នាយករដ្ឋមន្ត្រីបង្ហើបថា យ៉ាងតិចមានគណបក្សនយោបាយចំនួន២១នឹងចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រនីតិកាលទី៦ដែលប្រព្រឹត្តិទៅនៅថ្ងៃទី២៩ខែកក្កដាខាងមុខនេះ។
លោកនាយករដ្ឋមន្ត្រី ហ៊ុន សែន សរសេរនៅលើគេហទំព័រហ្វេសប៊ុក របស់លោកថា ពេលនេះមានគណបក្ស៣ហើយដែលបានចុះបញ្ជីរួចរាល់ក្នុងការចូលរួមប្រកួតប្រជែងក្នុងការបោះឆ្នោតថ្ងៃទី២៩កក្កដា២០១៨ខាងមុខនេះគឺគណបក្សប្រជាជនកម្ពុជា គណបក្សសញ្ជាតិកម្ពុជា និង គណបក្សយុវជនកម្ពុជា។
លោក ហ៊ុន សែន ឲ្យដឹងទៀតថា គណបក្ស៦ទៀត បានបញ្ជាក់ជំហរចុះបញ្ជីចូលរួមប្រកួតប្រជែងការបោះឆ្នោតនេះ ដោយថា ពួកគេបានរៀបចំប្រាក់កក់១៥លានរៀល នៅរតនាគាជាតិនៃកម្ពុជា។ លោកថា សរុបទាំងអស់ មានគណបក្សនយោបាយចំនួន២១ កំពុងបំពេញបែបបទ។