មន្ត្រីជាន់ខ្ពស់ចិន បានជំរុញកម្ពុជាឲ្យពន្លឿនគម្រោងសាងសង់ប្រព័ន្ធធារាសាស្ត្រនៅទន្លេមេគង្គប្រកបដោយប្រសិទ្ធភាព តាមយន្តការមេគង្គ-ឡានឆាង។
ក្រុមមេដឹកនាំនៃបណ្ដាប្រទេសនៅតាមដងទន្លេមេគង្គ បានជួបប្រជុំគ្នានៅក្នុងកិច្ចប្រជុំកំពូលគណៈកម្មការទន្លេមេគង្គលើកទី៣ ដែលរៀបចំធ្វើឡើងខេត្តសៀមរាបចាប់ពីថ្ងៃទី៤ ដល់ថ្ងៃទី៥ ខែមេសានេះ។
លោកនាយករដ្ឋមន្ត្រីកម្ពុជា ហ៊ុន សែន បានសរសេរនៅលើហ្វេសប៊ុករបស់លោកកាលពីយប់មិញថា លោកបានជួបរដ្ឋមន្រ្តីក្រសួងធនធានទឹកចិន លោក អ៊ី ជិនពីង ហើយលោកថា ភាគីចិនបានបញ្ជាក់ថា កន្លងមក តាមរយៈប្រព័ន្ធធារាសាស្ត្រមេគង្គ–ឡានឆាង គឺមានគម្រោង ៥ ក្នុងនោះគម្រោង ២ បាន និងកំពុងអនុវត្តនៅក្នុងប្រទេសកម្ពុជា។
នាយករដ្ឋមន្ត្រីកម្ពុជា ឲ្យដឹងទៀតថា ភាគីចិន លោក អ៊ី ជិនពីង ក៏បានស្នើឲ្យពង្រឹងកិច្ចសហប្រតិបត្តិការបន្ថែមទៀត ស្នើឲ្យមានការផ្លាស់ប្ដូរទស្សនៈកិច្ចរវាងថ្នាក់ដឹកនាំនៃក្រសួងទាំងពីរឲ្យបានញឹកញាប់ លើប្រព័ន្ធធារាសាស្ត្រ និងសុំឱ្យជំរុញយន្តការមេគង្គ-ឡានឆាងឲ្យកាន់តែមានប្រសិទ្ធភាព និងច្បាស់លាស់ជាក់ស្ដែង។
បើតាមហ្វេសប៊ុកនាយករដ្ឋមន្ត្រីកម្ពុជា ក្រៅពីជួបជជែកដាច់ដោយឡែកជាមួយមន្ត្រីជាន់ខ្ពស់ចិនហើយនោះ មេដឹកនាំកម្ពុជាក៏បានជួបជជែកដាច់ដោយឡែកជាមួយមេដឹកនាំផ្សេងទៀត ដូចជា ថៃ វៀតណាម និងឡាវ ផងដែរ។
កាលពីខែមករាកន្លងមកនេះ កម្ពុជាក៏បានធ្វើជាម្ចាស់ផ្ទះកិច្ចប្រជុំមេគង្គ–ឡានឆាង ក្នុងនោះក៏មានមហាអំណាចចិនចូលរួមផងដែរ។
ក្រោយបិទបញ្ចប់នៃកិច្ចប្រជុំមេគង្គ–ឡានឆាង លោកនាយកមន្រ្តី ហ៊ុន សែន អះអាងថា ចិនគ្រោងផ្តល់ជំនួយឥតសំណងប្រមាណ ១៨០០លានយន់ ឬស្មើនឹងប្រមាណ ២៧៦លានដុល្លារសម្រាប់គម្រោងអភិវឌ្ឍន៍តូច–ធំនៅក្នុងប្រទេសកម្ពុជា៕