លោកនាយករដ្ឋមន្ត្រី ហ៊ុន សែន បានចំអកទៅមេដឹកនាំសហជីពមួយចំនួនថា បានដឹកនាំហែរក្បួនទាមទារលក្ខខណ្ឌការងារ ដើម្បីតម្រូវចិត្តម្ចាស់ជំនួយ ដោយថា ការទាមទារលក្ខខណ្ឌការងារមិនចាំបាច់ដើរហែរក្បួននោះឡើយ។
ក្នុងពិធីសំណេះសំណាលជាមួយក្រុមកម្មករ-កម្មការិនីនៅឯស្រុកអង្គស្នួល ខេត្តកណ្ដាល នៅព្រឹកថ្ងៃនេះ លោក ហ៊ុន សែន បានថ្លែងថា មេដឹកនាំសហជីពមួយចំនួន តែងតែស្នើសុំដឹកនាំកម្មករ-កម្មការិនី ដើរហែរក្បួននៅរាជធានីភ្នំពេញ នៅចំទិវាពលកម្មអន្តរជាតិ ១ឧសភា។ លោកបានហៅសកម្មភាពបែបនេះថា ត្រូវបានធ្វើឡើងដើម្បីតម្រូវចិត្តម្ចាស់ជំនួយ ជាថ្នូរនឹងលុយជំនួយសម្រាប់ស្ថាប័នតែប៉ុណ្ណោះ។
លោកនាយករដ្ឋមន្ត្រី ហ៊ុន សែន
បើទោះបីជាលោក ហ៊ុន សែន ពុំបានបញ្ចេញឈ្មោះមេដឹកនាំសហជីពណាមួយជាក់លាក់ក៏ដោយ ប៉ុន្តែ លោកហាក់សំដៅដល់ប្រធានសហភាពការងារកម្ពុជា លោក អាត់ ធន់ ដែលត្រូវបានដឹងថា លោកបានស្នើសុំអាជ្ញាធររាជធានីភ្នំពេញ ដង្ហែរក្បួនទៅកាន់វិមានរដ្ឋសភា នៅចំទិវាពលកម្មអន្តរជាតិ ១ ឧសភា។
ទោះជាយ៉ាងណា មេដឹកនាំសហជីពរូបនេះ បានបដិសេធទៅនឹងការចោទប្រកាន់ពីសំណាក់លោកនាយករដ្ឋមន្ត្រី ហ៊ុន សែន ដោយថា សំណើសុំដង្ហែរក្បួននាពេលកន្លងមក មានបំណងទាមទារលក្ខខណ្ឌការងារតែប៉ុណ្ណោះ។
ប្រធានសហភាពការងារកម្ពុជា លោក អាត់ ធន់
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មានប្រសាសន៍ថា ការលើកឡើងរបស់លោកនាយករដ្ឋមន្ត្រីហ៊ុន សែន អាចធ្វើឲ្យសហគមន៍អន្តរជាតិវាយតម្លៃថា រដ្ឋាភិបាលមិនសូវយកចិត្តទុកដាក់ដល់កម្មករ ឲ្យពួកគេទទួលបានសិទ្ធិស្របតាមច្បាប់ជាតិ និងអន្តរជាតិ។
លោកមានប្រសាសន៍ថា៖ «ការលើកឡើងរបស់សម្តេច វាអាចធ្វើឲ្យសហគមន៍អន្តរជាតិ សង្គមជាតិមួយចំនួន តំបន់មួយចំនួន គេគិតថា ប្រទេសកម្ពុជាមិនមានឆន្ទៈនៅក្នុងការលើកកម្ពស់សិទ្ធិកម្មករ ដូចអ្វីដែលខ្លួនបានផ្តល់សញ្ចាប័ន អ្វីដែលខ្លួនបានរៀបចំជាច្បាប់ការងារ អ្វីដែលខ្លួនបានរៀបចំជាយន្តការដោះស្រាយវិវាទ ឬក៏ការទប់ស្កាត់នូវការជួញដូរ ការកេងប្រវ័ញកំលាំងពលកម្មទេ»។
ជារៀងរាល់ឆ្នាំ ក្រុមសហជីព និងសមាគម តែងតែនាំគ្នារៀបចំបា្ររព្ធទិវាពលកម្មអន្តរជាតិ ១ឧសភា ដោយជួបជុំគ្នានៅទីកន្លែងសំខាន់ៗ ដូចជានៅរាជធានីភ្នំពេញ ដើម្បីសម្តែងមតិ កង្វល់ និងស្នើសុំឲ្យកែលម្អលក្ខខណ្ឌការងារសម្រាប់កម្មករ-កម្មការិនីកម្ពុជា៕