អ្នកនយោបាយជើងចាស់ ដែលកំពុងនិរទេសខ្លួន លោក លឺ ឡាយស្រេង អំពាវនាវទៅអ្នកនយោបាយវិលទៅរកតុចរចា ដោយមានព្រះហាក្សត្រធ្វើជាអាជ្ញាកណ្តាលដើម្បីផ្សះផ្សាជាតិ ខណៈសម្ពាធពីប្រទេសលោកសេរីកាន់តែកើនឡើងជំរុញឲ្យស្តារលទ្ធិប្រជាធិបតេយ្យឡើងវិញ ។
ការចាប់ឃុំខ្លួន លោក កឹម សុខា និងការរំលាយគណបក្សប្រឆាំងមានអ្នកបោះឆ្នោតគាំទ្រជិត៣លានសំឡេងនោះ ត្រូវបានអ្នកឃ្លាំមើល ដាក់ការព្រួយបារម្ភថា ជាសញ្ញាណនៃការបែកបាក់ជាតិ។
អតីតឧបនាយករដ្ឋមន្ត្រីលោក លឺ ឡាយស្រេង បានថ្លែងតាមវីដេអូឃ្លីប លើទំព័រហ្វេសប៊ុករបស់លោក នាថ្ងៃនេះថា មេដឹកនាំបក្សកាន់អំណាច លោក ហ៊ុន សែន មិនគួរទុកឲ្យស្ថានការណ៍នយោបាយ ឈានទៅជាប់ទណ្ឌកម្មសេដ្ឋកិច្ច ពីប្រទេសលោកសេរីនោះទេ លោកថា ព្រោះទណ្ឌកម្មនោះ អាចនឹងធ្វើឲ្យពលរដ្ឋអត់ការងារធ្វើ ប្រឈមនឹងជីវភាពរស់នៅ។
លោក លឺ ឡាយស្រេង រំឭកថា គណបក្សប្រឆាំងវិញ ក៏មិនត្រូវពឹងតែលោកសេរី ហើយបណ្តោយឲ្យប្រជាតិធ្លាក់ក្នុងការហ៊ុំព័ទសេដ្ឋកិច្ចពីប្រទេសលោកសេរីដែរ។ លោកថា មេដឹកនាំគួតែវិលទៅរកតុចរចា ដោយយាងព្រះមហាក្សត្រមកធ្វើជាអាជ្ញាកណ្តាល ស្វែងរកដំណោះស្រាយ ដើម្បីបញ្ចៀសវិបត្តិរបស់ជាតិនៅពេលខាងមុខ។
លោកថា ៖ អន្តរជាតិចូលមកសង្កត់ហើយ ងើបអត់រួចទេ អស់លោកកុំអាងចិនឲ្យសោះ យើងអាងខ្មែរវិញ កុំថាសង្គ្រោះជាតិអាងលោកខាងលិច សម្តេច ហ៊ុន សែន អាងចិន ឥឡូវឈប់អាង។ទាំងពីរនាក់ហ្នឹងត្រូវអាងព្រះករណាជីវិតតម្កល់លើត្បូងរបស់យើង យាងចេញមកដោះស្រាយ»។
លោក លឺ ឡាយស្រេង បានគេចខ្លួនចេញទៅក្រៅប្រទេស អំឡុងចុងឆ្នាំ២០១៧ ក្រោយមេធាវី លោក គី តិច តំណាងរបស់នាយករដ្ខមន្ត្រី ប្តឹងពីបទប្រមាថព្រះមហាក្សត្រ ក្រោយពីលោក រិះគន់ព្រះមហាក្សត្រ ដែលព្រះអង្គ បានឡាយព្រះហស្តលេខា លើច្បាប់ដ៏ចម្រោងសម្រាសមួយចំនួន បើកផ្លូវឲ្យរំលាយគណបក្សសង្គ្រោះជាតិនោះ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានច្រានចោលករណីនេះ ដោយថា គណបក្សកាន់អំណាច មិនលំអៀងទៅរកប្រទេសចិនទេ ហើយថាស្ថានការណ៍នយោបាយពេលនេះ ពលរដ្ឋកំពុងសប្បាយរីករាយថ្ងៃចូលឆ្នាំថ្មីជិតមកដល់ ហើយថា ក៏គ្មានការប្រឈបនិងបែកបាក់ជាតិ ដូចការលើកឡើងនោះទេ។
លោកថា៖«យើងមិនគួរំខានអីព្រះមហាក្សត្រទេ អ្នកណាប្រព្រឹត្តិល្មើសច្បាប់អ្នកហ្នឹងត្រូវទទួលខុសត្រូវចំពោះមុខច្បាប់។មិនអាចទៅរកព្រះរាជតួនាទីរបស់ព្រះរាជា មកកាន់ជើងអ្នកប្រឆាំងដែលធ្វើខុសច្បាប់នោះបានទេ»។
VOD មិនអាចសុំការអត្ថាធិប្បាយពីលោកសម រង្ស៊ី ជុំវិញការលើកឡើងរបស់លោក លឺ ឡាយស្រេងនេះបានទេ។ ប៉ុន្តែគណបក្សនេះធ្លាប់រិះគន់ថា ការរំលាយគណបក្សខ្លួនថា ជាការដើផ្ទុយពីលទ្ធិប្រជាធិបតេយ្យ និងរដ្ឋធន្មនុញ្ញ ។
របត់នយោបាយនេះ សហរដ្ឋអាមេរិក និងសហភាពអឺរ៉ុប បាននាំមុខគេផ្តាច់ជំនួយដល់ គជប និងគំរាមបន្ថែមទៀតពីលទ្ធិភាពដាក់ទណ្ឌកម្មសេដ្ឋកិច្ច បើរដ្ឋាភិបាលកម្ពុជាមិនធ្វើឲ្យស្ថានការណ៍វិលទៅរកសភាពដើមវិញ ធានាឲ្យគណបក្សសង្គ្រោះជាតិដែលបានរំលាយទៅហើយនោះ បានចូលរួមប្រកួតការបោះឆ្នោតឡើងវិញ។
អ្នកវិភាគនយោបាយ លោក បណ្ឌិត ឡៅ ម៉ុងហៃ ធ្លាប់ប្រាប់VODកាលពីសប្តាហ៍មុនថា យន្តការក្នុងស្រុក មានព្រះមហាក្សត្រ ជា តួអង្គសំខាន់ក្នុងការបង្រួបបង្រួមជាតិ ដែលលោកថាមានធានាដោយរដ្ឋធម្មនុញ្ញ ។
រដ្ឋធម្មនុញ្ញមាត្រា២ចែងថា«ព្រះមហាក្សត្រព្រះអង្គទ្រង់ជានិមិត្តរូបនៃឯកភាពជាតិ ។ ព្រះមហាក្សត្រ ទ្រង់មានតួនាទីខ្ពង់ខ្ពស់ ជាអាជ្ញាកណ្តាល ដើម្បីធានាការប្រព្រឹត្តទៅនៃអំណាចសាធារណៈ ឲ្យមានភាពទៀងទាត់»។
