទួលបានលទ្ធផលដូចអតីតមេដឹកនាំផ្ដាច់ការនៃរបបខ្មែរក្រហម។
លោកថ្លែងបែបនេះថា៖«គេថា ទម្លាក់ ហ៊ុន សែន រំលាយ ហ៊ុន សែន ប៉ុន្តែ ចាំតែងាយងាប់តើ! អ្នកដែលជេរខ្ញុំខ្លាំងបំផុត ស្អប់ខ្ញុំធំបំផុត ប៉ុល ពត ប៉ុន្តែ ទីចុងបំផុត លទ្ធផលរបស់មេដឹកនាំ ប៉ុល ពត ទាំងអស់ ប៉ុល ពត ខ្លួនឯង ងាប់រកដីកប់មិនបាន។ ស៊ុន សេន និងក្រុមគ្រួសារ ងាប់តៃហោង ដោយសារ ប៉ុល ពត សម្លាប់ ឯអ្នកដទៃទៀត ក៏ត្រូវទទួលជោគវាសនា លទ្ធផលនៃការជេរប្រទេច ហ៊ុន សែន»។
អ្នកស្រាវជ្រាវពីការអភិវឌ្ឍសង្គម លោក មាស នី យល់ថា ដំណាក់កាលនេះ អ្នកនយោបាយខ្មែរទាំងអស់មិនគួរយករឿងឯកជនរបស់ខ្លួន ទៅឈ្លោះគ្នាបែបនេះទេ ដោយថា អាចធ្វើជាគំរូអាក្រក់ដល់កូនខ្មែរជំនាន់ក្រោយ។
លោកមានប្រសាន៍ថា៖«ពលរដ្ឋទូទៅយល់ថា ការឈ្លោះគ្នាដូចរាល់ថ្ងៃនេះ វាអត់បានចំណេញអីសម្រាប់អ្នកដឹកនាំខ្លួនឯងដែរ គ្រាន់តែផ្តល់គំរូ ដែលវាពិបាកសម្រាប់យុវជនជំនាន់ក្រោយ ក្នុងការយកតម្រាប់តាម បើមេដឹកនាំនៅតែឈ្លោះគ្នា ចងពារគ្នាមិនចេះចប់មិនចេះហើយ»។
លោក សម រង្ស៊ី បាននិរទេសដោយខ្លួនឯងកាលពីចុងឆ្នាំ២០១៥ បន្ទាប់ពីលោករងបណ្ដឹងជាច្រើនពីមេដឹកនាំគណបក្សប្រជាជនកម្ពុជា ដែលក្នុងនោះរាប់ទាំងបណ្តឹងរបស់ប្រធានរដ្ឋសភា លោក ហេង សំរិន ដែលប្តឹងពីបទបរិហារកេរ្តិ៍ជាសាធារណៈ និងបណ្តឹងលោក ហ៊ុន សែន ដែលប្តឹងក្នុងបទចោទដូចគ្នានេះ។
មេដឹកនាំបក្សកាន់អំណាចទាំងពីររូបនេះ បានប្ដឹងទៅតុលាការរាជធានីភ្នំពេញ ដោយបានទាមទារសំណងជំងឺចិត្តសរុបរហូតដល់ជាង ១លានដុល្លារអាមេរិក៕
