គណៈកម្មាធិការជាតិរៀបចំការបោះឆ្នោត គ.ជ.ប. បានអះអាងថា យុទ្ធនាការឃោសនាបោះឆ្នោត ៥ថ្ងៃមកនេះ មានតែ ១៣គណបក្សប៉ុណ្ណោះ បានធ្វើពិធីហែរក្បួន ស្វែងរកការទាក់ទាញពីមហាជន ក្នុងចំណោម ២០គណបក្ស ដែលបានចុះឈ្មោះប្រកួតប្រជែង។
ការបោះឆ្នោតជ្រើសតាំងតំណាងរាស្ត្រនីតិកាលទី៦នេះ គណបក្សនយោបាយនីមួយៗ មានពេល ២១ថ្ងៃសម្រាប់ធ្វើយុទ្ធនាការឃោសនារកសំឡេងឆ្នោត គឺចាប់ពីថ្ងៃទី៧ ដល់ថ្ងៃទី២៧ ខែកក្កដា។
ប៉ុន្តែ សមាជិក គ.ជ.ប និងជាអ្នកនាំពាក្យ លោក ហង្ស ពុទ្ធា ប្រាប់VODថា គិតត្រឹមថ្ងៃពុធម្សិលមិញ ដែលជាថ្ងៃទី៥ នៃយុទ្ធនាការរកសំឡេងឆ្នោតនោះ លោកថា មានតែគណបក្សចំនួន ១៣ប៉ុណ្ណោះបានធ្វើពិធីហែរក្បួន។
អ្នកនាំពាក្យរូបនេះ អះអាងទៀតថា គណបក្សចំនួន ៧ទៀត ដែលមិនទាន់ចេញហែរក្បួន ក៏មិនបានប្រាប់ពីមូលហេតុមក គ.ជ.ប. ដែរ។
សមាជិក គ.ជ.ប និងជាអ្នកនាំពាក្យ លោក ហង្ស ពុទ្ធា
ប្រធានគណបក្សពន្លឺថ្មី លោក នួន សុខាវី លោកថាគណបក្សលោកមិនជ្រើសរើសយកការហែរក្បួនសម្រាប់ស្វែងរកសម្លេងឆ្នោតទេ ដោយថាជម្រើសនេះជាការចំណាយលុយឥតប្រយោជន៍។
លោក នួន សុខាវី បញ្ជាក់ថាគណបក្សលោកចុះពន្យល់ពលរដ្ឋនៅតាមមូលដ្ឋានអោយយល់ពីគោលនយោបាយរបស់លោកប្រសើរជាង។
ប្រធានគណបក្សពន្លឺថ្មី លោក នួន សុខាវី
ទោះជាយ៉ាងណា មេដឹកនាំគណបក្សថ្មីរូបនេះ អះអាងថា ជម្រើសបែបនេះ នឹងមិនអាចយកឈ្នះគណបក្សកាន់អំណាចទេ តែថាអាចបានអាសនៈខ្លះក្នុងសភា បើពលរដ្ឋយល់ពីគោលនយោបាយរបស់បក្សលោកនោះ។
ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុន អះអាងថា ការមិនទាន់ចេញហែរក្បួនតាមដងផ្លូវរយៈពេល ៦ថ្ងៃមកនេះ ដោយសារតែមិនចង់ឃើញការកកស្ទះចរាចរណ៍ក្នុងរាជធានីភ្នំពេញ ព្រោះថា គណបក្សជាច្រើនបាន និងកំពុងហែរក្បួនដែរ។
លោកបង្ហាញក្តីសង្ឃឹមថា គណបក្សរបស់លោកអាចនឹងដណ្តើមបានអាសនៈខ្លះ តាមរយៈគោលនយោបាយសំខាន់ៗ ដែលបានដាក់ចេញ។
ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុន
យុទ្ធនាការឃោសនារកសំឡេងឆ្នោតរបស់គណបក្សនយោបាយរយៈពេល ៥ថ្ងៃមកនេះ គណបក្សខ្លះមានលទ្ធភាពប្រើរថយន្តទំនើបៗដើម្បីឃោសនា គណបក្សខ្លះថែមទាំងយករថយន្តរបស់រដ្ឋចេញទៅឃោសនាផ្ទុយពីបំរាមនាយករដ្ឋមន្ត្រី។ ចំណែកគណបក្សខ្លះទៀត បានត្រឹមដាក់ឧបករណ៍បំពងសំឡេងលើម៉ូតូកង់ ៣ ចាក់តាមស្តុប ខ្លះចាក់មេក្រូនៅតាមផ្ទះ និងខ្លះទៀតដើរចែកខិតប័ណ្ណជាដើម។
មន្ត្រីឃ្លាំមើលការបោះឆ្នោតនៅអង្គការខុមហ្វ្រែល លោក កន សាវាង្ស ពន្យល់ថា ដើម្បីឲ្យការប្រកួតប្រជែងស្មើភាពគ្នា ធានាដល់ភាពត្រឹមត្រូវ និងយុត្តិធម៌នៃការបោះឆ្នោតនោះ រដ្ឋត្រូវធ្វើច្បាប់កំណត់កញ្ចប់ថវិកាជាតិឲ្យគណបក្សនយោបាយនីមួយៗ សម្រាប់ពេលឃោសនា ត្រូវធានាថា ការប្រកួតប្រជែងនោះ គ្មានការគំរាមកំហែងផ្នែកនយោបាយ និងមានការចូលរួមសង្កេតការពីអង្គការសង្គមស៊ីវិលជាតិ និងអន្តរជាតិ៕
