លោកនាយករដ្ឋមន្ត្រី ហ៊ុន សែន បានថ្លែងថា លោកកំពុងឲ្យអ្នកជំនាញសិក្សាពីមេដឹកនាំមួយចំនួន ដែលប្រព្រឹត្តឧក្រិដ្ឋកម្មនានាជុំវិញពិភពលោក ដោយថាដើម្បីប្រៀបធៀបនឹងរឿងដែលកើតឡើងក្នុងរបបដឹកនាំរបស់លោកជាង៣០កន្លងទៅនេះ។
ក្នុងពិធីមួយនៅក្នុងខេត្តកំពង់ចាម កាលពីម្សិលមិញលោក ហ៊ុន សែន បានបញ្ជាឲ្យលោក សុខ ទូច ប្រធានរាជបណ្ឌិតសភាកម្ពុជា និង បណ្ឌិតមួយរូបទៀត ឲ្យស្រាវជ្រាវពីឧក្រិដ្ឋកម្មពាក់ព័ន្ធមេដឹកនាំផ្សេងៗកំពុងស្ថិតនៅក្នុងតំណែង។
លោកថ្លែងថា«អំពីកិច្ចកការបរទេស គេចាត់វិធានការទៅលើថៃយ៉ាងម៉េច? គេចាត់វិធានការជាមួយមីយ៉ាន់ម៉ាយ៉ាងម៉េច? និងបន្តទៅគេនឹងចាត់វិធានការជាមួយ ឌូដឺតេ យ៉ាងម៉េច នៅហ្វីលីពីន ដើម្បីយើងយកទៅប្រៀបធៀបជាមួយនឹងអ្វីដែលបានកើតសម្រាប់ប្រទេសកម្ពុជា បន្ទាប់ពីការសិក្សាស្រាវជ្រាវរបស់បណ្ឌិត កែវ គឹមហឿន នៅមានការសិក្សាមួយទៀតរបស់បណ្ឌិតសភាចារ្យ សុខ ទូច»។
ប្រទេសដែលតុលាការឧក្រិដ្ឋកម្មអន្តរជាតិ (ICC) ទទួលបានបណ្តឹងពាក់ព័ន្ធការរំលោភសិទ្ធិមនុស្ស និងសម្លាប់មនុស្ស រួមមាន ប្រទេសថៃ មីយ៉ាន់ម៉ា និងហ្វីលីពីន ខណៈកម្ពុជាក៏ត្រូវបានមេធាវីអន្តរជាតិប្តឹងលោក ហ៊ុន សែន ជុំវិញការរំលោភសិទ្ធិមនុស្ស និងការសម្លាប់ក្រុមបាតុករផងដែរ។
អ្នកវិភាគនយោបាយលោក ឡៅ ម៉ុងហៃ វិភាគថា ដើមចមដែលនាំឲ្យលោក ហ៊ុន សែន បញ្ជាឲ្យមន្ត្រីជំនាញសិក្សាពីមេដឹកនាំដែលប្រព្រឹត្តឧក្រិដ្ឋកម្មនានាជុំវិញពិភពលោក ដើម្បីប្រៀបធៀបជាមួយការដឹកនាំរបស់លោកនៅកម្ពុជាជាង៣០ឆ្នាំនេះ ទំនងជាចង់បង្ហាញទៅសាធារណៈជាតិ និងអន្តរជាតិថា ការដឹកនាំរបស់លោក ហ៊ុន សែន នាពេលបច្ចុប្បន្ននេះល្អជាងប្រទេសដទៃទៀត។
លោកវិភាគថា«ខ្ញុំយល់ថាប្រហែលជាសំរាប់ប្រៀបធៀបច្រើនជាង ហើយដើម្បីបង្ហាញថា សកម្មភាពទង្វើរបស់លោក[ហ៊ុន សែន]ដូចជា មិនមែនអាក្រក់ជាងទង្វើឬសកម្មភាពរបស់មេដឹកនាំនៅក្នុងប្រទេសទាំងប៉ុន្មានដែលលោករៀបរាប់នោះទេ»។
ចាប់តាំងពីប្រធានាធិបតីហ្វីលីពីន លោក ឌូទើតេ ឡើងកាន់អំណាចតាមរយៈការបោះឆ្នោត កាលពីចុងខែមិថុនា ឆ្នាំ២០១៦ មនុស្សជាង៨០០០នាក់ ត្រូវបានសម្លាប់ពាក់ព័ន្ធបទល្មើសគ្រឿងញៀន។ នៅថ្ងៃទី៨ ខែកុម្ភៈ ឆ្នាំ២០១៨នេះ រដ្ឋអាជ្ញាតុលាការ ឧក្រិដ្ឋកម្មអន្តរជាតិ ICC លោកស្រីហ្វាទូ បេនស៊ូដា (Fatou Bensouda) បានប្រកាសបើកការពិនិត្យវិនិច្ឆ័យជាបឋម នៅក្នុងសង្គ្រាមប្រឆាំងគ្រឿងញៀន ដោយថាប្រធាធិបតីរូបនោះ បានប្រព្រឹត្តឧក្រិដ្ឋកម្មប្រឆាំងមនុស្សជាតិ រំលោភសិទ្ធិមនុស្សធ្ងន់ធ្ងរ។
នៅប្រទេសថៃចាប់តាំងពីរដ្ឋប្រហារខែឧសភាឆ្នាំ២០១៤មក មានការចោទថា លោក ប្រាយុទ្ធ ចាន់អូចា ប្រើអំណាចបង្ក្រាបលើអ្នកការពារសិទ្ធិមនុស្ស បង្ក្រាបប្រព័ន្ធផ្សព្វផ្សាយ និង ក្រុមដែលមាននិន្នាការប្រឆាំង។ នៅប្រទេសមីយ៉ាន់ កំពុងតែមានការថ្កោលទោសថា ពួកយោធាបានធ្វើសកម្មភាពឃោរឃៅសម្លាប់ផ្តាច់ពូជជនជាតិភាគតិចរ៉ូហ៊ីងយ៉ា។
រីឯកម្ពុជាវិញ មេធាវីអន្តរជាតិ គឺលោក មូរតុន ក្លារ និងលោក រីឆាត រ៉ូជើរ បានដាក់បណ្ដឹងម្នាក់មួយ កាលពីឆ្នាំ២០១៤ ដោយប្តឹងលោក ហ៊ុន សែន ពីបទឧក្រិដ្ឋប្រឆាំងមនុស្សជាតិ ដោយសារការជ្រៀតជ្រែកកិច្ចការសាលាក្ដីខ្មែរក្រហម ការធ្វើទុក្ខបុកម្នេញលើមន្ត្រីគណបក្សប្រឆាំង ការបំផ្លាញធនធានធម្មជាតិ និងរឹបអូសដីធ្លី និងបង្ខំបណ្តេញប្រជាពលរដ្ឋពីលំនៅឋាន នឹងការសម្លាប់រង្គាលទៅលើហ្វូងអ្នកបាតុករលើផ្លូវវេងស្រេង កាលពីឆ្នាំ២០១៣ ។ក្រោយមកទៀត នៅខែវិច្ឆិកា ឆ្នាំ២០១៧ មេធាវីទាំងនោះបានដាក់ប្តឹងបន្ថែមមួយករណីទៀត ជុំវិញការធ្វើទុក្ខបុកម្នេញមន្ត្រីអង្គការសង្គមស៊ីវិល អ្នកសារព័ត៌មាន ការបាញ់សម្លាប់លោក កែម ឡី និងការរំលាយគណបក្សសង្គ្រោះជាតិជាដើម។ ប៉ុន្តែមន្ត្រីជាន់ខ្ពស់រដ្ឋាភិបាលច្រានចោលការចោទប្រកាន់នេះ ដោយថាកម្ពុជាអនុវត្តតាមច្បាប់៕