លោកនាយករដ្ឋមន្ត្រី ហ៊ុន សែន នឹងដឹកនាំមន្ត្រីជាន់ខ្ពស់មួយចំនួន ទៅចូលរួមកិច្ចប្រជុំកំពូលអាស៊ាន នៅប្រទេសអូស្ត្រាលី ដែលគ្រោងធ្វើនៅចុងសប្តាហ៍នេះ ទោះបីពលរដ្ឋខ្មែរមួយចំនួននៅទីនោះ ព្រមានធ្វើបាតុកម្មប្រឆាំងវត្តមានលោកក៏ដោយ។
សមាគមន៍ខ្មែរមួយចំនួននៅអូស្ត្រាលី បានអះអាងតាមបណ្តាញសង្គមថា ពួកគេនឹងប្រមូលផ្តុំគ្នាលើកបដា ពាក្យស្លោក និងរូបភាពផ្សេងៗ ប្រឆាំងនឹងវត្តមានលោក ហ៊ុន សែន អំឡុងកិច្ចប្រជុំនោះ ជំរុញឲ្យអន្តរជាតិដាក់សម្ពាធទៅរដ្ឋាភិបាលលោក ហ៊ុន សែន ឲ្យស្តាលទ្ធិប្រជាធិបតេយ្យឡើងវិញ។
ប៉ុន្តែ លោក ហ៊ុន សែន ក្នុងពិធីសម្ពោធស្ពាននៅខេត្តកំពង់ចាម កាលពីម្សិលមិញ បានប្រកាសថា នៅរសៀលថ្ងៃព្រហស្បតិ៍នេះ លោក និងក្រុមការងារ នឹងធ្វើដំណើរទៅប្រទេសអូស្ត្រាលី តាមការគ្រោងទុក ដើម្បីទៅចូលរួមកិច្ចប្រជុំ ដែលគ្រោងធ្វើនៅថ្ងៃទី១៧ និង១៨ ខែមិនានេះ។
ទោះជាយ៉ាងណា លោក ហ៊ុន សែន បានព្រមានទុកជាមុនថា បើបាតុករណាហ៊ានធ្វើទីងមោងរូបលោក ហើយដុតនោះ លោកថា នឹងតាមវាយអ្នកនោះដល់ផ្ទះ។
ប៉ុន្តែ តំណាងអ្នកតវ៉ាអះអាងថា ការព្រមាននេះហាក់បានជំរុញលើកទឹកចិត្តអ្នកចូលរួមធ្វើបាតុកម្មកាន់តែច្រើន ឲ្យពួកគេចង់ធ្វើរូបទីងមោងលោក ហ៊ុន សែន នេះដុតទៅវិញ៕