ចៅក្រមនិងព្រះរាជអាជ្ញាសាលាដំបូងរាជធានីភ្នំពេញនៅថ្ងៃចន្ទនេះ បានធ្វើដំណើរទៅពន្ធនាគារត្រពាំងផ្លុង ដើម្បីសួរដេញដោល លោក កឹម សុខា ថាត្រូវពន្យារការឃុំខ្លួន ឬក៏បញ្ឈប់ការឃុំខ្លួន។
បើតាមមេធាវីការពារក្ដីឲ្យលោក កឹម សុខា គឺលោក ចាន់ ចេនឲ្យដឹងថា ចៅក្រមស៊ើបសួរលោក គី ឫទ្ធី និងលោក សៀង សុខ ព្រះរាជអាជ្ញារងសាលាដំបូងរាជធានីភ្នំពេញ ធ្វើដំណើរទៅកាន់ពន្ធនាគារត្រពាំងផ្លុង ក្នុងខេត្តត្បូងឃ្មុំជិតព្រំប្រទល់វៀតណាមដើម្បីសាកសួរលោក កឹម សុខា។ លោក ចាន់ ចេង បន្តថា ដំណើរការសាកសួរនេះ ក៏មានវត្តមានក្រុមមេធាវីការពារក្តីដែរ។
លោក កឹម សុខា ត្រូវបានអាជ្ញាធរចាប់ខ្លួននិងបញ្ជូនទៅឃុំនៅក្នុងពន្ធនាគារត្រពាំងផ្លុងកាលពីថ្ងៃទី៣ កញ្ញា ឆ្នាំ២០១៧ ដោយចោទពីបទក្បត់ជាតិ ហើយគិតមកដល់ពេលនេះ លោក កឹម សុខា បានជាប់ពន្ធនាគារជាង៦ខែហើយ៕