គណៈកម្មាធិការជាតិរៀបចំការបោះឆ្នោត និងគណបក្សកាន់អំណាច ពុំទាន់មានចំណាត់ការណាមួយនៅឡើយទេ បន្ទាប់ពីរបាយការណ៍មួយបានបង្ហាញថា ភ្នាក់ងារចារកម្មចិនកំពុងឃ្លាំមើល និងលួចយកទិន្នន័យពីស្ថាប័នបោះឆ្នោតនៅកម្ពុជា។
កាលពីថ្ងៃម្សិលមិញ ក្រុមហ៊ុនសន្ដិសុខតាមប្រព័ន្ធអ៊ិនធឹណិត Fire Eye ដែលមានមូលដ្ឋាននៅសហរដ្ឋអាមេរិក បានបង្ហាញរបាយការណ៍សិក្សាស្រាវជ្រាវរបស់ខ្លួន ដោយរកឃើញថា ក្រុមលួចព័ត៌មានបច្ចេកវិទ្យាចិនឈ្មោះ «TEMP PERISCOPE» កំពុងតែលុកលុយ និងលួចយកទិន្នន័យពីស្ថាប័ន គ.ជ.ប និងស្ថាប័នដទៃទៀត ដូចជា ក្រសួងមហាផ្ទៃ ក្រសួងការបរទេសកម្ពុជា ក្រសួងសេដ្ឋកិច្ច និងហិរញ្ញវត្ថុ ស្ថាប័នព្រឹទ្ធសភា និងស្ថាប័នសារព័ត៌មានផ្សេងទៀត។
ក្រុមហ៊ុនសន្ដិសុខតាមប្រព័ន្ធអ៊ីនធើណែតអាមេរិក រកឃើញទៀតថា ក្រុមចារកម្មចិនកំពុងឃ្លាំមើលយ៉ាងដិតដល់លើការបោះឆ្នោតនៅកម្ពុជា និងថែមទាំងបានព្យាយាមលួចទិន្នន័យពីកូនស្រីអតីតមេដឹកនាំបក្សប្រឆាំង លោក កឹម សុខា គឺកញ្ញា កឹម មនោវិទ្យា ទៀតផង។
អ្នកនាំពាក្យ គ.ជ.ប. លោក ឌឹម សុវណ្ណារុំ ប្រាប់ថា លោកកំពុងសិក្សាពីបញ្ហានេះនៅឡើយ។
អ្នកនាំពាក្យ គ.ជ.ប. លោក ឌឹម សុវណ្ណារុំ
ចំណកអ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុករបាយការណ៍នេះថា អាចជាព័ត៌មានមិនពិត និងមានហេតុផលនយោបាយ និងថា អាជ្ញាធរកម្ពុជាត្រូវសិក្សាឲ្យបានដិតដល់ មុននឹងមានវិធានការណាមួយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
វីអូឌីបានទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ប៉ុន្ដែ ទូរសព្ទចូលគ្មានអ្នកទទួល។
ក្នុងសន្និសីទសារព័ត៌មាននៅទីក្រុងប៉េកាំងកាលពីថ្ងៃម្សិលមិញ អ្នកនាំពាក្យក្រសួងការបរទេសចិន លោកស្រី ហួ ឈុនយីង បានថ្លែងថា ចិនមិនលូកលាន់កិច្ចការបោះឆ្នោតនៅកម្ពុជានោះឡើយ។
ប្រធានក្រុមអ្នកវិភាគនយោបាយវ័យក្មេង លោក ហង្ស វិទូ ក្រើនរំលឹកថា រដ្ឋាភិបាលកម្ពុជាគួរមានការប្រុងប្រយ័ត្នខ្ពស់ចំពោះបញ្ហានេះ ដោយថា អាចនាំឲ្យប៉ះពាល់ដល់សន្ដិសុខជាតិ និងការបោះឆ្នោតនាពេលខាងមុខនេះ។
ប្រធានក្រុមអ្នកវិភាគនយោបាយវ័យក្មេង លោក ហង្ស វិទូ
បើតាមរបាយការណ៍នេះ ក្រុមចារកម្មចិន TEMP PERISCOPE កំពុងធ្វើការនេះឲ្យរដ្ឋាភិបាលចិន និងធ្លាប់លួចយកព័ត៌មានពីបណ្ដាក្រុមហ៊ុន និងស្ថាប័នផ្សេងទៀត នៅសហរដ្ឋអាមេរិក អឺរ៉ុប តៃវ៉ាន់ និងហុងកុងជាដើម៕
