អតីតគណបក្សសង្គ្រោះជាតិប្រកាសច្រាលចោលព័ត៌មានដែលផ្សាយថា អតីតបក្សប្រឆាំងមួយនេះ អំពាវនាវឲ្យពលរដ្ឋចេញទៅចូលរួមការបោះឆ្នោតថ្នាក់ជាតិ ដែលប្រព្រឹត្តទៅនៅថ្ងៃអាទិត្យនេះ។
តាមសេចក្ដីថ្លែងការណ៍របស់អតីតគណបក្សសង្រ្គោះជាតិចេញផ្សាយនៅថ្ងៃនេះ ថ្នាក់ដឹកនាំអតីតបក្សប្រឆាំង រួមមានប្រធានចលនាសង្គ្រោះជាតិ លោក សម រង្ស៊ី អតីតប្រធានបក្សប្រឆាំងកំពុងជាប់ឃុំ លោក កឹម សុខា និងថ្នាក់ដឹកនាំដទៃទៀត បានបដិសេធថា ពួកគេមិនបានអំពាវនាវបែបនោះទេ ។
តាមរយៈវីដេអូឃ្លីបដែលបង្ហោះលើហ្វេសប៊ុកនៅថ្ងៃនេះ លោក សម រង្ស៊ី ថ្លែងថា មានមនុស្សទុច្ចរិតមួយក្រុមបានយកសំលេង និងរូបភាពរបស់លោក ទៅកាត់ត ដើម្បីបំភាន់មតិសាធារណជន។
អតីតប្រធានគណបក្សសង្គ្រោះជាតិ លោក សម រង្ស៊ី
សេចក្ដីថ្លែងការណ៍បដិសេធរបស់អតីតគណបក្សសង្គ្រោះជាតិ ធ្វើឡើងក្រោយពីមានព័ត៌មានលើបណ្ដាញសង្គម និងគេហទំព័រមួយចំនួន បានផ្សាយផ្ទុយពីគោលជំហររបស់អតីតបក្សប្រឆាំងមួយនេះ៕