គណៈកម្មាធិការជាតិគ្រប់គ្រងគ្រោះមហន្តរាយអះអាងថា អាជ្ញាធរនឹងជម្លៀសប្រជាពលរដ្ឋជាង ៥០០០ គ្រួសារនៅក្នុងស្រុកសៀមប៉ាងចេញទៅទីទួលសុវត្ថិភាព បន្ទាប់ពីទឹកជំនន់ហូរធ្លាក់ពីប្រទេសឡាវចូលក្នុងស្រុកនេះបានហក់ឡើងជាបន្តបន្ទាប់នោះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី ប្រាប់វីអូឌីនៅថ្ងៃនេះថា អាជ្ញាធរខេត្តស្ទឹងត្រែងបានជម្លៀសប្រជាពលរដ្ឋចំនួន ១២៨៩ គ្រួសារចេញទៅទីទួលសុវត្ថិភាពរួចហើយ។ លោកបន្តថាអាជ្ញាធរនឹងជម្លៀសប្រជាពលរដ្ឋនៅក្នុងស្រុកសៀមប៉ាងជាង ៥០០០ គ្រួសារបន្តទៀត ប្រសិនបើទឹកជំនន់នៅតែហក់ឡើង។
លោកបន្តទៀតថា ក្រៅពីការជម្លៀសប្រជាពលរដ្ឋ អាជ្ញាធរបានក៏ត្រៀមស្បៀង កម្លាំង និងសម្ភារ សម្រាប់ជួយសង្គ្រោះប្រជាពលរដ្ឋផងដែរ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី
លោកបន្តថា អាជ្ញាធរជូនដំណឹងទៅប្រជាពលរដ្ឋ ត្រូវមានការប្រុងប្រយ័ត្នខ្ពស់រួមទាំងអាជ្ញាធរស្រុក-ខេត្តស្ទឹងត្រែងត្រៀមក្នុងជួយប្រជាពលរដ្ឋ បើទោះបីជាទឹកជំនន់មិនទាន់បង្កផលប៉ះពាល់ដល់ស្រុកដទៃក៏ដោយ។
អ្នកពាក្យសាលាខេត្តស្ទឹងត្រែងលោក ម៉ែន គង់ មានប្រសាសន៍ថា អាជ្ញាធរបានសហការជាមួយសង្គមស៊ីវិលនិងស្ថាប័នពាក់ព័ន្ធតៀមស្បៀងទុកសម្រាប់ធ្វើការដោះស្រាយជូនប្រជាពលរដ្ឋផងដែរ។
អ្នកពាក្យសាលាខេត្តស្ទឹងត្រែងលោក ម៉ែន គង់
លោកបន្តថា អាជ្ញាធរក៏បានជម្លៀសប្រជាពលរដ្ឋមួយចំនួននៅក្នុងស្រុកសេសានទៅទីទួលសុវត្ថិភាពខ្លះៗហើយ ដោយសារ ទឹកជំនន់បានហូរធ្លាក់ចូល បន្ទាប់ពីស្រុកសៀមប៉ាងនោះ។ បើតាមទំព័រហ្វេសប៊ុករបស់រដ្ឋបាលខេត្តស្ទឹងត្រែងឲ្យដឹងថា រហូតដល់រសៀលថ្ងៃទី២៦ ខែកក្កដានេះ ទឹកទន្លេសេកុង បានបន្តហក់ឡើងកម្ពស់ ១២.០០ម៉ែត្រ លើសកម្រិតប្រកាសអាសន្ន។
វិធានការរបស់អាជ្ញាធរក្នុងការជម្លៀសប្រជាពលរដ្ឋចេញពីលំនៅស្ថានទៅទីទួលសុវត្ថិភាពនេះ ធ្វើឡើងបន្ទាប់ពីទំនប់វារីអគ្គិសនីសេពានសេណាមណយស្ថិតនៅចំងាយប្រមាណជា៧០គីឡូម៉ែត្រពីព្រំដែនកម្ពុជា-ឡាវ បានបាក់ ខណៈដែលទំនប់វារីអគ្គិសនីនេះ មានសមត្ថភាពស្តុកទឹកបាន៥ពាន់លានម៉ែត្រគូប។
កាលពីថ្ងៃទី២៤ ខែកក្កដា កន្លងមក គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា ខេត្តដែលរងផលប៉ះពាល់ ដោយសារ ជំនន់ទឹកភ្លៀង មានចំនួន ៩ ខេត្ត ក្នុងនោះមាន ខេត្តកោះកុង កំពត កែប ព្រះសីហនុ បាត់ដំបង កំពង់ស្ពឺ តាកែវ កណ្ដាល និងរាជធានីភ្នំពេញ ដោយប៉ះពាល់ដល់ប្រជាពលរដ្ឋចំនួន ៨៩៧០ គ្រួសារ និងប៉ះពាល់ដំណាំស្រូវចំនួន ៩៥៨២ ម៉ឺនហិកតា ក្នុងនោះដំណាំស្រូវដែលខូចខាតទាំងស្រុងចំនួន ៥២ ហិកតា។
