ប្រទេសចិន អបអរកម្ពុជាដែលបានរៀបចំការបោះឆ្នោតជ្រើសតាំងតំណាងរាស្រ្តអាណត្តិទី៦ បានដោយជោគជ័យ។
អ្នកនាំពាក្យក្រសួងការបរទេសចិនលោក Geng Shuang បានថ្លែងក្នុងសន្និសីទការសែតប្រចាំថ្ងៃដែលរៀបចំដោយក្រសួងការបរទេសប្រទេសនេះកាលថ្ងៃទី៣០ខែកក្កដាម្សិលមិញនេះថា ចិនសូមសម្តែងនូវការអបអរសាទរដោយស្មោះដែលកម្ពុជាបានរៀបចំការបោះឆ្នោតអាណត្តិទី៦នេះប្រកបដោយភាពជោគជ័យ ហើយចិនក៏អបអរផងដែរដល់ជ័យជម្នះរបស់គណបក្សប្រជាជនកម្ពុជា។
លោកបន្តថាចិនបានត្រៀមខ្លួនរួចជាស្រេចដើម្បីធ្វើការជាមួយកម្ពុជាលើកិច្ចព្រមព្រៀងនានាដែលធ្វើឡើងដោយមេដឹកនាំប្រទេសទាំងពីរ និងកសាងសហគមន៍ជាយុទ្ធសាស្រ្តដ៏សំខាន់ដើម្បីអនាគតរួមគ្នារវាងទាំងពីរ ក៏ដូចជាជម្រុញទំនាក់ទំនងកម្ពុជា-ចិន ឲ្យដល់កម្រិតមួយខ្ពស់ជាងនេះទៀត។
ស្របពេលដែលសហគមន៍អន្តរជាតិនានាបានចោទជាសំណួរពីភាពត្រឹមត្រូវនៃការបោះឆ្នោតកាលពីថ្ងៃអាទិត្យក្រោយពីការរំលាយអតីតគណបក្សសង្រ្គោះជាតិ អ្នកនាំពាក្យក្រសួងការបរទេសចិនរូបនេះ លើកឡើងថារឿងនេះជាកិច្ចការផ្ទៃក្នុងរបស់កម្ពុជា ហើយចិនសង្ឃឹមថា កម្ពុជានឹងរក្សាបាននូវស្ថិរភាពនិងបង្កើតសមិទ្ធិផលធំៗនានាបន្តទៀតក្នុងការអភិវឌ្ឍន៍ជាតិ។
ការបោះឆ្នោតកាលពីថ្ងៃអាទិត្យកន្លងទៅត្រូវបានប្រទេសប្រជាធិបតេយ្យនានាមានដូចជាអាមេរិក អូស្រ្តាលី កាណដា បារាំង និង សហគមន៍អឺរ៉ុបជាដើមថាមិនមានភាពសេរីនិងយុត្តិធម៌នោះទេដោយសារតែអតីតបក្សប្រឆាំងត្រូវបានរំលាយ ការធ្វើទុក្ខបុកម្នេញលើអង្គការសង្គមស៊ីវិល សារព័ត៌មានឯករាជ្យ និង ការឃុំបន្តឃុំខ្លួនលោកកឹម សុខាជាដើម៕
