ក្រុមមេដឹកនាំសហជីព ដែលធ្វើការលើវិស័យការងារ បង្ហាញការសោកស្ដាយនិងខកចិត្តចំពោះអាជ្ញាធរដែលមិនអនុញ្ញាតឲ្យពួកគេធ្វើការហែក្បួន នៅថ្ងៃទិវាពលកម្មអន្តរជាតិ១ឧសភា ស្អែកនេះ ដោយចាត់ទុកការមិនអនុញត្តិនេះថា ជាការរំលោភសិទ្ធិសេរីភាពសម្ដែងមតិរបស់ប្រជាពលរដ្ឋ។
ការលើកឡើងនេះ បន្ទាប់ពីសាលារាជធានីភ្នំពេញ បានបដិសេធសំណើររបស់ក្រុមសហជីពនិងសមាគម ដែលបានស្នើសុំហែក្បួនឆ្លងកាត់ទីក្រុង ដើម្បីបា្ររព្ធទិវាពលកម្មអន្តរជាតិ១ឧសភានៅថ្ងៃស្អែកនេះ។
ប្រធានសភាពការងារកម្ពុជា លោក អាត់ ធន់ បង្ហាញការសោកស្ដាយចំពោះអាជ្ញាធរដែលមិនអនុញ្ញាតឲ្យពួកគាត់ធ្វើការហែក្បួន បើទោះជាពួកគាត់អះអាងថា មិនបង្កឲ្យមានការកកស្ទះចរាចរណ៍ឡើយ។
លោកបន្តថា កាលពីឆ្នាំមុនៗពួកគាត់បានជំទាស់ទៅនឹងបម្រាមរបស់សាលារាជធានីភ្នំពេញ ដោយនៅតែនាំគ្នាធ្វើការហែក្បួន ប៉ុន្តែឆ្នាំនេះ ពួកគាត់បានសម្រេចចិត្តថា នឹងមិនធ្វើការហែក្បួននោះទេ ដោយសារ ស្ថានការនយោបាយបច្ចុប្បន្ននេះកំពុងតានតឹង។
លោកថា៖ «ការដែលគាត់បារម្ភពេក រហូតដល់ហាមឃាត់បិទសេរីភាពកម្មករនិងពលរដ្ឋហើយ ពីព្រោះច្បាប់បានសរសេរប្រជាពលរដ្ឋមានសិទ្ធិសេរីភាពច្រើនជាងនេះ ប៉ុន្តែឆ្នាំនេះ និងឆ្នាំមុនវាខុសគ្នា ដោយសារ ឆ្នាំមុនយើងស្នើហែគេមិនឲ្យហែយើងនៅតែហែ គេមិនឲ្យធ្វើយើងនៅតែធ្វើ ហើយបន្ទាប់មកយើង ក៏ទៅជួបជុំគ្នានៅកន្លែសួនច្បារនៅមុខស្ថានទូតរ៉ូស្ស៉ីទៅ ប៉ុន្តែឆ្នាំនេះ ដោយសារយើងមានការជជែកគ្នាទៅ ដោយសារ យើងគិតថា ស្ថានភាពនយោបាយ មួយទៀតយើងអត់ចង់ប្រឈមមុនពេលបោះឆ្នោតផង»។
បើតាមលោក អាត់ ធន់ នៅស្អែកនេះ ពួកគាត់នឹងរៀបចំកម្មវិធីខួបលើកទី១៣២ ទិវាពលកម្មអន្តរជាតិ ១ឧសភានេះ នៅសួនច្បារខាងមុខក្រុមប្រឹក្សាអភិវឌ្ឍន៍កម្ពុជា (CDC) ដែលនឹងមានអ្នកចូលរួមជាង២០០០នាក់។
លោកបន្តថា សារសំខាន់ ដែលពួកគាត់គ្រោងនឹងដាក់រដ្ឋាភិបាល ដើម្បីស្នើឲ្យរដ្ឋាភិបាលធ្វើការដោះស្រាយឲ្យកម្មករនយោជិក និងសហជីពនោះ គឺមាន១៨ចំណុច ហើយចំណុចសំខាន់ៗ គឺទាមទារឲ្យតម្លើងប្រាក់ខែកម្មករ និងពិនិត្យឡើងវិញលើច្បាប់សហជីព។
ប្រធានសម្ព័ន្ធសហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា ក៏បង្ហាញការខកចិត្តផងដែរនៅពេលអាជ្ញាធរបានបដិសេធមិនឲ្យ ពួកគាត់ធ្វើការហែក្បួនដើម្បីបា្ររព្ធទិវាពលកម្មអន្តរជាតិ១ឧសភាស្អែកនេះ។ លោកចាត់ទុកការមិនអនុញ្ញាតនេះថា ការបិទសិទ្ធិសេរីភាពសម្ដែងមតិរបស់ប្រជាពលរដ្ឋ។
លោកថា៖ «អាជ្ញាធរគួរតែអាចធានាសិទ្ធិសម្ដែងមតិ សិទ្ធិនៅក្នុងការជួបជុំរបស់ប្រជាពលរដ្ឋ របស់កម្មករ កម្មាការិនី ហើយយកហេតុផលស្ទះចរាចរណ៍ យកហេតុផលសណ្ដាប់ធ្នាប់ផ្សេងៗវាជាការបង្ហាញពីការអសត្ថភាពរបស់អាជ្ញាធរទៅវិញទេ មិនមែនជាហេតុផលទេ»។
លោក ម៉ូរ៉ា បន្តថា ទោះបីជាពួកគាត់មិនបានធ្វើការហែក្បួនក៏ដោយ ប៉ុន្តែក្រោយពីបញ្ចប់ការបា្ររព្ធពិធីនេះ ពួកគាត់នឹងញត្តិទៅដាក់រដ្ឋាភិបាល ដើម្បីស្នើឲ្យរដ្ឋាភិបាលធ្វើការកែប្រែច្បាប់សហជីព ដោយថា ច្បាប់នេះ បានបន្ថយចំនួនសហជីពនៅកម្ពុជា ជាហេតុនាំឲ្យពួកគេ ពិបាកក្នុងការជួយដល់កម្មករនិយោជិតទាក់ទិនបញ្ហាផ្លូវច្បាប់ និងការយល់ដឹងពីសិទ្ធិរបស់ពួកគេ។
បើតាមក្រុមសហជីព សាលារាជធានី បានបដិសេធមិនអនុញ្ញាឲ្យពួកគាត់ធ្វើការហែក្បួន ប៉ុន្តែអនុញ្ញាតឲ្យពួកគាត់ជួបគ្នានៅសួនច្បារខាងមុខក្រុមប្រឹក្សាអភិវឌ្ឍន៍កម្ពុជា នៅជិតវត្ត ដោយសាលារាជធានីលើកហេតុផលថាដើម្បីរក្សាសណ្ដាប់សាធារណៈ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ប្រាប់វីអូឌីនៅថ្ងៃនេះថា ការមិនអនុញ្ញាតមិនឲ្យធ្វើការហែក្បួន ដើម្បីកុំមានការកកស្ទះចរាចរណ៍តែប៉ុណ្ណោះ។
លោកថា៖ «យើងអនុញ្ញាតឲ្យធ្វើពិធីនៅទីតាំងដែលស្នើសុំ ប៉ុន្តែពុំមានការដង្ហែរក្បួន ដើម្បីដាក់ញាត្តិទេ តែដើម្បីដាក់បានយក នឹងសម្របសម្រួលស្នើសុំទៅសភា ដើម្បីចាត់តំណាងសភាមកទទួលញ្ញាត្តិនៅទីតាំងបា្ររព្ធពិធីតែម្ដង»។
មាត្រា៣៧ និង៤១ នៃច្បាប់រដ្ឋធម្មនុញ្ញ ចែងថា ប្រជាពលរដ្ឋគ្រប់រូបសិទ្ធិសេរីភាពក្នុងការជួបជុំ បញ្ចេញមតិ និងធ្វើកូដកម្ម បាតុកម្ម ដោយសន្តិវិធី ដែលមានការធានាដោយច្បាប់។
ជារៀងរាល់ឆ្នាំ ក្រុមសហជីពនិងសមាគម តែងតែនាំគ្នារៀបចំបា្ររព្ធទិវាពលកម្មអន្តរជាតិ១ឧសភា ដោយជួបជុំគ្នានៅទីកន្លែងសំខាន់ៗ ដូចជានៅរាជធានីភ្នំពេញ ដើម្បីសម្តែងមតិ កង្វល់ និងលើកឡើងពីសំណើរមួយចំនួនដើម្បីស្នើសុំឲ្យកែលម្អលក្ខខណ្ឌការងារនៅកម្ពុជា៕
