អ្នកតាមដានមួយចំនួន បង្ហាញការយល់ឃើញថា ការបើកបរគ្មានសណ្តាប់ធ្នាប់ បង្កឲ្យកកស្ទះ និងគ្រោះថ្នាក់ចរាចរណ៍ នៅលើដងផ្លូវសាធារណៈ អាចមកពីសីលធម៌អ្នកបើកបរធ្លាក់ចុះ និងការអនុវត្តច្បាប់របស់មន្ត្រីជំនាញនៅមានកម្រិត។
អ្នកស្រាវជ្រាវផ្នែកអភិវឌ្ឍន៍សង្គម លោកបណ្ឌិត ប៉ា ចន្ទរឿន លើកឡើងថា ដើមចមនៃបញ្ហាទំាំងនោះ អាចកើតចេញពីកត្តាមនុស្ស ផ្លូវ និងការអនុវត្តច្បាប់ដោយមិនស្មើភាព។
លោកថា៖ «ប្រជាជនយើងមួយចំនួន គាត់មានលទ្ធភាពនៅក្នុងការទិញរថយន្តថ្លៃៗ ប៉ុន្តែ គាត់អត់យល់អំពីការបើកបរ គាត់ខ្វះការឲ្យតម្លៃខ្លួនឯងក្នុងនាមពលរដ្ឋដែលមានជីវភាពធូធា ធ្វើឲ្យខ្លួនក្លាយជាជនម្នាក់មានសេចក្តីថ្លៃថ្នូរ ដែលគោរពច្បាប់ចរាចរណ៍ ដែលមានសីលធម៌ ឬក៏យើងហៅជាភាសាសាមញ្ញញថា ជាពលរដ្ឋស៊ីវិល័យម្នាក់ហ្នឹង គឺនៅខ្វះខាតច្រើនណាស់»។
លោក ប៉ា ចន្ទរឿន ពន្យល់ទៀតថា ប្រទេសមួយ ទោះមានច្បាប់ល្អយ៉ាងណាក៏ដោយ បើពលរដ្ឋមិនយល់ពីច្បាប់ ឬអ្នកប្រើប្រាស់ផ្លូវភាគច្រើនខ្វះសីលធម៌អប់រំ ខ្វះការពិចារណាប្រកបដោយការយោគយល់គ្នាទេ លោកថា ការធ្វើចរាចរណ៍តាមដងផ្លូវ នឹងប្រឈមនឹងបញ្ហាកកស្ទះ និងគ្រោះថ្នាក់គ្រប់ពេល។
លោកថា៖ «ពិសេសយើងគួរចាប់ផ្ដើមអប់រំពីក្មេងៗទៅ ហើយមនុស្សចាស់ហ្នឹង ឬអ្នកកាន់អំណាចគួរតែធ្វើជាគំរូល្អ នៅពេលបើកបរអីហ្នឹង ត្រូវតែប្រកាន់ច្បាប់ឲ្យបានតឹងរឹងដើម្បីធ្វើជាគំរូ ពីព្រោះសង្គមយើងជាសង្គមដែលចូលចិត្តមើលលើ មានន័យថា ចូលចិត្តធ្វើត្រាប់ តាមអ្នកនៅខាងលើ»។
រដ្ឋាភិបាលបានចេញរបាយការណ៍បង្ហាញថា អំឡុងពិធីបុណ្យចូលឆ្នាំថ្មីរយៈពេល ៥ថ្ងៃចាប់ពីថ្ងៃទី១៣ ដល់ថ្ងៃទី១៧ ខែមេសានេះ នៅឆ្នាំនេះ មានគ្រោះចរាចរណ៍បានកើតឡើងចំនួន ៩១លើក បង្កឲ្យមនុស្សយ៉ាង ៤៧នាក់បានស្លាប់។ ចំនួននេះបានថយចុះតិចតួច ឬត្រឹមតែ ៧នាក់ បើធៀបនឹងរយៈពេលដូចគ្នាទៅនឹងឆ្នាំមុន។
នាយករងវិទ្យាស្ថានសុវត្ថិភាពចរាចរណ៍ លោក គង់ រតនៈ លើកឡើងប្រហាក់ប្រហែលដែរថា ផលលំបាកដែលកើតឡើងពីការកកស្ទះ ពិតជាអាចកើតចេញពីកត្តាផ្លូវ សីលធម៌របស់អ្នកបើកបរ និងការយល់ដឹងពីច្បាប់បើកបរផងដែរ។
ប៉ុន្តែ លោក គង់ រតនៈ ពន្យល់ថា អ្វីដែលរដ្ឋាភិបាលអាចធ្វើបានដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ដែលបានសម្លាប់មនុស្សដល់ខ្ទង់ពាន់នាក់ក្នុងមួយឆ្នាំៗនោះ គឺត្រូវជំរុញមន្ត្រីជំនាញឲ្យបង្កើតការផ្សព្វផ្សាយដល់ពលរដ្ឋឲ្យយល់ពីច្បាប់ចរាចរណ៍ ពន្យល់អ្នកប្រើប្រាស់ផ្លូវ ឲ្យចេះបារម្ភពីសុវត្ថិភាពផ្ទាល់ខ្លួនផង និងសុវត្ថិភាពអ្នកដទៃនៅជុំវិញខ្លួនផងដែរ។
លោកថា៖ «តែអ្វីដែលរដ្ឋាភិបាលគួរចាត់វិធានការឲ្យតឹងរឹងហ្នឹង គឺបង្កើនការអនុវត្តច្បាប់ឲ្យបានតឹងរឹង។ យើងបានឃើញស្រាប់ហើយឥរិយាបទរបស់ពួកគាត់ ពេលខ្លះហ្នឹង ផ្លូវតែមួយ តែគាត់ទៅបិទផ្លូវម្ខាងទៀតក៏មានដែរ។ នេះវាជាសញ្ញាគ្រោះថ្នាក់មួយដែរ ហើយបន្ទាប់មកទៀត យើងសុំឲ្យការអនុវត្តច្បាប់ធ្វើឡើងឲ្យបានស្មើៗគ្នា កុំឲ្យលើកលែង។ ប្រសិនបើគុណភាពការអនុវត្តច្បាប់ហ្នឹងបានល្អ ទើបបានរួមចំណែកមួយផ្នែកធំដែរ។ អញ្ចឹង យើងយល់ថា សង្គមយើងត្រូវការវិន័យមួយដែលមានលក្ខណៈត្រឹមត្រូវ ហើយស្មើភាពគ្នា»។
របាយការណ៍គ្រោះថ្នាក់របស់នគបាលជាតិ បានឲ្យដឹងដែរថា នៅឆ្នាំ២០១៧ គ្រោះថ្នាក់ចរាចរណ៍បានសម្លាប់មនុស្សអស់ ១៧៨០នាក់ និងបណ្ដាលឲ្យមនុស្ស ៥៥៣៩នាក់ទៀតរងរបួស ដោយតួលេខអ្នកស្លាប់កើនឡើង ៦៣នាក់បន្ថែមទៀត បើធៀបនឹងឆ្នាំ២០១៦៕