គណៈកម្មាធិការជាតិរៀបចំការបោះឆ្នោត បញ្ជាក់នៅថ្ងៃនេះថា ពលរដ្ឋដែលត្រូវគេបង្ខំឲ្យទៅបោះឆ្នោតមានសិទ្ធិប្ដឹងអ្នកដែលបង្ខំនោះបាន។
ឆ្លើយនឹងសំណួរអ្នកសារព័ត៌មាននៅថ្ងៃនេះ អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ថ្លែងថា ប្រជាពលរដ្ឋមានសិទ្ធិប្ដឹងចំពោះជនណាម្នាក់ដែលបានបង្ខំប្រជាពលរដ្ឋឲ្យចេញបោះឆ្នោតទៅគណៈកម្មាការឃុំសង្កាត់ដែលប្រចាំការនៅទីនោះតែម្ដង។
បើសិនជាមានការចាប់បង្ខំប្រជាពលរដ្ឋឲ្យទៅបោះឆ្នោតគឺគាត់អាចប្ដឹងបាន ហើយការប្ដឹងនេះ មិនពិបាកទេ គឺប្ដឹងនៅឃុំសង្កាត់របស់គាត់តែម្ដង ព្រោះមានគណៈកម្មាការរៀបចំការបោះឆ្នោតនៅទីនោះ។ នីតិវិធីរបស់ គ.ជ.ប គឺប្ដឹងពីទីកន្លែងកើតហេតុយ៉ាងយូរ៣ថ្ងៃ ក្រោយមានបញ្ហានេះ […] ក្នុងករណី ដែលមិនពេញចិត្តការសម្រេចរបស់ខេត្ត ក៏ឡើងមកប្ដឹងនៅ គ.ជ.ប ទៀត ហើយ…មិនពេញចិត្តអាចប្ដឹងដល់ក្រុមប្រឹក្សាធម្មនុញ្ញ […]
អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា
យោងទៅតាមបញ្ជីឈ្មោះបោះឆ្នោតចុងក្រោយគេបង្អស់របស់គណកម្មាធិការជាតិរៀបចំការបោះឆ្នោត ចំនួនប្រជាពលរដ្ឋដែលបានចុះឈ្មោះបោះឆ្នោតរើសតំណាងរាស្ត្រអាណត្តិទី៦នេះ មានចំនួនជិត ៨,៤ លាននាក់៕