មេដឹកនាំគណបក្សសិទ្ធិមនុស្ស បានឲ្យដឹងថា គណបក្សនេះសម្រេចរំលាយខ្លួនឯងឈប់ដំណើរការអ្វីទៀតហើយ បើទោះជាក្រសួងមហាផ្ទៃ មិនព្រមឲ្យរំលាយក៏ដោយ។
គណបក្សសិទ្ធិមនុស្ស បានប្រកាសរំលាយខ្លួនឯង តាមលិខិតមួយច្បាប់ ដែលបានផ្ញើជូនទៅរដ្ឋមន្ត្រីមហាផ្ទៃ លោក ស ខេង កាលពីថ្ងៃទី២៨ ខែមករា តែត្រូវបានក្រសួងបដិសេធ ដោយតម្រូវឲ្យធ្វើសមាជដោយមានសំឡេងគាំទ្រភាគច្រើន២/៣ នៃសមាជិករបស់អង្គសមាជទាំងមូលតាមលក្ខន្តិកៈរបស់គណបក្ស។
ទោះជាបែបនេះក្តី ប្រធានគណបក្សសិទ្ធិមនុស្ស លោក សឺន ស៊ូបែរ្តិ៍ បានប្រាប់VODនៅថ្ងៃទី០២ ខែមីនា នេះថា គណបក្សរបស់លោកមិនអាចធ្វើតាមការទាមទាររបស់ក្រសួងមហាផ្ទៃបានទេ ដោយលោកថា មន្ត្រីគណបក្សសិទ្ធិមនុស្សបានច្របាច់បញ្ជូលគ្នាជាមួយគណបក្សសម រង្ស៊ី កាលពីឆ្នាំ២០១២ ដើម្បីបង្កើតគណបក្សសង្គ្រោះជាតិ ហើយពេលនេះ គណបក្សសង្គ្រោះជាតិត្រូវរំលាយហើយ។
ករណីនេះ លោកថា មិនមានសមាជិកបក្ស ដើម្បីធ្វើសមាជឲ្យបានសំឡេង២/៣ នៃសមាជិកអង្គសមាជទាំងមូល តាមការចង់បានរបស់ក្រសួងនោះទេ។
លោកនិយាយថា «យើងសម្រេចចឹងហើយ យើងពន្យល់គេ[ក្រសួងមហាផ្ទៃ]សព្វគ្រប់ទៅហើយ យើងសរសេរសំបុត្រទៅគេរួចហើយថាយើងចប់ហើយ»។
អ្នកនាំពាក្យក្រសួងមហាផ្ទៃលោក ខៀវ សុភ័គ បានបញ្ជាក់ថា ក្រសួងមិនចាប់អារម្មណ៍និងការសម្រេចរបស់មេដឹកនាំបក្សសិទ្ធិមនុស្ស ដែលសម្រេចរំលាយដោយខ្លួនឯងនោះទេ ដោយថា ជាសិទ្ធិរបស់មេដឹកនាំបក្សនោះ។ លោកមិនបញ្ជាក់ថា តើករណីនេះអាចប្រឈមផ្លូវច្បាប់ឬអត់ទេ។
គណបក្សសិទ្ធិមនុស្ស ត្រូវបានបង្កើតឡើងដោយលោក កឹម សុខា នៅឆ្នាំ២០០៧ ហើយឈ្នះបានអាសនៈចំនួន ៣នៅក្នុងការបោះឆ្នោតជាតិឆ្នាំ២០០៨។ គណបក្សនេះ ត្រូវបានច្របាច់បញ្ចូលគ្នាជាមួយគណបក្ស សម រង្ស៊ី ទៅជាគណបក្សសង្គ្រោះជាតិ នៅក្នុងឆ្នាំ២០១២។
ទោះជាយ៉ាងណា ការប្រកាសរំលាយខ្លួនឯងរបស់បក្សនេះ បានកើតឡើងចំពេលដែលគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងរបស់រដ្ឋាភិបាល ហើយអាសនៈជាប់ឆ្នោតទាំងអស់របស់បក្សនេះ ក៏ត្រូវបានដកហូត និងបែងចែកទៅឲ្យគណបក្សនយោបាយផ្សេង ដែលមិនទទួលបានសំឡេងគាំទ្រពីប្រជាពលរដ្ឋ និងដកសិទ្ធិអតីតមន្ត្រីបក្សនេះ១១៨រូប មិនឲ្យធ្វើនយោបាយរយៈពេល៥ឆ្នាំផងដែរ៕