គណៈកម្មាធិការជាតិរៀបចំការបោះឆ្នោតឲ្យដឹងថា គ.ជ.ប បានផ្លាស់ប្ដូរទីតាំងការិយាល័យបោះឆ្នោតចំនួន ២០ ការិយាល័យនៅទូទាំងប្រទេស ដោយសារមានទឹកជំនន់។
អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា ប្រាប់វីអូឌីនៅថ្ងៃនេះថា ការិយាល័យបោះឆ្នោតចំនួន២០ នៅទូទាំងប្រទេសត្រូវបានផ្លាស់ប្ដូរទៅទីកន្លែងផ្សេង ដោយសារបញ្ហាទឹកជំនន់ ក្នុងនោះខេត្តដែលត្រូវ ផ្លាស់ប្ដូរច្រើនជាងគេនោះ ខេត្តស្ទឹងត្រែង ដោយប្ដូរចំនួន ១២ ការិយាល័យ ទៅទីតាំងផ្សេង។ លោកបន្តថា ការផ្លាស់ប្ដូរនេះដែរ ដើម្បីផ្ដល់ភាពងាយស្រួលដល់ប្រជាពលរដ្ឋ។
យោងទៅតាមបញ្ជីឈ្មោះបោះឆ្នោតចុងក្រោយគេបង្អស់របស់គណកម្មាធិការជាតិរៀបចំការបោះឆ្នោត ប្រជាពលរដ្ឋដែលមានសិទ្ធបោះឆ្នោតរើសតំណាងរាស្ត្រអាណត្តិទី៦នេះ មានចំនួនជាង ៨,៤លាននាក់ ហើយសម្រាប់ការិយាល័យបឆ្នោតមានចំនួន ២ ១៩៦៧ នៅទូទាំងប្រទេស៕