រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង បានចាត់ទុកការដើរខ្សឹបពលរដ្ឋមិនឲ្យទៅបោះឆ្នោត ថាជាទង្វើខុសច្បាប់ និងក្រើនរំឭកឲ្យមានវិធានទប់ស្កាត់។
ក្នុងពិធីជួបសំណេះចំណាលជាមួយសកម្មជន នៅខេត្តបាត់ដំបង នាយុទ្ធនាការរកសំឡេងឆ្នោត ថ្ងៃទី២៤ខែកក្កដានេះ លោក ស ខេង បានថ្លែងថា នៅថ្ងៃទី២៨ខែកក្កដាចុងសប្តាហ៍នេះ ជាថ្ងៃ.ស.ដែលច្បាប់ តម្រូវឲ្យគណបក្សនយោបាយទាំងអស់ដែលចូលរួមប្រកួតការបោះឆ្នោត ត្រូវរក្សាភាពស្ងៀមស្ងាត់ ក្រោយពីធ្វើយុទ្ធនាការឃោសនារកសំឡេងឆ្នោតត្រឹមថ្ងៃទី ២៧ កក្កដា។
មេដឹកនាំបក្សកាន់អំណាចរូបនេះ ថ្លែងទៀតថា ទោះជាយ៉ាងណានៅថ្ងៃ.ស.នេះ អាចនឹងមានអ្នកដើរខ្សឹប ពលរដ្ឋកុំឲ្យចេញទៅបោះឆ្នោត។ លោករំឭកថាករណីនេះ សកម្មជនទាំងអស់ត្រូវចូលរួមរារាំងពួកគេដើម្បីឲ្យការបោះ ឆ្នោត នៅថ្ងៃទី២៩នោះដំណើរការទៅ ដោយសេរី ត្រឹមត្រូវ និងយុត្តិធម៌។
រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង
បើតាមគណៈកម្មការរៀបចំការបោះឆ្នោតខេត្តបាត់ដំបង គិតត្រឹមថ្ងៃអង្គារនេះ អតីតសកម្មជនបក្សប្រឆាំង ៥នាក់ ត្រូវបានគណបក្សកាន់អំណាចនៅខេត្តនេះប្តឹង ដោយសារពួកគេជួបជុំគ្នាធ្វើយុទ្ធនាការម្រាមដៃស្អាតតាមបណ្តាញសង្គម។
ប៉ុន្តែអតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានហៅការលើកឡើង របស់មេដឹកនាំបក្សកាន់អំណាចនេះថា កំពុងដើរផ្ទុយពីយន្តការប្រជាធិបតេយ្យ។ លោកថា ការជួបប្រជុំ ការជជែកគ្នាជាក្រុម ឬតស៊ូមតិដោយសន្តិវិធី ជាសេរីភាពបញ្ចេញមតិ ដែលការពារដោយរដ្ឋធម្មនុញ្ញ ។
លោក អ៊ូ ច័ន្ទរ័ត្ន រំឭកថា រដ្ឋាភិបាលគួរតែពិចារណាឡើងវិញ រៀបចំប្រព័ន្ធបោះឆ្នោតមួយមានការគាំទ្រពីពលរដ្ឋគ្រប់និន្នាការនយោបាយ និងមានការគាំទ្រពីសហគមន៍អន្តរជាតិ នោះទើបចាត់ទុកថាជាការខំប្រឹងប្រែងរបស់រដ្ឋាភិបាលធ្វើឡើងដើម្បីការពារប្រយោជន៍ជាតិ។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន
អ្នករាយការណ៍ពិសេស របស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត បានសរសេរលើទំព័រហ្វេសប៊ុករបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា កាលពីសប្តាហ៍មុនថា លោកស្រីព្រួយបារម្ភពីការព្រមានផ្លូវច្បាប់របស់មន្រ្តីរដ្ឋាភិបាល ទៅលើប្រជាពលរដ្ឋជុំវិញការសម្ដែងមតិ ធ្វើពហិការមិនទៅបោះឆ្នោត ។