អតីតប្រធានគណបក្សសង្គ្រោះជាតិដែលកំពុងជាប់ឃុំ ស្នើឲ្យចៅក្រមរៀបចំសវនាការនៅពេលរសៀល ដើម្បីជៀសវាងការនាំខ្លួនលោកចេញពីពន្ធនាការទាំងយប់ដូចមុនទៀតដោយថា ពេលនេះសុខភាពលោកកំពុងចុះខ្សោយខ្លាំង។
សហមេធាវីការពារក្តីឲ្យលោក កឹម សុខា គឺលោក ផែង ហេង បានឲ្យដឹងនៅថ្ងៃនេះថា កូនក្តីរបស់លោកស្នើឡើងបែបនេះ ដោយសារតែបញ្ហាសុខភាពចុះលោកចុះខ្សោយ ហើយពេលធ្វើដំណើរទាំងយប់ ដោយមិនបានសម្រាកនោះកាន់តែធ្វើទុក្ខខ្លាំងថែមទៀត។
លោក ផែង ហេង បន្តថា រូបលោករួមជាមួយមេធាវីផ្សេងទៀត បានដាក់សំណើនេះទៅតុលាការកំពូលហើយ ប៉ុន្តែរហូតដល់ពេលនេះ មិនទាន់មានការឆ្លើយតបយ៉ាងណានៅឡើយទេ។
ការស្នើរបស់លោក កឹម សុខា នៅពេលនេះ គឺបន្ទាប់ពីតុលាការកំពូលកំណត់ថ្ងៃទី៩ខែមីនា ខាងមុខនេះ ដើម្បីបើកសវនាការសម្រេចលើបណ្តឹងសុំនៅក្រៅឃុំរបស់លោក។
ពាក់ព័ន្ធរឿងនេះ វីអូឌីមិនអាចសុំការឆ្លើយតបពីអ្នកនាំពាក្យតុលាការកំពូល លោក នៅ មុនីជោគ បានទេ។ ប៉ុន្តែអ្នក នាំពាក្យក្រសួងយុត្តិធម៌លោក គឹម សន្តិភាព ចាត់ទុកការស្នើនោះជាសិទ្ធិរបស់មេធាវី ប៉ុន្តែចំពោះការកំណត់ពេលវេលា គឺអាស្រ័យលើតុលាការ។
លោកថា៖ «ខ្ញុំសូមជម្រាបថា ជាគោលការណ៍ការស្នើសុំរបស់ភាគីអាហ្នឹង ជាសិទ្ធិរបស់ភាគី ក៏ប៉ុន្តែការពិចារណា ការសម្រេចក៏ជាសិទ្ធិរបស់តុលាការដែរ ខ្ញុំសូមឆ្លើយប៉ុណ្ណឹង»។
កាលពីថ្ងៃទី១ខែកុម្ភៈ សាលាឧទ្ធរណ៍បានបើកសវនាការសុំនៅក្រៅឃុំលើសំណុំរឿងនេះ ហើយសមត្ថកិច្ចបាននាំខ្លួនលោក កឹម សុខា ចេញពីពន្ធនាគារត្រពាំងផ្លុងតាំងពីរម៉ោង២យប់ធ្វើដំណើរមកកាន់ភ្នំពេញ។ ក្រុមមេធាវីថ្លែងថា ការធ្វើដំណើរទាំងយប់នេះ ធ្វើឲ្យជំងឺទឹកនោមផ្អែម និងជំគៀបសរសៃរបស់លោក កឹម សុខា ធ្វើទុក្ខកាន់តែខ្លាំង៕