លោកនាយករដ្ឋមន្ត្រី ហ៊ុន សែន ព្រមានអន្តរជាតិ កុំរៀបចំកម្មវិធីឲ្យលោក ជួបលោក សម រង្ស៊ី និងគូកន ជជែកពីបញ្ហានយោបាយនៅកម្ពុជា ដោយថា អ្នកទាំងនោះពាក់ព័ន្ធទោសក្បត់ជាតិ។
លោក ហ៊ុន សែន ថ្លែងបែបនេះក្នុងពិធីសម្ពោធសមិទ្ធផលនានានៅក្នុងវត្តឈូកវ៉ា ខណ្ឌសែនសុខ រាជធានីភ្នំពេញ នាព្រឹកថ្ងៃនេះថា លោកនឹងធ្វើដំណើរទៅប្រទេសអូស្ត្រាលី ដើម្បីប្រជុំអាស៊ាន-អូស្ត្រាលីនៅថ្ងៃទី១៥ ខែមីនានេះ ។
ករណីនេះលោក ហ៊ុន សែន សង្កត់ធ្ងន់ថា ដើម្បីឲ្យមានទំនាក់ទំនងល្អជាមួយគ្នា បរទេសកុំរៀបចំឲ្យលោក ជួបលោក សម រង្ស៊ី និងគូកន ជជែកគ្នាពីនយោបាយនៅកម្ពុជា ពីព្រោះអ្នកនយោបាយបក្សប្រឆាំង១១៨រូបពាក់ព័ន្ធទោសក្បត់ជាតិ ខណៈលោក សម រង្ស៊ី បង្ហើបថា ចង់ជួបចរចាជាមួយលោក ហ៊ុន សែន។
លោកព្រមានថា «ខ្ញុំសុំផ្តាំផ្ញើទៅមិត្តភក្តិបរទេស ដែលមានចេតនាណាមួយរៀបចំឲ្យមានការសន្ទនាជាមួយក្រុមក្បត់ជាតិ ខ្ញុំនឹងមិនធ្វើទេ សុំកុំមកនិយាយជាមួយខ្ញុំ ហើយខ្ញុំមិនទទួលនៅការសន្ទនាជាមួយជនបរទេសណាក៏ដោយដែលប៉ុនប៉ងមកធ្វើទាក់ទាញខ្ញុំឲ្យមានការចរចាជាមួយក្រុមនេះ[អតីតមេដឹកនាំសង្គ្រោះជាតិ] បក្សនយោបាយច្រើនណាស់ ដែលបាននឹងកំពុងពង្រឹងខ្លូន ហើយកំពុងបង្កើតថ្មីៗ គេចូលរួមប្រកួតប្រជែងបោះឆ្នោតថ្ងៃទី២៩ ខែកក្កដា ឆ្នាំ២០១៨ខាងមុខ»។
លើសពីនេះទៀត លោក ហ៊ុន សែន បានថ្លែងបញ្ជាក់ថា លោកមិនចង់មានកិច្ចព្រមព្រៀងទីក្រុងប៉ារីស ជាលើកទីពីរនោះទេ។
ភ្លាមៗVOD មិនអាចសុំការបំភ្លឺជុំវិញករណីនេះ ពីលោក សម រង្ស៊ី បានទេ។
ប៉ុន្តែនៅលើហ្វេសប៊ុកលោក សម រង្ស៊ី បានបង្ហោះកាលពីម្សិលមិញ ឲ្យដឹងថា លោកត្រៀមខ្លួនជានិច្ច ដើម្បីជួបសន្ទនាជាមួយលោក ហ៊ុន សែន ដើម្បីរកដំណោះស្រាយជូនប្រទេសកម្ពុជា ប៉ុន្តែលោកបញ្ជាក់ថា ត្រូវតែមានការធានាពីអន្តរជាតិ។
ហ្វេសប៊ុកមានខ្លឹមសារថា «ខ្ញុំត្រៀមខ្លួនជានិច្ច ជួបសន្ទនាជាមួយរដ្ឋាភិបាល ហ៊ុន សែន ដើម្បីស្វែងរកដំណោះស្រាយមួយដោយសន្តិវិធី ចំពោះវិបត្តិដែលមិនដែលមានដូចសព្វថ្ងៃ តែជាដំណោះស្រាយមួយ ដែលភាគីទាំងពីរអាចទទួលយកបាន ហើយដែលមានការធានាពីអន្តរជាតិផងដែរ»។
ប្រធានក្រុមអ្នកវិភាគវ័យក្មេង លោក ហង្ស វិទូ វិភាគថា បើអ្នកនយោបាយខ្មែររួបរួមគ្នាផ្សះផ្សារជាតិ នឹងធ្វើឲ្យមានការគាំទ្រពីអន្តរជាតិទទួលបាលជំនួយ និងធ្វើឲ្យប្រទេសជាតិរីកចំរើន ហើយអ្នកទទួលបានប្រយោជន៍ ប្រជាពលរដ្ឋម្ចាស់ឆ្នោត។
ប៉ុន្តែលោក វិទូ បញ្ជាក់ថា បើអ្នកនយោបាយនៅតែបន្តឈ្លោះគ្នាតាមពាក្យសម្តីវាយប្រហារគ្នាដូចសព្វថ្ងៃនេះ នឹងធ្វើឲ្យប៉ះពាល់ដល់ប្រទេសជាតិ និងមុខមាត់រដ្ឋាភិបាលកម្ពុជា។
លោកវិភាគថា «ការជំរុញនេះមិនមែនត្រឹមតែសង្គ្រោះជាតិទេ អន្តរជាតិក៏គេជំរុញដែរ ប្រសិនជាសម្តេច ឬក៏គណបក្សប្រជាជនកម្ពុជាគាត់មានរឹងត្អឹង ឬគាត់មិនព្រមបើកផ្លូវចរចា វានឹងក្លាយទៅជាសម្ពាធមួយ សម្រាប់គណបក្សប្រជាជនកម្ពុជា និងរដ្ឋាភិបាលកាន់តែខ្លាំងៗទៅ វាជះឥទ្ធិពលដល់មុខមាត់ប្រទេសជាតិទាំងមូលទៀត ប្រសិនជារដ្ឋាភិបាលមិនព្រមគិតឲ្យបានវែងឆ្ងាយផលអាក្រក់និងប៉ះពាល់ដល់គណបក្សប្រជាជនកម្ពុជាខ្លួនឯងទៅវិញទេ»។
គណបក្សសង្គ្រោះជាតិ ដែលទទួលបានសំឡេងគាំទ្រប្រហែល ៣លាននាក់ កាលពីបោះឆ្នោតថ្នាក់ជាតិឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកាកន្លងទៅ ហើយមន្ដ្រីអតីតគណបក្សប្រឆាំងចំនួន ១១៨រូប ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ។ រីឯប្រធានគណបក្សនេះ គឺលោក កឹម សុខា ក៏នៅតែជាប់ក្នុងពន្ធនាគារ ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ខណៈមន្ដ្រីជាន់ខ្ពស់មួយចំនួនរបស់បក្សប្រឆាំងមួយនេះ បានចាកចេញ និងធ្វើសកម្មភាពតវ៉ា ឬតស៊ូមតិនៅឯក្រៅប្រទេស៕
