យោងតាមរបាយការណ៍របស់នាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ គ្រោះថ្នាក់ចរាចរណ៍នៅទូទាំងប្រទេសក្នុងរយៈពេល៥ថ្ងៃអំឡុងពេលចូលឆ្នាំថ្មីបានសម្លាប់មនុស្ស៤៧។
របាយការណ៍ដដែលក៏បានឲ្យដឹងថា គ្រោះថ្នាក់ចរាចរណ៍បានកើតឡើងចំនួន៩១លើកក្នុងរយៈពេល៥ថ្ងៃនេះគិតចាប់ពី ថ្ងៃទី១៣ដល់ថ្ងៃទី១៧ខែមេសានេះ។ គ្រោះថ្នាក់ទាំង៩១លើកនេះ បណ្ដាលមកពីល្មើសល្បឿន មិនគោរពសិទ្ធិគ្នាក្នុងពេលបើកបរ ប្រជែង បត់គ្រោះថ្នាក់ ស្រវឹង មិនប្រកាន់ស្ដាំ និង ងងុយដេក។
ទោះជាយ៉ាងណាក៏ដោយតាមរបាយការណ៍ដដែលនេះបង្ហាញថា គ្រោះថ្នាក់ចរាចរណ៍ក្នុងរយៈពេល៥ថ្ងៃនាឱកាសបុណ្យចូលឆ្នាំថ្មីឆ្នាំនេះ បានថយចុះ២៥ភាគរយធៀបនឹងរយៈពេលដូចគ្នាកាលពីឆ្នាំ២០១៧កន្លងទៅ ពោលគឺថយចុះពី ១២១ករណីមកនៅត្រឹម៩១ករណី។
