មេធាវីការពារក្ដីលោក កឹម សុខា បានឲ្យដឹងថា តុលាការកំពូលនឹងបើកសវនាការលើបណ្ដឹងសុំនៅក្រៅឃុំមេដឹកនាំបក្សប្រឆាំងរូបនេះ នៅសប្ដាហ៍ក្រោយនេះ។
លោកស្រី ម៉េង សុភារី សហមេធាវីការពារក្ដីឲ្យលោក កឹម សុខា បានប្រាប់វីអូឌីនៅថ្ងៃនេះថា តុលាការកំពូលនឹងបើកសវនាការលើបណ្ដឹងសុំនៅក្រៅឃុំរបស់មេដឹកនាំអតីតបក្សប្រឆាំងរូបនេះ នៅព្រឹកថ្ងៃទី៩ ខែមីនា។
លោកស្រីបន្ថែមថា ក្រុមមេធាវីនឹងទៅចូលរួមសវនាការនៅតុលាការកំពូលខាងមុខនេះ ដើម្បីសុំចៅក្រមអនុញ្ញាតឲ្យកូនក្ដីបាននៅក្រៅឃុំ និងបានទៅព្យាបាលជំងឺ ខណៈដែលលោកស្រីថា បញ្ហាសុខភាពលោក កឹម សុខា កាន់តែទ្រុឌទ្រោមជាងមុន។
លោកស្រីថា៖ «ពិតណាស់ ពួកយើងខ្ញុំនឹងទៅចូលរួម ពីព្រោះអីការសុំនៅក្រៅឃុំសំខាន់ ដោយសារ មូលហេតុនៃការសុំនៅក្រៅឃុំ ព្រោះបញ្ហាសុខភាពហ្នឹងជាចម្បងតែម្ដង។ ដោយសារ រឿងសុខភាពរបស់គាត់ កូនក្ដីរបស់យើងខ្ញុំ ក៏ទទូចស្នើសុំឲ្យតុលាការធ្វើការអនុញ្ញាតឲ្យគាត់បាននៅក្រៅឃុំ ដើម្បីគាត់បានទៅព្យាបាលជំងឺ»។
បើតាមមេធាវីលោក កឹម សុខា លើកឡើងថា កន្លងមកពួកគាត់បានស្នើសុំឲ្យតុលាការកំពូល បើកសវនាការពេលរសៀលវិញ បន្ទាប់ពីមានសំណើរបស់កូនក្ដី ប៉ុន្តែ មិនមានការឆ្លើយតបឡើយ។
លោក កឹម សុខា ត្រូវបានសមត្ថកិច្ចចាប់ខ្លួននៅក្នុងផ្ទះរបស់លោកកាលពីរំលងអធ្រាត្រថ្ងៃទី៣ ខែកញ្ញា ឆ្នាំ២០១៧ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕