អាជ្ញាធរបានបកស្រាយខុសគ្នា ពាក់ព័ន្ធនិងការមិននាំខ្លួនលោក កឹម សុខា មកចូលរួមសវនាការកាលពីម្សិលមិញ ខណៈ តុលាការ អះអាងថា ខ្លួនបានចេញដីកាកោះឲ្យនាំខ្លួនលោក កឹម សុខាតាមនីវិធីច្បាប់រួចហើយ។
កាលពីម្សិលមិញ សាលាឧទ្ធរណ៍ បានបើកសវនាការលើបណ្តឹងប្រឆាំងនឹងការសម្រេចពន្យារពេលឃុំខ្លួនរបស់មេធាវីការពារក្ដី ឲ្យលោក កឹម សុខា ប៉ុន្តែសវនាការនោះមិនមានវត្តមានលោក កឹម សុខា ចូលរួមឡើយ។
អ្នកនាំពាក្យសាលាឧទ្ធរណ៍លោក ទូច ថារិទ្ធិ ប្រាប់វីអូឌីនៅថ្ងៃនេះថា អគ្គព្រះរាជអាជ្ញាបានចេញដីកាកោះឲ្យមន្ត្រីពន្ធនាគារ នាំខ្លួនលោក កឹម សុខា ពីពន្ធនាគារត្រពាំងផ្លុង(ម៣) មកកាន់ចូលរួមសវនាការនៅថ្ងៃទី២៧ ខែមីនា រួចហើយ។ លោកបន្តថា សាលាឧទ្ធរណ៍ក៏មិនបានដឹងពីមូលហេតុដែលមន្ត្រីពន្ធនាគារមិននាំខ្លួនលោក កឹម សុខា មកដែរ។
លោកថា៖«ចេញដីកាតាមនីតិវិធីអស់ហើយ ដែលចៅក្រមគាត់ចេញឲ្យដើម្បីចូលរួមនៅក្នុងសវនាការក៏ប៉ុន្តែអវត្តមានរបស់គាត់ អាហ្នឹងជារឿងរបស់ខាងអគ្គនាយកដ្ឋានពន្ធនាគារក្នុងការដឹកជញ្ជូនមក»។
ទោះជាយ៉ាងណាប្រធានពន្ធនាគារត្រពាំងផ្លុងខេត្តត្បួងឃ្មុំ លោក ភិន យ៉ាន មានប្រសាសន៍ថា លោកមិនបានទទួលដីកាកោះពី សាលាឧទ្ធរណ៍ដើម្បីនាំខ្លួនលោក កឹម សុខា ទៅចូលរួមសវនាការនោះទេ ហើយខាងពន្ធនាគារក៏មិនបានដឹកលោក កឹម សុខា ចេញពីពន្ធនាគារដែរ។
លោកថា៖«ទាល់តែជួបជាមួយអ្នកនាំពាក្យរបស់អគ្គ [អគ្គនាយកដ្ឋានពន្ធនាគារនៃក្រសួងមហាផ្ទៃ] ព្រោះខ្ញុំអត់ បានទទួលឯកសារផង»។
លោក សំ សុគង់ សហមេធាវីការពារក្ដីឲ្យលោក កឹម សុខា មានប្រសាសន៍ថា គិតមកដល់ថ្ងៃនេះ ក្រុមមេធាវីនៅមិនទាន់ដឹងពី មូលហេតុដែលឆ្មាំពន្ធនាគារមិនបញ្ជូនកូនក្ដីរបស់លោកមក ចូលរួមសវនាការនៅឡើយទេ។ លោកបន្តថា ការមិននាំខ្លួនកូនក្ដី មកនេះ ក្រុមមេធាវីក៏បានសួរទៅប្រធានក្រុមប្រឹក្សាជំនុំជម្រះនៅពេលសវនាការដែរ ប៉ុន្តែចៅក្រមឆ្លើយថា ក៏មិនបានដឹងពី រឿងនេះទេ។
លោកថា៖«ពុំមានវត្តមានអាហ្នឹងជាការងាររបស់ក្រុមសមត្ថកិច្ច អាហ្នឹងតាមការលើកឡើងរបស់ក្រុមប្រឹក្សាជំនុំជម្រះ ក៏ដូចជាតំណាងមហាអយ្យការសាលាឧទ្ធរណ៍…។ ក្រុមមេធាវីនឹងរៀបចំគម្រោងទៅជួបឯកឧត្ដម កឹម សុខា នៅក្នុងពន្ធនា គារត្រពាំងផ្លុង ដើម្បីយើងពិគ្រោះ យោបល់ផ្នែកច្បាប់ ហើយហ្នឹងជូនព័ត៌មានអំពីលទ្ធផលសវនាការថ្ងៃទី២៧ ខែមីនាឆ្នាំ២០១៨ នេះ ហើយយើងនឹងរៀបចំបណ្ដឹង សាទុក្ខ ទាក់ទងសាលដីកាម្សិលមិញផងដែរ អញ្ចឹងយើងនឹងទៅជួបគាត់ហើយសួរ ពីបញ្ហា[មិននាំខ្លួនកូនក្ដី]ហ្នឹងដែរ»។
អ្នកនាំពាក្យអគ្គនាយកនៃអគ្គនាយដ្ឋានពន្ធនាគារក្រសួងមហាផ្ទៃ លោក សន កែវ មានប្រសាសនថា លោកមិនបានដឹងរឿងនេះច្បាស់ ដោយលោកបង្វែរសំណួរនេះឲ្យសួរលោក ប៉េ សៀឡេង អគ្គនាយករងនៃអគ្គដ្ឋានពន្ធនាគារវិញ។
លោកថា៖«ខ្ញុំសូមអធ្យាស្រ័យជាមុន ដោយសារ ម្សិលមិញខ្ញុំម្សិលខ្ញុំអត់បាននៅ កន្លែងធ្វើការខ្ញុំជាប់ប្រជុំនៅខាងក្រៅ ២ ថ្ងៃ ពេញហើយ និយាយឲ្យខ្លីខ្ញុំក្ដាប់អត់បានផង រឿងហ្នឹង អត់ដឹងថាត្រូវមានសវនាការរឿងផង អញ្ចឹងទេ ប្រហែលជាខ្ញុំបង្វែរឲ្យទៅសួរជំនាញផ្ទាល់តែម្ដងទៅណាស់គាត់ទទួលជំនាញផ្ទាល់អញ្ចឹងតេទៅគាត់»។
ប៉ុន្តែលោក ប៉េ សៀឡេង លើកឡើងថា លោក មិនដឹងរឿងនេះទេ។ លោកថា៖«រឿងហ្នឹង ខ្ញុំក្ដាប់អត់បានទាក់ទងទៅឯកឧត្ដម សន កែវ សូមអរគុណ សុំទោសបាទ»។
ក្រុមមេធាវីការពារក្ដីឲ្យមេដឹកនាំអតីតបក្សប្រឆាំងរូបនេះ បានស្នើជាច្រើនដង ឲ្យតុលាការដោះលែងឲ្យកូនក្តីនៅក្រៅឃុំ ប៉ុន្ដែ ត្រូវបានតុលាការបដិសេធរហូត បើទោះបីជាក្រុមមេធាវីអះអាងថា កូនក្ដីរបស់ពួកគេកំពុងមានបញ្ហាសុខភាព និងត្រូវការការព្យាបាលក៏ដោយ។
នៅថ្ងៃទី៥ ខែមីនា ឆ្នាំ២០១៨ ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី បានសម្រេចឲ្យបន្តឃុំខ្លួនលោក កឹម សុខា ៦ ខែបន្តទៀត ក្រោយលោកត្រូវបានជាប់ឃុំរយៈពេលជាង ៦ខែមកហើយនោះ ចាប់តាំងពីថ្ងៃទី០៣ខែកញ្ញាឆ្នាំមុន។
លោក កឹម សុខា ត្រូវបានរដ្ឋាភិបាលចោទថា «ក្បត់ជាតិ» និង «ឃុបឃិត»ជាមួយបរទេស ក្នុងបំណងផ្ដួលរំលំរដ្ឋាភិបាលស្របច្បាប់ ប៉ុន្តែ គណបក្សសង្គ្រោះជាតិ បានបដិសេធចំពោះការចោទប្រកាន់នេះ៕