រដ្ឋាភិបាលកម្ពុជា តាមរយៈក្រសួងការបរទេស បានរិះគន់អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ថា មាននិន្នាការនយោបាយទៅរកអតីតបក្សប្រឆាំង បន្ទាប់ពីលោកស្រីបានបកស្រាយជុំវិញការបញ្ចេញមតិអំពីការពហិការមិនទៅបោះឆ្នោត។
ក្នុងសេចក្ដីថ្លែងការណ៍មួយកាលពីម្សិលមិញ ក្រសួងការបរទេសកម្ពុជារិះគន់ថា លោកស្រី រ៉ូណា ស្មីត ហាក់កំពុងគាំទ្រយុទ្ធនាការម្រាមដៃស្អាត របស់លោក សម រង្ស៊ី និងក្រុមមេដឹកនាំអតីតបក្សប្រឆាំងនៅក្រៅប្រទេស ដែលបង្រៀនពលរដ្ឋកុំឲ្យចេញទៅបោះឆ្នោត ឲ្យគូសឆូតសន្លឹកឆ្នោតចោល ឬធ្វើឲ្យសន្លឹកឆ្នោតនោះ មិនបានការជាដើម។
ក្រសួងការបរទេសកម្ពុជារិះគន់ទៀតថា អ្នករាយការណ៍ពិសេសអង្គការសហប្រជាជាតិរូបនេះ ហាក់មិនអើពើ ឬបង្ហាញក្ដីកង្វល់ណាមួយ ជុំវិញការអំពាវនាវរបស់លោក សម រង្ស៊ី ឲ្យកម្លាំងប្រដាប់អាវុធងើបបះបោរប្រឆាំងរដ្ឋាភិបាល ការញុះញង់ឲ្យស្អប់ជនជាតិចិន និងជនបរទេស និងការជំរុញជាតិនិយម ដែលថា ធ្វើឲ្យប៉ះពាល់ដល់ទំនាក់ទំនងជាមួយប្រទេសជិតខាង។
ក្នុងសេចក្ដីថ្លែងការណ៍ដដែល ក្រសួងការបរទេសកម្ពុជាចោទលោកស្រី រ៉ូណា ស្មីត ថា មានភាពលម្អៀងនយោបាយទៅរកអតីតគណបក្សសង្គ្រោះជាតិ និងស្នើឲ្យលោកស្រី ប្រកាន់ខ្ជាប់ក្រមវិជ្ជាជីវៈ ក្នុងនាមជាអ្នករាយការណ៍ពិសេសរបស់អង្គការសហប្រជាជាតិ។ មួយវិញទៀត ក្រសួងការបរទេសក៏ច្រានចោលការលើកឡើងថា អាជ្ញាធរបានគំរាមកំហែងមិនផ្ដល់សេវាសាធារណៈជូនពលរដ្ឋ ដែលមិនបោះឆ្នោតឲ្យគណបក្សប្រជាជន។
នាយកប្រតិបត្តិអង្គការណិចហ្វិច លោក សំ គន្ធាមី មានប្រសាសន៍ថា កង្វល់របស់អ្នករាយការណ៍ពិសេសអង្គការសហប្រជាតិគឺជារឿងត្រឹមត្រូវ និងឆ្លុះបញ្ចាំងស្ថានភាពពិតនៅកម្ពុជា។ លោកថា វានឹងប៉ះពាល់ដល់មុខមាត់កម្ពុជានៅលើឆាកអន្ដរជាតិ បើសិនរដ្ឋាភិបាលមិនឆ្លើយតបជាវិជ្ជមាននឹងក្ដីកង្វល់ទាំងនេះ។
ពាក់ព័ន្ធនឹងស្ថានការនយោបាយមុនការបោះឆ្នោតនេះ មាននិន្នាការចំនួន ២ កំពុងប្រឈមមុខដាក់គ្នា គឺរវាងគណបក្សកាន់អំណាច និងគណបក្សផ្សេងទៀត ដែលអំពាវនាវឲ្យពលរដ្ឋចេញទៅបោះឆ្នោត និងអតីតគណបក្សសង្គ្រោះជាតិ ដែលសុំឲ្យពលរដ្ឋធ្វើពហិការការបោះឆ្នោតខាងមុខ ដោយថា ជាការបោះឆ្នោតក្លែងក្លាយ បន្ទាប់ពីគ្មានអតីតបក្សប្រឆាំងចូលរួម។
ករណីនេះ ក្រសួងមហាផ្ទៃ និងគណៈកម្មាធិជាតិរៀបចំការបោះឆ្នោត (គ.ជ.ប) បានព្រមានផ្លូវច្បាប់ចំពោះអ្នកអំពាវនាវឲ្យពលរដ្ឋកុំចេញទៅបោះឆ្នោត និងការផ្សព្វផ្សាយនានាលើបណ្ដាញសង្គម ដែលនិយាយពីយុទ្ធនាការប្រឆាំងការបោះឆ្នោត។
កាលពីថ្ងៃទី២០កក្កដាកន្លងទៅ អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត បានស្នើឲ្យរដ្ឋាភិបាលកម្ពុជា ថ្កោលទោសចំពោះការបំភិតបំភ័យលើអ្នកបោះឆ្នោត និងថា ការអំពាវនាវធ្វើពហិការបោះឆ្នោតរបស់អតីតគណបក្សប្រឆាំង គឺជាសិទ្ធិស្របច្បាប់ ដែលគួរត្រូវបានអនុញ្ញាត៕
