សមាជិកសហជីពមួយរូបបម្រើការងារនៅក្រុមហ៊ុនកាស៊ីណូ ហ្គ្រែន ដាយអឺម៉ន ស៊ីធី នៅក្រុងប៉ោយប៉ែត កំពុងប្រឈមទៅនឹងការបញ្ឈប់ពីការងារ ក្រោយពីរាយការណ៍លក្ខខណ្ឌការងារក្នុងក្រុមហ៊ុនប្រាប់អ្នកសារព័ត៌មានវីអូឌី។
កាលពីថ្ងៃទី១៣ ខែកុម្ភៈ សមាជិកសម្ព័ន្ធសហជីពចលនាកម្មករកម្ពុជា លោក អ៊ុំ ឆាយយ៉ា ត្រូវបានថៅកែក្រុមហ៊ុនសម្រេចព្យួការងារមួយរយៈ បន្ទាប់ពីសមាជិកសជីពរូបនេះ បានប្រាប់សារព័ត៌មានវីអូឌីជុំវិញបញ្ហាលក្ខខណ្ឌការងារមួយចំនួនក្នុងក្រុមហ៊ុនកាស៊ីណូ ហ្គ្រែន ដាយអឺម៉ន ស៊ីធី ដែលសហជីពចោទថា កំពុងអនុវត្តលក្ខខណ្ឌការងារផ្ទុយពីច្បាប់។
ក្នុងលិខិតព្យួការងារចុះថ្ងៃទី២៧ ខែកុម្ភៈ តំណាងក្រុមហ៊ុនកាស៊ីណូ ហ្គ្រែន ដាយអឺម៉ន ស៊ីធី លោកស្រី ឌួង ផន លើកឡើងថា ការរាយការណ៍លក្ខខណ្ឌការងាររបស់លោក អ៊ុំ ឆាយយ៉ា ទៅសារព័ត៌មាននោះ ជារឿងមិនពិត ល្មើសនឹងបទបញ្ជាផ្ទៃក្នុង និងប៉ះពាល់ដល់កេរិ៍្តឈ្មោះរបស់ក្រុមហ៊ុន។
ក្នុងលិខិតដដែលនោះ លោកស្រី ឌួង ផន បានចាត់ទុកករណីនេះថា មានកំហុសធ្ងន់ធ្ងរ និងរង់ចាំការសម្រេចបញ្ឈប់ពីសំណាក់អធិការកិច្ចការងារ។
ប្រធានមន្ទីរការងារខេត្តបន្ទាយមានជ័យ លោក រស់ សារុំ មានប្រសាសន៍ថា មន្ទីរការងារខេត្ត ទទួលបានលិខិតពីតំណាងក្រុមហ៊ុនផង និងតំណាងសហជីពផង ដើម្បីសុំអន្តរាគមន៍ដោះស្រាយវិវាទនេះ។
លោក រស់ សារុំ បន្តថា នៅពេលនេះ មន្ទីរការងារមិនទាន់អាចសម្រេចយ៉ាងណាងនោះទេ ដោយថា មន្រ្តីកំពុងពិនិត្យលើផ្លូវច្បាប់ ប៉ុន្តែថា អ្វីដែលមន្ទីរចង់បាននោះគឺ ចង់ឲ្យភាគីទាំងពីរត្រូវគ្នាវិញ។
លោកបន្ថែមថា៖«យើងសួរថា សម្រេចយ៉ាងណា ខ្ញុំអត់ទាន់និយាយកើតទេអាហ្នឹង ព្រោះ វាជានីតិវិធីនៃច្បាប់។ អញ្ចឹង ពេលចូលដល់ដៃអធិការកិច្ច អធិការមិនអាចថា ក្រុមហ៊ុនយ៉ាងម៉េច ឬខាងសហជីពយ៉ាងម៉េចទេ។ អញ្ចឹង ទុកឲ្យក្រុមអធិការកិច្ចការងាររបស់ខ្ញុំ ជាអ្នកធ្វើការងារដោះស្រាយសិន ព្រោះយើងចង់បានការសម្របសម្រួលកណ្តាលមួយ ឲ្យមានការសះជារវាងនាយកក្រុមហ៊ុន និងអង្គការសហជីព»។
វិអូឌីមិនអាចសុំការឆ្លើយបំភ្លឺពីប្រធានសហភាពចលនាកម្មករកម្ពុជា លោក ប៉ាវ ស៊ីណា បានទេជុំវិញវិវាទនេះ ដែលក្រុមហ៊ុនកាស៊ីណូគ្រោងបញ្ឈប់សមាជិកសហជីពរបស់ខ្លួនពីការងារនេះ។
ប៉ុន្តែ កាលពីថ្ងៃទី១៤ ខែកុម្ភៈ លោក ប៉ាវ ស៊ីណា សរសេរលើទំព័រហ្វេសប៊ុកថា ករណីក្រុមហ៊ុនព្យួរការងារសហជីពនេះ គឺធ្វើឡើងទាំងកម្រោល និងខុសច្បាប់ស្តីពីការងារ ហើយថា បច្ចុប្បន្នក្រុមហ៊ុននេះ កំពុងស្ថិតក្នុងបណ្តឹងរបស់សហជីពពាក់ព័ន្ធរឿងមិនអនុវត្តច្បាប់ការងារនេះផងដែរ។
ប្រធានកម្មវិធីចងក្រងនៅមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) អ្នកស្រី ឆន សុខា បានថ្លែងប្រាប់វីអូឌីកាលពីថ្ងៃទី១៤កុម្ភៈថា សហជីព ឬកម្មករ មានសិទ្ធិរាយការណ៍ទៅគ្រប់ភាគីពាក់ព័ន្ធនូវបញ្ហាលក្ខខណ្ឌការងាររបស់ពួកគេ ប្រសិនក្រុមហ៊ុននោះអនុវត្តផ្ទុយច្បាប់ការងារ។ ប៉ុន្តែ អ្នកស្រីថា កម្មករ ឬសហជីពមិនអាចរាយការណ៍ព័ត៌មានសម្ងាត់របស់ក្រុមហ៊ុនបានឡើយ។
កាលពីថ្ងៃទី១២កុម្ភៈ សហជីពបានចោទក្រុមហ៊ុនកាស៊ីណូ ២ នៅក្រុងប៉ោយប៉ែត គឺក្រុមហ៊ុនកាស៊ីណូហ្គ្រែន ដាយអឺម៉ន ស៊ីធី និងក្រុមហ៊ុន កាស៊ីណូ DNA Star អនុវត្តលក្ខខណ្ឌការងារផ្ទុយពីច្បាប់ការងារ។
កាលនោះ សហជីពបាន ស្នើទៅមន្ទីរការងារខេត្តបន្ទាយមានជ័យ ឲ្យចុះពិនិត្យមើលអំពីស្ថានភាពលក្ខខណ្ឌការងារនៅក្រុមហ៊ុនកាស៊ីណូទាំងពីរនោះ និងបណ្តាក្រុមហ៊ុនផ្សេងៗទៀត ដែលកំពុងដំណើរការក្នុងខេត្តនេះ ឲ្យអនុវត្តច្បាប់បានត្រឹមត្រូវ៕