ក្រុមអ្នកគាំទ្របក្សប្រឆាំងនៅប្រទេសលោកសេរី អះអាងថា នឹងធ្វើមហាបាតុកម្មប្រឆាំងការបោះឆ្នោតនៅកម្ពុជា ដើម្បីជំរុញទៅសហគមន៍អន្តរជាតិ កុំឲ្យទទួលស្គាល់លទ្ធផលបោះឆ្នោតនោះ។
ការបោះឆ្នោតថ្នាក់ជាតិនឹងប្រព្រឹត្តទៅនៅចុងខែកក្កដា ឆ្នាំ២០១៨នេះ ដោយពុំមានវត្តមានបក្សប្រឆាំងចូលរួមប្រកួតប្រជែងនោះទេ។
សេចក្តីប្រកាសព័ត៌មានរបស់អតីតគណបក្សសង្គ្រោះជាតិប្រចាំសហរដ្ឋអាមេរិក បានចុះផ្សាយកាលពីម្សិលមិញថា ក្រុមអ្នកគាំទ្រអតីតគណបក្សនេះ នឹងសហការជាមួយសហគមន៍ខ្មែរនៅអាមេរិកទាំងអស់ ដើម្បីរៀបចំមហាបាតុកម្មនៅមុខអគារទីស្នាក់ការអង្គការសហប្រជាជាតិ នៅទីក្រុងញូវយ៉ក នាថ្ងៃទី២៨ ខែកក្កដា។
ទោះជាយ៉ាងណានៅក្នុងសេចក្តីប្រកាសព័ត៌មានដដែល មិនបានបញ្ជាក់ពីចំនួនអ្នកចូលរួមនោះទេ។
កញ្ញា កឹម មនោវិទ្យា ដែលត្រូវជាកូនស្រីបង្កើតលោក កឹម សុខា បានអំពាវនាវក្នុងវីដេអូឃ្លីបបង្ហោះលើហ្វេសប៊ុកថ្ងៃនេះ ឲ្យប្រជាពលរដ្ឋខ្មែរនៅទូទាំងប្រទេសអាមេរិក ចូលរួមធ្វើបាតុកម្មប្រឆាំងការបោះឆ្នោតនៅកម្ពុជានាចុងខែកក្កដា ដើម្បីជំរុញឲ្យ សហគមន៍អន្តរជាតិកុំទទួលស្គាល់លទ្ធផលបោះឆ្នោតផង។
កញ្ញា កឹម មនោវិទ្យា កូនស្រីបង្កើតលោក កឹម សុខា
អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថាមិនចាប់អារម្មណ៍នឹងបាតុកម្មរបស់ក្រុមអ្នកគាំទ្រអតីតបក្សប្រឆាំងនោះទេ ដោយលោកថាបាតុកម្មនោះមិនមានឥទ្ធិពលអ្វីដល់កម្ពុជានោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
វីអូឌី មិនអាចសុំការបំភ្លឺពីអ្នកនាំពាក្យ គ.ជ.ប លោក ហង្ស ពុទ្ធា និងលោក ឌឹម សុវណ្ណារ៉ុម បានទេ។
ប្រធានក្រុមអ្នកវិភាគវ័យក្មេង លោក ហង្ស វិទូ មានប្រសាសន៍ថា ក្រុមអ្នកគាំទ្រអតីតបក្សប្រឆាំងធ្វើបាតុកម្មនៅក្រៅប្រទេសប្រឆាំងលទ្ធផលបោះឆ្នោត នឹងជំរុញឲ្យអន្តរជាតិមិនទទួលស្គាល់លទ្ធផលបោះឆ្នោតនោះ អាចនឹងមានប្រសិទ្ធិភាពក្រោយការបោះឆ្នោត។
ប្រធានក្រុមអ្នកវិភាគវ័យក្មេង លោក ហង្ស វិទូ
ការបោះឆ្នោតជាតិជ្រើសរើសតំណាងរាស្រ្តសភានឹងប្រព្រឹត្តទៅនាថ្ងៃទី២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០បក្ស ប៉ុន្តែ ការបោះឆ្នោតនេះ ស្ថិតនៅក្រោមការរិះគន់ពីសំណាក់សហរដ្ឋអាមេរិក និងសហភាពអឺរ៉ុប ខណៈគណបក្សប្រឆាំងដ៏ធំមិនត្រូវបានអនុញ្ញាតឲ្យចូលរួមប្រកួតប្រជែងនោះឡើយ។
ចំណែក សហគមន៍អន្ដរជាតិ និងប្រទេសចំនួន ៤៥ នៅក្រុមប្រឹក្សាសិទ្ធិមនុស្សអង្គការសហប្រជាជាតិ ក៏បានព្រមានមិនទទួលស្គាល់លទ្ធផលនៃការបោះឆ្នោតខាងមុខផងដែរ ប្រសិនបើគ្មានការដោះលែងអតីតមេដឹកនាំគណបក្សសង្គ្រោះជាតិ លោក កឹម សុខា និងអនុញ្ញាតឲ្យអតីតបក្សប្រឆាំង បានចូលរួមការបោះឆ្នោតឡើងវិញ ស្របតាមគោលការណ៍ប្រជាធិបតេយ្យសេរីពហុបក្ស ដូចមានចែងក្នុងរដ្ឋធម្មនុញ្ញ៕