សាលាឧទ្ធរណ៍នៅព្រឹកថ្ងៃសុក្រនេះ បានបើកសវនាការលើសំណុំរឿងវាយអតីតតំណាងរាស្ត្របក្សប្រឆាំង ២ រូប ប៉ុន្តែត្រូវបានលើកពេលទៅថ្ងៃក្រោយវិញតាមសំណើរមេធាវី។
ការលើកពេលនេះ បន្ទាប់ពីមេធាវីការពារក្ដីឲ្យអតីតតំណាងរាស្ត្រគណបក្សសង្គ្រោះជាតិ លោក គង់ សភា និងលោក ញ៉យ ចំរើន បានស្នើឡើងក្នុងពេលសវនាការ ដោយសំអាងថា ក្រុមមេធាវីមិនបានទទួលលិខិត អញ្ជើញពីសាលាឧទ្ធរណ៍ឲ្យចូលរួមសនាការនៅថ្ងៃនេះ។
ក្រោយស្តាប់សំណើប្រធានក្រុមប្រឹក្សាជំនុំជម្រះនៃសាលាឧទ្ធរណ៍បានប្រកាសលើកពេលសវនាការទៅថ្ងៃក្រោយវិញ។
មេធាវីការពារក្ដីឲ្យលោក គង់ សភា និងលោក ញ៉យ ចំរើន គឺ លោក សំ សុគង់ ប្រាប់អ្នកសារព័ត៌មាន នៅព្រឹកនេះថា សាលាឧទ្ធរណ៍ចេញដីកាកោះហៅកូនក្ដីមានរយៈពេលខ្លី ហើយក្រុមមេធាវីក៏មិនបានទទួលលិខិតអញ្ជើញពីតុលាការឲ្យចូលរួមសវនាការនាថ្ងៃនេះដែរ។
លោកថា៖«ក្រុមមេធាវីការពារក្ដីបានទទួលដីកាកោះហៅកូនក្ដីមានរយៈពេលខ្លីពេកប្រហែលជា៣ – ៤ថ្ងៃ មុនទេ។ ទី២ ខាងសាលាឧទ្ធរណ៍មិនបានធ្វើលិខិតអញ្ជើញក្រុមមេធាវីការពារក្ដីឲ្យឯឧត្ដមទាំង២នាក់ហ្នឹង ចូលរួមសវនាការ ដោយសារ មិនបានកោះហៅហ្នឹង ធ្វើឲ្យមេធាវីមិនមានពេលក្នុងការសិក្សាសំណុំរឿង មិនមានពេលជួបពិគ្រោះយោបល់ជាមួយកូនក្ដី ដោយសារ កូនក្ដីគាត់នៅក្រៅប្រទេសផងដែរ»។
កាលពីថ្ងៃទី២៧ខែឧសភាឆ្នាំ២០១៦ សាលាដំបូងរាជធានីភ្នំពេញបានផ្តន្ទាទោសបុរស៣នាក់ ពាក់ព័ន្ធនិងការវាយលើតំណាងរាស្ត្រគណបក្សសង្គ្រោះជាតិឲ្យជាប់ពន្ធនាការ ម្នាក់ៗ៤ឆ្នាំ តែអនុវត្តទោសត្រឹម ១ ឆ្នាំ ចោទពីបទ «ហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតដោយចេតនា» អ្នកទាំង ៣ នាក់នោះ មានឈ្មោះ ចាយ សារិទ្ធ, ម៉ៅ ហឿន និង សុក វណ្ណនី ។
បុរស ៣ នាក់ ដែលវាយអតីតតំណាងរាស្ត្របក្សប្រឆាំងនៅច្រកចេញចូលខាងត្បូងនៃវិមានរដ្ឋសភាកាលពីឆ្នាំ២០១៥ ត្រូវបានគេស្គាល់ថា ជាអង្គរក្សលោកនាយករដ្ឋមន្ត្រី ហ៊ុន សែន។
