នាយករដ្ឋមន្ត្រី អំពាវនាវទៅម្ចាស់រថយន្តឈ្នួល កុំឲ្យដំឡើងថ្លៃសំបុត្រ អំឡុងចូលឆ្នាំខ្មែរ ដោយថា ដើម្បីជួយសម្រួលដល់ជីវភាព អ្នកធ្វើដំណើរទៅលេងស្រុកកំណើត នារដូវបុណ្យជាតិមួយនេះ។
ពិធីបុណ្យចូលឆ្នាំខ្មែរ នឹងចាប់ផ្តើមឡើងនៅខែក្រោយនេះ ចាប់ពីថ្ងៃទី ១៤ ដល់ថ្ងៃទី១៧។ ជារៀងរាល់ឆ្នាំ បុណ្យជាតិដ៏ធំមួយនេះ មន្ត្រីរាជការ កម្មករ និយោជិត អាជីករ និងពលរដ្ឋមួយចំនួនទៀត តែងតែសម្រុកនាំគ្នាធ្វើដំណើរ ចេញយ៉ាងគំហុក ពីភ្នំពេញ ទៅកាន់បណ្តាខេត្តនានា ជំរុញឲ្យម្ចាស់រថយន្តឈ្នួល ដំឡើងថ្លៃសំបុត្រទ្វេរដង និងខ្លះទៀតលើសពីនេះ។
លោកនាយករដ្ឋមន្ត្រី ហ៊ុន សែន ក្នុងពិធីជួបកម្មករនៅថ្ងៃនេះ បានអំពាវនាវ ដូចឆ្នាំមុនៗដែរ កុំឲ្យម្ចាស់រថយន្តដំឡើងថ្លៃ សំបុត្រ នៅរដូវចូលឆ្នាំដែលជិតមកដល់នេះ ដោយថាដើម្បីជួយកាត់បន្ថយការចំណាយ ដល់អ្នកដែលទៅលេងស្រុកកំណើត ដើម្បីអបអរពិធីបុណ្យជាតិមួយនេះ។
លោកថា៖«នៅពេលចូលឆ្នាំ តែងតែមានការឡើងថ្លៃ នៅរថយន្តឈ្នួល ដែលខ្ញុំសុំយកឱកាសនេះអំពាវនាវដល់ម្ចាស់រថយន្យទាំងអស់កុំដំឡើងថ្លៃៗ ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី អះអាងថា ថ្វីត្បិតតែកម្ពុជាអនុវត្តរបបទីផ្សារសេរី មិនអាចលូកដៃជ្រៅទៅកំណត់តម្លៃសេវាក៏ដោយ ប៉ុន្តែលោកថា ឆាប់ៗនេះក្រុមការងារនឹងជួបប្រជុំ ជាមួយប្រធានក្រុមហ៊ុន ទប់ស្កាត់កុំឲ្យតម្លៃសេវាដឹកជញ្ជូនហក់ឡើងខ្ពស់។
លោកថា៖«ទីផ្សារសេរីនៃការរកទទួលទានហ្នឹងគាត់មាន ប៉ុន្តែទោះជាយ៉ាងណាយើងនូវតែពន្យល់ យើងនៅតែស្នើសុំគាត់ ធ្វើយ៉ាងណាឲ្យគាត់លើកកម្ពស់ ចូលរួមជាមួយយើងក្នុងការមិនដំឡើងថ្លៃឈ្នួលរថយន្ត ហើយដូចករណីខ្លះក៏យើងមានវិធានការផងដែរ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សម ជ័យ លើកឡើងថាការអំពាវនាវ របស់នាយករដ្ឋមន្ត្រីនេះ មិនមែនជារឿងថ្មីទេ ហើយថាប្រសិទ្ធិភាពក៏មានតិចតួចដែរ។
លោកថា៖«ក្រុមហ៊ុនដឹកជញ្ជូនហ្នឹង ជាក្រុមហ៊ុន របស់អ្នកមានឥទ្ធិពលអ្នកមានអំណាច នៅក្នុងសង្គមយើង អញ្ចឹងទៅគេយល់ថាជាឱកាសដែលគេអាចរកចំណេញបានច្រើនជាងពីការគិតគូពីសីលធម៌នឹងទី១។ទី២ អាចពាក់ព័ន្ធទៅនឹងច្បាប់ស្តីពីការវិនិយោគនឹងកម្ពុជាប្រកាន់យករបបទីផ្សារសេរី អញ្ចឹងរដ្ឋមិនអាចលូកដៃចូលក្នុងការកំណត់តម្លៃសេវា របស់វិស័យឯកជននោះទេ ។ អញ្ចឹងទិដ្ឋភាព២នេះហើយដែលយើងមើលឃើញនាំឲ្យមានការឡើងថ្លៃ»។
បើតាមលោក សន ជ័យ ដើម្បីទប់ស្កាត់ កុំឲ្យរថយន្តឯកជនដំឡើងថ្លៃ នៅថ្ងៃបុណ្យជាតិចូលមកដល់ ដូចបច្ចុប្បន្ន រដ្ឋត្រូវបង្កើតឲ្យមានខ្សែរ រថយន្តក្រុង រត់ចេញ ទៅតាមបណ្តាខេត្តនានា ដូចក្រុមហ៊ុនឯកជនដែរ ពេលនោះអ្នកធ្វើដំណើរ នឹងមានជម្រើស មិនជិះរថយន្តឯកជនបើពួកគេដំឡើងថ្លៃ លោកថា បើមិនដូចនេះទេ តម្លៃសេវាដឹកជញ្ជូននៅរដូវបុណ្យជាតិ នៅតែហក់ឡើងខ្ពស់ ដដែល។
