លោកនាយករដ្ឋមន្ត្រី ហ៊ុន សែន បានថ្លែងថា ការរំលាយគណបក្សសង្គ្រោះជាតិមិនឲ្យប្រកួតប្រជែងការបោះឆ្នោតជាមួយបក្សកាន់អំណាច គឺដើម្បីបញ្ជៀសកុំឲ្យមានសង្គ្រាមកើតឡើងនៅកម្ពុជា។
នាយករដ្ឋមន្ត្រីមន្ត្រីថ្លែងបែបនេះ បន្ទាប់ពីអតីតមេដឹកនាំបក្សប្រឆាំង លោក សម រង្ស៊ី បានសរសេរសារក្នុងហ្វេសប៊ុករបស់លោកកាលពីម្សិលមិញ ដោយជំរុញទៅប្រជាពលរដ្ឋកុំទៅបោះឆ្នោតនាថ្ងៃទី២៩ ខែកក្កដាខាងមុខនេះ ប៉ុន្តែ លោកថា អ្នកដែលទៅបោះឆ្នោត នឹងក្លាយជាជនក្បត់ជាតិ ព្រោះលោក ហ៊ុន សែន ជាមេក្លោង។
ក្នុងពិធីសំណេះសំណាលជាមួយកម្មករ-កម្មការិនី នៅស្រុកអង្គស្នួល ខេត្តកណ្តាល នាព្រឹកថ្ងៃទី៥ កក្កដានេះ លោក ហ៊ុន សែន បានថ្លែងបែបឌឺដងទៅមេដឹកនាំអតីតបក្សប្រឆាំងថា ការរំលាយគណបក្សសង្គ្រោះជាតិ គឺដើម្បីកុំឲ្យមានសង្គ្រាមកើតឡើង ដោយលោកចាត់ទុកថា អតីតបក្សប្រឆាំងមួយនេះថា ធ្វើនយោបាយលាបពណ៌បក្សកាន់អំណាច។
លោកនាយករដ្ឋមន្ត្រី ហ៊ុន សែន
អតីតតំណាងរាស្ត្រគណបក្សប្រឆាំង លោក អ៊ូ ច័ន្ទរ័ត្ន មានប្រសាសន៍ថា បើអតីតគណបក្សសង្គ្រោះជាតិបានប្រកួតប្រជែងការបោះឆ្នោតជាមួយបក្សកាន់អំណាច កម្ពុជាមិនមានសង្គ្រាមនោះទេ ដោយថា បក្សនេះដឹកនាំក្រោមមាគ៌ាលទ្ធិប្រជាធិបតេយ្យ។
អតីតតំណាងរាស្ត្រគណបក្សប្រឆាំង លោក អ៊ូ ច័ន្ទរ័ត្ន
ប្រធានក្រុមអ្នកវិភាគវ័យក្មេង ហង្ស វិទូ បានវិភាគថា បើអ្នកនយោបាយនៅតែបន្តលាបពណ៌គ្នាទៅវិញទៅមក នឹងធ្វើឲ្យបរទេសឆ្មក់ឱកាសទាញយកប្រយោជន៍ពីកម្ពុជា។
លោកមានប្រសាសន៍ថា៖ «ខ្ញុំមិនជឿទេ ខ្ញុំជឿថា ទោះបីជាសង្គ្រោះជាតិនៅក៏ដោយ ឲ្យតែមានការបោះឆ្នោតត្រឹមត្រូវ មានការគោរពសិទ្ធិមនុស្ស មានការផ្តល់យុត្តិធម៌នៅក្នុងសង្គមវាមិនអាចទេ គ្មានអ្នកណាគេទៅធ្វើសង្គ្រាមទេ»។
គណបក្សនយោបាយចំនួន ២០ បានចុះឈ្មោះរួចរាល់ហើយសម្រាប់ចូលរួមប្រកួតប្រជែងការបោះឆ្នោតនៅចុងខែកក្កដានេះ ប៉ុន្តែ គ្មានទេវត្តមានអតីតគណបក្សសង្គ្រោះជាតិ ដែលជាគូប្រជែងធំបំផុតរបស់គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន នោះ បន្ទាប់ពីអតីតបក្សប្រឆាំងដ៏ធំមួយនេះ ត្រូវបានរំលាយចោលកាលពីឆ្នាំមុន និងហាមឃាត់ថ្នាក់ដឹកនាំ១១៨រូប មិនឲ្យចូលរួមប្រកួតប្រជែងក្នុងឆាកនយោបាយរយៈពេល៥ឆ្នាំទៀតផង៕