អតីតមេដឹកនាំបក្សប្រឆាំង ដែលកំពុងនិរទេសខ្លួន លោក សម រង្ស៊ី បានយកខួបនៃព្រឹត្តិការណ៍បោកគ្រាប់បែកសម្លាប់ក្រុមបាតុករ កាលពី២១ឆ្នាំមុន មកភ្ជាប់ថា មេដឹកនាំបក្សកាន់អំណាច លោក ហ៊ុន សែន ជាអ្នកនៅពីក្រោយបទឧក្រិដ្ឋនេះ។
កាលពីថ្ងៃទី៣០ខែមិនា១៩៩៧ បាតុករយ៉ាងតិច១៦នាក់បានស្លាប់ក្នុងថ្លុកឈាមនិងជាង១០០នាក់ផ្សេងទៀតរងរបួស នៅមុខមន្ទីររដ្ឋសភាសចាស់ ជិតព្រះបរមរាជវាំង ក្នុងរាជធាណីភ្នំពេញ ក្រោយពីគ្រាប់បែក៣គ្រាប់បានផ្ទុះក្នុងហ្វូងបាតុករ។
បាតុកម្មពេលនោះ មានទាំងលោក សម រង្ស៊ី ចូលរួមដើរហែក្បូនផងដែរ ទាមទារឲ្យរដ្ឋាភិបាលធ្វើកំណែទម្រង់ប្រព័ន្ធយុត្តិធម៌។ ប៉ុន្តែ២១ឆ្នាំកន្លងមកនេះ គ្មានជនដៃដល់ ឬអ្នកពាក់ព័ន្ធណាម្នាក់ ត្រូវរដ្ឋាភិបាលចាប់ខ្លួនមកផ្តន្ទាទោសទេ។
ក្នុងពិធីខួប២១ឆ្នាំនៃព្រឹត្តិការណ៍បោកគ្រាប់បែននេះ លោក សម រង្ស៊ី បានសរសេរនៅលើទំព័រហ្វេសប៊ុករបស់លោក អំពាវនាថា៖ «លោក ហ៊ីង ប៊ុនហៀង មេអង្គរក្សរបស់ ហ៊ុន សែន ជាអ្នករៀបចំអំពើភេរវកម្មនេះ តាមបញ្ជា ហ៊ុន សែន ផ្ទាល់»។
បើតាមទំព័រហ្វេសប៊ុកផ្លូវការ លោក សម រង្ស៊ី ក៏បានអំពាវនាវឲ្យ ជនរួមជាតិ ចងចាំពីវីរភាពរបស់បាតុករ ដែលលោកថា អ្នកទាំងនោះបាន បូជាជីវិតដើម្បីលទ្ធិប្រជាធិបតេយ្យ សេរីភា និងយុត្តិធម៌ ក្នុងសោកនាដកម្មនោះ។
VOD មិនអាចទាក់ទងលោក ហ៊ីង ប៊ុនហៀង ដើម្បីសុំប្រតិកម្មទៅនឹងការចោទប្រកាន់របស់លោក សម រង្ស៊ី នេះបានទេ។ ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន បានច្រានចោលការចោទប្រកាន់នេះ ហើយហៅការលើកឡើង របស់លោក សម រង្ស៊ី នេះថា ជាវប្បធម៌លាភពណ៌ បង្កឲ្យមានបញ្ហាក្នុងសង្គម។
លោកថា៖ «យើងដឹងហើយថា អំពើបោកគ្រាប់បែក ដែលដឹកនាំដោយ សម រង្ស៊ី នេះFBI ក៏បានលូកដៃចូលក្នុងការស្រាវជ្រាវ ប៉ុន្តែ FBI បញ្ចប់ការស្រាវជ្រាវតាំងពីឆ្នាំ២០០៣មកម្លេះ។ ដូច្នេះ រឿងហ្នឹងវាហាក់ដូចជាបញ្ចប់ទៅហើយ ទណ្ឌិត សម រង្ស៊ី នៅតែកកូរកកាយ ដើម្បីចោទប្រកាន់អ្នកនេះអ្នកនោះ អាហ្នឹងខ្ញុំថា ជាអ្នកបង្ករឿងទេ មិនមែនធ្វើឲ្យសមភាពការស្ងប់នៅក្នុង ប្រទេសយើងទេ»។
ចំណែក អ្នកនាំពាក្យក្រសួងមហាផ្ទៃលោក ខៀវ សុភក្រ ប្រាប់ VOD នៅថ្ងៃនេះថា ដូចពេលមុនៗដែរថា សមត្ថកិច្ចនៅមិនទាន់បិទការស៊ើបអង្កេត ករណីនេះនៅឡើយទេ។
ប្រធានក្រុមអ្នកវិភាគវ័យក្មេង លោក ហង្ស វិទូ វិភាគថា បញ្ហាដែលអ្នកនយោបាយច្រានការទទួលខុសត្រូវដាក់គ្នា មិនបានផ្តល់យុត្តិធម៌ដល់ជនរងគ្រោះរយៈពេល២១ឆ្នាំមកនេះ លោកថាមកពីតុលាការមិនឯករាជ្យស្ថិតក្រោមឥទ្ធិពលនយោបាយ។ លោកថាដូចនេះ យុត្តិធម៌សម្រាប់ជនរងគ្រោះ រកឃើញដោយអន្លើ អាស្រ័យលើកត្តាផ្សងៗ រួមទាំងកត្តានិន្នាការនយោបាយ។
លោកថា៖ «អ្នកនយោបាយខ្មែរច្រើនតែបង្កជម្លោះជាជាងដោះស្រាយបញ្ហា។ ដូច្នេះបញ្ហាក៏មាន៣ដូចគ្នាដែរ បើយើងចង់ដោះស្រាយ បញ្ហាទី១ អ្នកនយោបាយធ្វើយ៉ាងម៉េចកុំបង្កជម្លោះ ហើយព្យាយាមដោះស្រាយបញ្ហា ។ ទី២ អ្នកនយោបាយត្រូវ បង្ហាញគំរូល្អដល់ប្រជាពលរដ្ឋតាមរយៈពាក្យសម្តី តាមរយៈកាយវិការក្តី ដើម្បីឲ្យយុវជន និងប្រជាពលរដ្ឋមើលទៅឃើញគាត់ជាមនុស្សថ្លៃថ្នូរ គាត់ជាអ្នកគិតពីបញ្ហាប្រទេសជាតិពិតប្រាកដ»។
លោក ហង្ស វិទូ ជំរុញឲ្យអ្នកនយោបាយគួព្យាយាមអង្គុយទល់មុខគ្នាដោះស្រាយបញ្ហាជាតិ បញ្ហាយុត្តិធម៌សង្គម ជាជាងចោទគ្នាទៅវិញទៅមកហើយគេចចេញពីការទទួលខុសត្រូវ។
ទោះជាយ៉ាងណា គ្រួសារជនរងគ្រោះមួយចំនួន ដែលបានចូលរួមប្រារពពិធីរំឭកខួប២១ឆ្នាំ នៅកន្លែងកើតហេតុនាថ្ងៃសុក្រនេះ បានប្រាប់អ្នកសារព័ត៌មានថា ពួកគេគ្មានជំនឿថា រដ្ឋាភិបាលនឹងវែកមុខរកជនដៃដល់ និងអ្នកពាក់ព័ន្ធមកផ្តន្ទាទោស ដើម្បីផ្តល់យុត្តិធម៌ជូនគ្រួសារគេ ដែលបានស្លាប់នោះទេ ដរាបណាប្រព័ន្ធតុលាការមិនត្រូវបានធ្វើកំណែទម្រង់ដ៏ពិតប្រាកដមួយនោះ៕