មេបក្សសម្ព័ន្ធថាចំណាយជាង​១លានដុល្លារក្នុងថ្ងៃឃោសនាបោះឆ្នោតចុងក្រោយ ​

មេដឹកនាំគណបក្សសម្ព័ន្ធដើម្បីប្រជាធិបតេយ្យ ហៅកាត់ថា​ (LDP) បានអះអាងថា យុទ្ធនាការឃោសនារកសំឡេងឆ្នោតថ្ងៃចុងក្រោយនេះ គណបក្សលោក​ចំណាយលុយប្រហែល១លានដុល្លារ ដោយថាលុយនេះមិនមែនជាលុយរបស់បក្សនោះទេ។

យុទ្ធនាការឃោសនារកសំឡេង​ឆ្នោតនៃគណបក្សនយោបាយ​ទាំងអស់នឹងត្រូវបញ្ចប់នៅត្រឹមថ្ងៃទី២៧ ខែកក្កដានេះ។

មេដឹកនាំគណបក្សសម្ព័ន្ធ ដើម្បីប្រជាធិតេយ្យ លោក ខឹម វាសនា ថ្លែងប្រាប់អ្នកសារព័ត៌មាននៅអំឡុងយុទ្ធ​នាការ​​ឃោសនារក​សំឡេងឆ្នោតនាព្រឹកថ្ងៃនេះថា ក្រោយពីរំលាយ​គណបក្សសង្គ្រោះជាតិ នៅអាណត្តិនេះ​ គណបក្សរបស់លោកមានសន្ទុះគាំទ្រកាន់តែខ្លាំងជាងមុន ដោយថាការគំាទ្រកើតចេញពីទឹកចិត្ត ការលះបង់ទាំងពេលវេលា និងថវិកាផ្ទាល់ខ្លួន ដើម្បីចូលរួមដង្ហែក្បួនឃោសនារកសំឡេងឆ្នោតនាថ្ងៃចុង​ក្រោយនេះ។

ទោះជាយ៉ាងណាលោក វាសនា អះអាងថា នៅអាណត្តិនេះគណបក្សរបស់លោកមិនអាចឈ្នះឆ្នោតដឹកនាំរដ្ឋាភិបាលទេ ប៉ុន្តែលោកបញ្ជាក់ថា នៅអាណត្តិនេះបក្សរបស់លោកត្រូវ​ការតែទីសំរាប់ឈរសិន​ពោលត្រូវកៀគរអ្នកគាំទ្រ​​ឲ្យបាន​ច្រើនជាងមុន ដើម្បីត្រៀមប្រកួតយកឈ្នះជាមួយបក្សផ្សេងទៀតនៅអាណត្តិក្រោយទៅវិញ។

យុវជន អ៊ី​ ប៊ុនធៀង ដែលអះអាងថា ជា​សកម្មជនគាំទ្របក្ស (LDP) បានរៀបរាប់ថា នៅអំឡុងពេល យុទ្ធនាការឃោសនារកសំឡេងឆ្នោតចំនួន២០ថ្ងៃកន្លងទៅនេះ លោកចំណាយ​ថវិកាផ្ទាល់ខ្លួនមិនតិចជាង២០ដុល្លារនោះ​ទេ ប៉ុន្តែលោកថា ការចំណាយ​នេះធ្វើឡើងដោយមិនបង្ខិតបង្ខំពីបុគ្គលណាមូយ ឡើយ។

យុវតី ហៀង ស៊ីនួន​ ដែលចូលរួមហែគណបក្ស (LDP) នាព្រឹកនេះ និយាយថា កញ្ញាលះបង់ពេលវេលា និងថវិកាផ្ទាល់ដើម្បីចូលរួមហែបក្សនេះ ដើម្បីចង់ឃើញមានការផ្លាស់ប្តូរមេដឹកនាំប្រទេសស្របតាមលទ្ធិប្រជាធិប​​​តេយ្យ។

អ្នកគាំទ្រ​គណបក្ស​សម្ព័ន្ធដើម្បីប្រជាធិបតេយ្យរាប់​ម៉ឺន​នាក់ បាន​​ជួបជុំគ្នា​​ដើម្បីធ្វើយុទ្ធនាការឃោសនាបោះឆ្នោតក្នុងរាជធានីភ្នំពេញក្នុងថ្ងៃចុងក្រោយនេះ។​

ការបោះឆ្នោតថ្នាក់ជាតិនឹងប្រព្រឹត្តទៅនៅថ្ងៃអាទិត្យចុងសប្ដាហ៍នេះ ដោយមាន២០គណបក្សចូលរួមប្រកួតប្រជែង ៕