អង្គការសង្គមពលរដ្ឋ ដែលមានមូលដ្ឋាននៅក្រៅប្រទេស បានចេញលិខិតចំហរមួយ អំពាវនាវទៅរដ្ឋាភិបាលពន្យារពេលបោះឆ្នោត និងបង្កើតឧត្តមក្រុមប្រឹក្សាឯករាជ្យមួយ ដើម្បីរកដំណោះស្រាយវិបត្តិនយោបាយនៅកម្ពុជា ដោយថា ដើម្បីទប់ស្កាត់ការហ៊ុមព័ទ្ធសេដ្ឋកិច្ច និងស្តារមុខមាត់ត្រកូល ហ៊ុន។
ក្នុងលិខិតចំហរបស់គាត់ លោក តាកែវ ឬទ្ធិពល ដែលអះអាងថា ជាខ្មែរអ្នកដឹកនាំអង្គការសង្គមពលរដ្ឋនៅសហរដ្ឋអាមេរិក ចុះផ្សាយកាលពីថ្ងៃទី៧ ខែកក្កដានោះ បានអំពាវនាវទៅរដ្ឋាភិបាល ឲ្យបង្កើតឧត្តមក្រុមប្រឹក្សាព្រះរាជាណាចក្រ និងអាជ្ញាធរអន្តរកាលឯកភាពជាតិខ្មែរ ក្នុងបរិយាកាសអន្តរកាលមួយ ១ឆ្នាំ ឬ ១ឆ្នាំកន្លះ (២០១៨-២០១៩) ដើម្បីដោះស្រាយបញ្ហាប្រទេសជាតិបច្ចុប្បន្ន និងរៀបចំការបោះឆ្នោតថ្នាក់ជាតិដោយសេរី និងត្រឹមត្រូវនៅចុងឆ្នាំ២០១៩ ឬដើមឆ្នាំ២០២០ ដើម្បីរក្សាកិត្តិយសលោកនាយករដ្ឋមន្ត្រី ហ៊ុន សែន និងវង្សត្រកូល ហ៊ុន កុំឲ្យគេចោទថា ជាជនផ្តាច់ការ គ្រួសារនិយម និងកុម្មុយនីស្តជាដើម។
លិខិតចំហរនោះ ស្នើឡើងថា អាជ្ញាធរអន្តរកាលឯកភាពជាតិខ្មែរ ត្រូវស្ថិតនៅក្រោមអំណាចឧត្តមក្រុមប្រឹក្សាព្រះរាជាណាចក្រ ហើយអាចមានសមាសភាពចូលរួម ដូចជា ព្រះមហាក្សត្រ ជាព្រះប្រមុខ ថ្នាក់ដឹកនាំបក្សកាន់អំណាច គណបក្សហ៊្វុនស៊ិនប៉ិច អតីតបក្សសង្គ្រោះជាតិ និងក្រុមតំណាងសង្គមស៊ីវិលជាដើម។
តំណាងរាស្ត្រអតីតគណបក្សសង្គ្រោះជាតិ លោក អ៊ូ ច័ន្ទរ័ត្ន គាំទ្រនឹងការលើកឡើងរបស់លិខិតចំហរនោះ ដោយលោកថា គណបក្សប្រឆាំងនៅតែប្រកាន់ជំហរស្វែងរកការចចារពីបក្សកាន់អំណាច ដើម្បីឲ្យការបោះឆ្នោតនៅកម្ពុជា មានភាពសេរី និងយុត្តិធម៌ ហើយត្រូវបានអន្តរជាតិទទួលស្គាល់។
តំណាងរាស្ត្រអតីតគណបក្សសង្គ្រោះជាតិ លោក អ៊ូ ច័ន្ទរ័ត្ន
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលការអំពាវនាវរបស់លិខិតចំហរ និងមន្ត្រីជាន់ខ្ពស់អតីតបក្សប្រឆាំងដែលចង់ឲ្យមានការពន្យារពេលបោះឆ្នោត និងដោះស្រាយវិបត្តិនយោបាយនៅកម្ពុជា ដោយថា កម្ពុជានៅតែបោះឆ្នោតតាមការកំណត់របស់រដ្ឋាភិបាល និងគ្មានវិបត្តិនយោបាយណាមួយកើតឡើងនោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
អ្នកវិភាគវិទ្យាសាស្ត្រនយោបាយលោក ឯម សុវណ្ណារ៉ា វិភាគថា បើរដ្ឋាភិបាលមិនដោះស្រាយវិបត្តិនយោបាយនៅកម្ពុជាមុនការបោះឆ្នោតទេ គឺនៅក្រោយការបោះឆ្នោត កម្ពុជានឹងរងសម្ពាធពីសហគមន៍អន្តរជាតិ។
អ្នកវិភាគវិទ្យាសាស្ត្រនយោបាយលោក ឯម សុវណ្ណារ៉ា
ការបោះឆ្នោតជាតិជ្រើសរើសតំណាងរាស្រ្តសភានឹងប្រព្រឹត្តទៅនាថ្ងៃទី២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០បក្ស ប៉ុន្តែ ការបោះឆ្នោតនេះ ស្ថិតនៅក្រោមការរិះគន់ពីសំណាក់សហរដ្ឋអាមេរិក និងសហភាពអឺរ៉ុប ខណៈគណបក្សប្រឆាំងដ៏ធំមិនត្រូវបានអនុញ្ញាតឲ្យចូលរួមប្រកួតប្រជែងនោះឡើយ៕