គណៈកម្មាធិការជាតិរៀបចំការបោះឆ្នោត បានឲ្យដឹងថា គិតត្រឹមម៉ោង ៥ ល្ងាចនេះ លទ្ធផលបណ្ដោះអាសន្នចំនួនប្រជាពលរដ្ឋដែលបានទៅបោះឆ្នោតមាន ៨២,១៧ ភាគរយ ខណៈដែលមួយម៉ោងមុននេះ គ.ជ.ប បានប្រកាសថា ចំនួនប្រជាប្រជាពលដ្ឋទៅបោះឆ្នោតបានតែ៨០,៤៩ ភាគរយប៉ុណ្ណោះ។
ក្នុងសេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតឲ្យដឹងថា ប្រជាពលរដ្ឋដែលបានទៅបោះឆ្នោតជ្រើសតាំងតំណាងរាស្ត្រនីតិកាលទី ៦ នេះ មានចំនួន ៦ ៨៨៥ ៧២៩ ស្មើនឹង ៨២,១៧ % នៃចំនួនអ្នកបានចុះឈ្មោះបោះឆ្នោតសរុប ៨ ៣៨០ ២១៧ នាក់។ គ.ជ.ប បានបញ្ជាក់ថា ចំនួនអ្នកដែលបានចូលរួមបោះឆ្នោតក្នុងអាណត្តិទី៦ នេះ មានការកើនឡើងជាង ១០ ភាគរយ បើប្រៀបធៀបទៅនឹងអាណត្តិទី៥ កន្លងទៅ។
គ.ជ.ប បញ្ជាក់បន្ថែមថា លទ្ធផលបណ្ដោះអាសន្ននឹងប្រកាសពីម៉ោង ៧ យប់ ដល់ ម៉ោង ១:០០ នៃយប់ថ្ងៃបោះឆ្នោត ដោយផ្សាយផ្ទាល់តាមទូរទស្សន៍ជាតិកម្ពុជា និងគេហទំព័រ គ.ជ.ប។