កាសែតភ្នំពេញប៉ុស្ដិ៍ស្នើសុំរយៈពេល២០ថ្ងៃបន្ថែមទៀត ដើម្បីតតាំងក្ដីនៅតុលាការកំពូល បន្ទាប់ពីសាលាដំបូងរាជធានីភ្នំពេញ បានចុះទៅអនុវត្តសាលដីកា កាលពីថ្ងៃម្សិលមិញ ពាក់ព័ន្ធនឹងវិវាទការងារ រវាងអតីតអគ្គនាយក និងម្ចាស់ស្ថាប័នកាសែតបរទេសមួយនេះ។
កាលពីវេលាម៉ោង៨ និង៣០នាទីព្រឹកថ្ងៃព្រហស្បតិ៍ម្សិលមិញ មន្ដ្រីតុលាការដឹកនាំដោយព្រះរាជអាជ្ញារង អមសាលាដំបូងរាជធានីភ្នំពេញ លោក ខាំ សុផារី បានចុះទៅអនុវត្តសាលដីកាដោយផ្ទាល់ នៅស្នាក់ការកណ្ដាលស្ថាប័នកាសែតភ្នំពេញប៉ុស្ដិ៍ ដែលសម្រេចឲ្យអតីតអគ្គនាយក លោក Chris Dawe ឈ្នះក្ដីជុំវិញបណ្ដឹងរបស់លោកនៅក្នុងវិវាទការងារ។
បើតាមមន្ដ្រីដែលចុះទៅអនុវត្តសាលដីកាកាលពីម្សិលមិញបានឲ្យដឹងថា ស្ថាប័នព័ត៌មានភ្នំពេញប៉ុស្ដិ៍ មានរយៈពេល១៥ថ្ងៃ ដើម្បីទូទាត់សំណងទឹកប្រាក់២៦ម៉ឺនដុល្លារ ឲ្យទៅលោក Chris Dawe។ ប៉ុន្ដែ បើផុតរយៈពេលនេះ ហើយគ្មានការទូទាត់សំណង តុលាការនឹងរឹបអូសយកទ្រព្យសម្បត្តិរបស់ស្ថាប័នកាសែតមួយនេះ សងទៅដើមបណ្ដឹង។
ប៉ុន្ដែ ក្នុងសេចក្ដីថ្លែងការណ៍កាលពីម្សិលមិញ អគ្គនាយកបច្ចុប្បន្នរបស់កាសែតភ្នំពេញប៉ុស្ដិ៍ លោក Marcus Holmes បកស្រាយថា លោកបានស្នើសុំពន្យារពេលបន្ថែម២០ថ្ងៃ ដើម្បីប្ដឹងជំទាស់និងសាលាដីកាសាលាឧទ្ធរណ៍ ទៅកាន់តុលាការកំពូល។
លោក Marcus Holmes បញ្ជាក់ថា ស្ថាប័នព័ត៌មានមួយនេះ មិនបានរំលោភសិទ្ធិបុគ្គលិកនោះទេ ដោយថា លោក Chris Dawe បានក្លែងបន្លំឯកសារ ដើម្បីផលប្រយោជន៍ខ្លួនឯង និងថា នេះគឺជាការប្រព្រឹត្តខុសធ្ងន់ធ្ងរ ពុំអាចលើកលែងបាន។ ជារួម លោកថា ការបណ្ដេញអតីតអគ្គនាយកចេញពីការងារ គឺជារឿងត្រឹមត្រូវ និងស្របតាមច្បាប់នៃព្រះរាជាណាចក្រកម្ពុជា។
VOD មិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក លី សុផាណាបានទេនៅថ្ងៃនេះ។ ប៉ុន្ដែ លោកបានប្រាប់ VOD កាលពីម្សិលមិញថា នេះគឺជាវិធានការចាប់បង្ខំក្នុងសំណុំរឿងរដ្ឋប្បវេណី និងមិនជាប់ពាក់ព័ន្ធរឿងព្រហ្មទណ្ឌឡើយ។
កាសែតភ្នំពេញប៉ុស្តិ៍គឺជាសារព័ត៌មានដែលផ្សាយព័ត៌មានទូទៅ រួមទាំងព័ត៌មានពីភាពខ្វះចន្លោះរបស់រដ្ឋាភិបាលដូចជា អំពើពុករលួយ កាប់បំផ្លាញព្រៃឈើ និងភាពអយុត្តិធម៌ជាដើម។ កាសែតនេះ ក៏ទទួលរងប្រតិកម្មតបពីលោកនាយករដ្ឋមន្ត្រីហ៊ុន សែន និងមន្ត្រីជាន់ខ្ពស់រដ្ឋាភិបាលជាបន្តបន្ទាប់ដែរ។
ប្រធានក្រុមអ្នកវិភាគនយោបាយវ័យក្មេង លោក ហង្ស វិទូ សង្ស័យថា ចំណាត់ការប្រឆាំងកាសែតភ្នំពេញប៉ុស្ដិ៍ ហាក់មានភាពមិនប្រក្រតីមួយចំនួន ឬអាចលាយឡំនឹងមូលហេតុនយោបាយ។ លោករិះគន់ថា ស្ថាប័នព័ត៌មានណា ដែលហ៊ានផ្សាយការពិតរិះគន់រដ្ឋាភិបាលនោះ ពួកគេតែងតែទទួលរងការគំរាមកំហែង និងផ្អាកដំណើរការ ដូចជា កាសែត ខេមបូឌា ដេលី ជាដើម។
លោកថា៖ «ចំពោះខ្ញុំផ្ទាល់ ខ្ញុំកំពុងតែមានការសង្ស័យថា រឿងនេះ មិនមែនត្រឹមតែទាក់ទងរឿងបុគ្គលទេ អាចនឹងទាក់ទងនឹងរឿងនយោបាយ ឬដាក់សម្ពាធមួយទៀត។ យើងឃើញថា កាសែតណាក៏ដោយ បើមាននិន្នាការប្រឆាំង ឬនិយាយការពិត ច្រើនតែរដ្ឋាភិបាល ឬអ្នកមានអំណាច គាត់តែងតែរករឿងដើម្បីបិទ នេះជាការកត់សម្គាល់»។
អតីតអគ្គនាយកកាសែតភ្នំពេញប៉ុស្ដិ៍ លោក Chris Dawe បានចូលកាន់តំណែងនេះនៅខែមីនាឆ្នាំ២០១២ ហើយលោកត្រូវបានបណ្ដេញចេញវិញនៅឆ្នាំ២០១៥។
សារព័ត៌មានភ្នំពេញ ប៉ុស្តិ៍ ត្រូវបានសារព័ត៌មានបរទេសចុះផ្សាយកាលពីពេលថ្មីៗថា កំពុងស្ថិតក្រោមការស៊ើបអង្កេតពន្ធពីសំណាក់រដ្ឋាភិបាលកម្ពុជា និងប្រឈមមុខនិងការតម្រូវឲ្យបង់ប្រាក់ ៣,៩លានដុល្លារ ជុំវិញការខកខានមិនបានរាយការណ៍អំពីការផ្ទេរប្រាក់ ២,៥លានដុល្លារពីអូស្ត្រាលីកាលពីឆ្នាំមុន ចាក់បញ្ចូលក្នុងគណនីសារព័ត៌មានមួយនេះ។
ទោះជាយ៉ាងណា អគ្គនាយកបច្ចុប្បន្នរបស់កាសែតនេះ លោក Marcus Holmes បានច្រានចោលនូវព័ត៌មានបែបនេះ ដោយបញ្ជាក់ថា ការជជែកអំពីបញ្ហាពន្ធ មិនប៉ះពាល់ទៅដល់ដំណើរការរបស់សារព័ត៌មានមួយនេះទេ៕