អាជ្ញាធរខេត្តស្ទឹងត្រែង អះអាងថា អាជ្ញាធរបានផ្ដល់ទូកចំនួន ១៦ គ្រឿង សម្រាប់ជួយដឹកប្រជាពលរដ្ឋរងគ្រោះដោយសារ ទឹកជំនន់ទៅបោះឆ្នោតនៅថ្ងៃនេះ ខណៈទឹកជំនន់មិនទាន់ស្រកចុះដែលអាចឲ្យប្រជាពលរដ្ឋធ្វើដំណើរទៅបោះឆ្នោតបាន។
អ្នកនាំពាក្យសាលាខេត្តស្ទឹងត្រែងលោក ម៉ែន គង់ ប្រាប់វីអូឌីនៅថ្ងៃនេះថា អាជ្ញាធរបានផ្ដល់ទូកចំនួន ១៦ គ្រឿងសម្រាប់ដឹកប្រជាពលរដ្ឋដែលត្រូវបានជម្លៀសទៅទីទួលសុវត្ថិភាព និងប្រជាពលរដ្ឋដែលអាជ្ញាធរមិនបានជម្លៀស ប៉ុន្តែត្រូវបានទឹកលិចផ្លូវមិនអាចទៅបោះឆ្នោតរួចហើយ។
អ្នកនាំពាក្យសាលាខេត្តស្ទឹងត្រែងលោក ម៉ែន គង់
លោកបន្តថា ប្រជាពលរដ្ឋដែលត្រូវបានជម្លៀសទៅទីទួលសុវត្ថិភាព ដោយសារ ទឹកជំនន់ជន់លិចផ្ទះមាន ១២៨៩ គ្រួសារនៅក្នុងឃុំចំនួន ៤ នៃស្រុកសៀមប៉ាង ខេត្តស្ទឹងត្រែង។
អភិបាលរងស្រុកសៀមប៉ាង លោក យ៉ង់ សុខា មានប្រសាសន៍ថា បើទោះបីជានៅក្នុងស្រុកសៀមប៉ាងកំពុងមានទឹកជំនន់ក៏ដោយតែមិនបង្កផលលំបាកដល់ប្រជាពលរដ្ឋក្នុងការធ្វើដំណើរទៅបោះឆ្នោតដែរ ដោយសារ អាជ្ញាធរបានយកទូកទៅដឹកប្រជាពលរដ្ឋទាំងអស់នោះហើយ។
អ្នកនាំពាក្យសាលាខេត្តស្ទឹងត្រែងលោក ម៉ែន គង់
អ្នកស្រី ហា សំណាង ជាប្រជាពលរដ្ឋម្នាក់រស់នៅឃុំសន្តិភាព ស្រុកសៀមប៉ាងដែលកំពុងមានទឹកជំនន់អះអាងថា ពួកគាត់ត្រូវអាជ្ញាធរជម្លៀសទៅកាន់ទីទួលសុវត្ថិភាពទាំងអស់គ្នា ចាប់តាំងពីថ្ងៃទឹកចូលដល់ក្នុងភូមិរបស់ពួកគាត់ ហើយរហូតមកដល់ពេលនេះទឹកទើបស្រកចុះប្រហែលជាកន្លះម៉ែត្រប៉ុណ្ណោះ។ អ្នកស្រីបន្តថា នៅថ្ងៃនេះដែរ អាជ្ញាធរបានយកទូក ២ គ្រឿងដឹកពួកគាត់ពីទីទួលសុវត្ថិភាពនោះទៅបោះឆ្នោតផងដែរ។
អ្នកស្រី ហា សំណាង ប្រជាពលរដ្ឋម្នាក់រស់នៅឃុំសន្តិភាព ស្រុកសៀមប៉ាង
បើតាមគណៈកម្មាធិការជាតិរៀបចំការបោះឆ្នោតឲ្យដឹងថា គ.ជ.ប បានផ្លាស់ប្ដូរការិយាល័យបោះឆ្នោតចំនួន ២០ នៅទូទាំងប្រទេសង ដោយក្នុងនោះខេត្តត្រូវផ្លាស់ប្ដូរច្រើនជាងគេនោះ គឺនៅខេត្តស្ទឹងត្រែង ដោយប្ដូរចំនួន ១២ ការិយាល័យ ទៅទីតាំងផ្សេង។
យោងទៅតាមបញ្ជីឈ្មោះបោះឆ្នោតចុងក្រោយគេបង្អស់របស់គណកម្មាធិការជាតិរៀបចំការបោះឆ្នោត ឲ្យដឹងថា ប្រជាពលរដ្ឋដែលមានសិទ្ធបោះឆ្នោតរើសតំណាងរាស្ត្រអាណត្តិទី៦នេះ មានចំនួនជាង ៨លាននាក់ ហើយសម្រាប់ការិយាល័យបឆ្នោតចំនួន ២ ១៩៦៧ នៅទូទាំងប្រទេស។
