រដ្ឋាភិបាលច្រានចោលការអះអាងថា តំបន់ថ្ម៣ដុំនៅខេត្តតាកែវ របស់កម្ពុជា ត្រូវបានកាត់ឲ្យទៅវៀតណាម កាលពីខែមុន តាមរយៈការបោះបង្គោលព្រំដែនថ្មីៗ នៅតំបន់នោះ។
នៅសប្តាហ៍នេះ អ្នកប្រើប្រាស់បណ្តាញសង្គមមួយចំនួន បានចែករំលែកតៗគ្នាថា ដីនៅតំបន់ថ្ម៣ដុំ ស្ថិតក្នុងឃុំក្រសាំង ស្រុកបុរីជលសា ខេត្តតាកែវ ត្រូវរដ្ឋាភិបាលកាត់ឲ្យទៅវៀតណាម កាលពីថ្ងៃទី១៩ខែមេសា ។
អ្នកប្រើប្រាស់បណ្តាញសង្គមសំអាងថា បង្កោលព្រំដែនថ្មីៗជាច្រើន បានបោះចូលតំបន់នោះ ចន្លោះបង្គោលលេខ ២៦៦ ដល់បង្គោលលេខ ២៦៧ ។
អភិបាលខេត្តតាកែវ លោក អ៊ូច ភា និងអធិការស្រុកបុរីជលសា លោក ឃុត ធិន សុំមិនធ្វើអត្ថាធិប្បាយលើការអះអាងនេះទេ ដោយមន្ត្រីមូលដ្ឋានទាំងពីររូបនេះ ជំរុញដូចគ្នាឲ្យ សួរបញ្ជាក់ទៅគណៈកម្មាធិការព្រំដែន។
ប្រធានគណៈកម្មាការព្រំដែនកម្ពុជា លោក វ៉ា គឹមហុង អះអាងថា ក្រុមបច្ចេកទេសកម្ពុជាវៀតណាម ពិតជាបានបោះបង្គោលបន្ថែមតំបន់នោះពិតមែន ប៉ុន្តែលោកថា មិនមែនបោះបង្គោលកាត់ដី នៅតំបន់ថ្ម៣ដុំនោះ ឲ្យទៅវៀតណាមទេ។ នៅពេលសួរថា តើបង្គោលបោះថ្មីនោះ បានចូលក្នុងទឹកដីដែលកម្ពុជាធ្លាប់កាន់កាប់យូរមកហើយ ឬក៏យ៉ាងណា លោកថា ភាគីទាំងពីរនៅពិភាក្សាគ្នានៅឡើយ។
លោកថា៖«យើងបោះមែន តែយើងបោះបង្គោលបំពេញបន្ថែម។បង្គោលតូចទេ មិនមែនបង្គោលធំទេ។ ទេអ្នកនិយាយគ្នាវាមិនដឹងយើងទៅបន្ទោសគ្នាវាមិនកើត។ គ្រាន់តែឃើញបោះពួកហ្នឹងចេះតែភ័យ ចេះតែទាញសេចក្តីសន្និដ្ឋានខ្លួនឯងទៅ យើងមិនថាអីទេ។ ប៉ុន្តែតំបន់ហ្នឹងមិនទាន់សម្រេចនៅឡើងទេ នៅកំពុងចរចាគ្នាធ្វើកិច្ចការហ្នឹង ។
រដ្ឋាភិបាលធ្លាប់ច្រានចោលម្តងហើយ កាលពីឆ្នាំ២០១៦ ពេលមានព័ត៌មានផ្សាយពេលនោះថាតំបន់ថ្ម៣ដុំ របស់ខ្មែរ ជាប់ព្រំដែនមួយនេះ មួយផ្នែកត្រូវវៀតណាម រំលោភគ្រប់គ្រង។
កន្លងទៅអតីតបក្សប្រឆាំង ធ្លាប់ចោទរដ្ឋាភិបាលថា ការបោះបង្គោលព្រំដែន កម្ពុជាបានបាត់បង់ទឹកដីបន្ថែមទៀតទៅប្រទេសវៀតណាម។
ក៏ប៉ុន្តែមន្ត្រីមួយចំនួនដែលសកម្មក្នុងការរិះគន់ពីបញ្ហាព្រំដែននេះមាន លោក ហុង សុខហួរ និងលោក អ៊ុំ សំអាន ជាដើម ត្រូវរដ្ឋាភិបាលចាប់ឃុំខ្លួន នៅពន្ធនាគារព្រៃសរ ចោទពីបទញុះញង់ឲ្យមានចលាចលក្នុងសង្គម។
អ្នកវិភាគនយោបាយ លោក បណ្ឌិត មាស នី ឲ្យVODដឹងកាលពីសប្តាហ៍មុនថា ការបោះបង្គោលព្រំដែន ជាអាយុជិវិតជាតិ ។លោកថា បើរដ្ឋាភិបាលឆកល្វែង ឬចាញ់ប្រៀបប្រទេសជិតខាង និងជំរុញឲ្យពលរដ្ឋអស់ជំនឿ និងជាឱកាសរបស់គណបក្សផ្សេងយកទៅលាតត្រដាង ដើម្បីទាញប្រជាប្រិយភាព ។
កម្ពុជា និងវៀតណាម មានព្រំប្រទល់ដីគោកជាប់គ្នា ប្រវែង១២៧០គីឡូម៉ែត។ រដ្ឋាភិបាលអះអាងថា មកដល់ពេលនេះការបោះបង្គោលព្រំដែនបានជាង៨០ភាគរយហើយ នៅសល់ជាង១០ភាគរយទៀត កម្ពុជានឹងបន្តភាក្សា ដើម្បីបោះបញ្ចប់។ប៉ុន្តែ លោក វ៉ា គឹមហុង អះអាងថា បើមានការរំលោភបំពាន កម្ពុជានឹងប្តឹងទៅតុលាការអន្តរជាតិ។
