បោះឆ្នោត

លោក ខឹម វាសនា៖ បើបានអាសនៈក្នុងសភានឹងកាត់បន្ថយអំណាចប្រមូលផ្តុំ

លោក ណាត សុភាព
| ៣០ កក្កដា ២០១៨
ម៉ោង ១៦:១៣

មេដឹកនាំគណបក្សសម្ព័ន្ធ ដើម្បីប្រជាធិតេយ្យ លោក ខឹម វាសនា ក្នុងថ្ងៃឃោសនាបក្ស ថ្ងៃទី ២៧ កក្កដា ២០១៨

មេដឹកនាំគណបក្សសម្ព័ន្ធដើម្បីប្រជាធិបតេយ្យអះអាងថា លោកនឹងជួយប្រជាពលរដ្ឋម្ចាស់ឆ្នោតទទួលបានសិទ្ធិសេរីភាពពេញលេញ និងស្របតាមគោលការណ៍ប្រជាធិបតេយ្យ តាមរយៈកាត់បន្ថយអំណាចប្រមូលផ្តុំរបស់រដ្ឋាភិបាល បើគណបក្សលោកបានអាសនៈនៅក្នុងសភា។

ការអះអាងនេះ ធ្វើឡើងបន្ទាប់ពី គ.ជ.ប ចេញផ្សាយលទ្ធផលបោះឆ្នោតបឋមនៅតាមរាជធានី និងបណ្តាខេត្តមួយចំនួន តាមទូរទស្សន៍ ទ.ទ.ក ថា គណបក្សកាន់អំណាចមានសំឡេងគាំទ្រច្រើនជាង គណបក្សសម្ព័ន្ធដើម្បីប្រជាធិបតេយ្យ។

មេដឹកនាំគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា ប្រាប់ VOD នៅថ្ងៃនេះថា បើអាណត្តិនេះគណបក្សរបស់លោកទទួលបានអាសនៈក្នុងសភា លោកថានឹងប្រើសិទ្ធិរបស់ម្ចាស់ឆ្នោតជួយកាត់បន្ថយអំណាចប្រមូលផ្តុំរបស់រដ្ឋាភិបាល ដោយថាដើម្បីធ្វើឲ្យប្រទេសជាតិរីកចំរើន។

យន្តការ៨ចំណុច គឺជាវិធានការកាត់បន្ថយអំណាចរបស់អ្នកដឹកនាំប្រទេស ដើម្បីឲ្យប្រជាពលរដ្ឋគាត់មានអំណាចក្នុងការគ្រប់គ្រងអ្នកតំណាងរបស់គាត់ កាលណាប្រជាពលរដ្ឋបានក្លាយជាម្ចាស់របស់អ្នកតំណាងហើយ អ្នកតំណាងខ្លាចប្រជាពលរដ្ឋហើយ អ្នកតំណាងខ្លាចប្រជាពលរដ្ឋ គឺប្រជាពលរដ្ឋគាត់ហ៊ានឲ្យអ្នកតំណាងធ្វើអ្វីជាប្រយោជន៍គាត់ គាត់អាចធ្វើបាន

មេដឹកនាំគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា

អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលការលើកឡើងរបស់មេដឹកនាំបក្សសម្ព័ន្ធ ដើម្បីប្រជាធិបតេយ្យ ដែលថារដ្ឋាភិបាលប្រើអំណាចប្រមូលផ្តុំ ប្រាស់ចាកពីគោលការណ៍ប្រជាធិបតេយ្យ។ លោកបញ្ជាក់ថា បើអាណត្តិនេះបក្សកាន់អំណាចឈ្នះឆ្នោតនឹងដឹកនាំប្រទេសឲ្យកាន់តែរីកចំរើនជាងពេលបច្ចុប្បន្ននេះ។

ពេលដែលយើងជាប់ឆ្នោតកាន់អំណាចគឺយើងបន្តអនុវត្តកម្មវិធីនយោបាយ ហើយយើងខិតខំកាត់បន្ថយ នូវរាល់បាតុភាពអសកម្មទាំងឡាយ ឬចំណុចខ្សោយទាំងឡាយ របស់ការអនុវត្តកម្មវិធីនយោបាយនេះ ដើម្បីលើកកម្ពស់គុណភាព ប្រសិទ្ធិភាពនៃសេវាសាធារណៈជូនប្រជាពលរដ្ឋយើង

អ្នកនាំពាក្យគណបក្សប្រជាជនកម្ពុជា លោក សុខ ឥសាន

អ្នកស្រាវជ្រាវពីការអភិវឌ្ឍន៍សង្គម លោក មាស នី វិភាគថា ទោះបីជាគណបក្សសម្ព័ន្ធមានសំឡេងគាំទ្រច្រើនយ៉ាងណាក៏ដោយ នៅថ្ងៃអនាគតអាចនឹងមានវាសនាដូចអតីតបក្សសង្គ្រោះជាតិ។

គួរបញ្ជាក់ថា ការបោះឆ្នោតថ្នាក់ជាតិអាណត្តិទី៦នេះ មានគណបក្សនយោបាយចំនួន២០ចូលរួមប្រកួតប្រជែង។ ប៉ុន្តែក្រោយពីបោះឆ្នោតភ្លាម គ.ជ.ប បានចេញផ្សាយលទ្ធផលបោះឆ្នោតបឋមលើទូរទស្សន៍ ទ.ទ.ក ថា ចំនួនអ្នកទៅបោះឆ្នោតមាន ៦លានជាង៨សែននាក់ ស្មើ៨២,១៧% នៃចំនួនអ្នកបានចុះឈ្មោះបោះឆ្នោតសរុប ៨ ៣៨០ ២១៧ នាក់។

លទ្ធផលមិនផ្លូវការបង្ហាញថា គណបក្សដែលទទួលបានអាសនៈក្នុងសភារួមមាន គណបក្សប្រជាជនកម្ពុជា គណបក្សហ្វ៊ុនស៊ិនប៉ិច និងគណបក្សសម្ព័ន្ធដើម្បីប្រជាធិបតេយ្យ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។