រដ្ឋាភិបាលបានសម្រេចកាត់ដីជាង ៥០០ហិកតា នៅកោះរ៉ុង ស្ថិតក្នុងដែនសមុទ្រខេត្តព្រះសីហនុ ទៅឲ្យប្រជាពលរដ្ឋជិត ៣០០គ្រួសារ ដែលកំពុងរស់នៅលើដីកោះមួយនេះជាអចិន្ត្រៃយ៍។
ក្នុងអនុក្រឹត្យចុះថ្ងៃទី៤ ខែមេសានេះ លោកនាយករដ្ឋមន្ត្រី ហ៊ុន សែន បានសម្រេចកាត់ដីទំហំ ៥២៨.៣៧ហិកតា ស្ថិតក្នុងសង្កាត់កោះរ៉ុង និងសង្កាត់កោះរ៉ុងសន្លឹម ចេញពីដីឯកជនរបស់រដ្ឋ ទៅឲ្យប្រជាពលរដ្ឋចំនួន ២៩៨គ្រួសារ ដោយថា ពួកគេបានរស់នៅជាអចិន្ត្រៃយ៍លើកោះទាំងនោះ។
បើតាមអនុក្រឹត្យដដែលនេះ ដីទំហំជាង ១២ហិកតាទៀត ត្រូវបានកាត់សម្រាប់សាងសង់សាលារៀន ប៉ុស្តិ៍រដ្ឋបាល សាលាឃុំ ទីស្នាក់ការភូមិ អង្គភាពកងរាជអាវុធហត្ថ និងវត្តអារាមជាដើម។
រដ្ឋាភិបាលបានសម្រេចបែបនេះ ១០ឆ្នាំក្រោយពីកោះរ៉ុងត្រូវបានរដ្ឋាភិបាលប្រគល់សិទ្ធិវិនិយោគរយៈពេល ៩៩ឆ្នាំ ទៅឲ្យក្រុមហ៊ុន Royal Group របស់លោកឧកញ៉ា គិត ម៉េង កាលពីឆ្នាំ២០០៨ ដែលនាំឲ្យប្រជាពលរដ្ឋរស់នៅលើដែនកោះនោះ ព្រួយបារម្ភពីការបាត់បង់ដីធ្លីរបស់ពួកគេ៕